ଭୁବନେଶ୍ୱର,୦୬/୦୨: ବାର୍‌ରେ ବାଉନ୍ସର ତଥା ଘରୋଇ ସୁରକ୍ଷାକର୍ମୀ ଜଗିବା ଉପରେ କମିଶନରେଟ୍‌ ପୁଲିସ କଟକଣା ଲଗାଇଛି । ବାଉନ୍ସରମାନଙ୍କ ଉତ୍ପାତ ବଢ଼ୁଥିବାରୁ ସେମାନଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ନିଆଯାଇଥିବା ପୁଲିସ  ସୂଚନା ଦେଇଛି । 

ପୁଲିସ ପକ୍ଷରୁ ଜାରି ବିଜ୍ଞପ୍ତି ଅନୁସାରେ, ବିନା ପରିଚୟପତ୍ର ଓ  ଚରିତ୍ର ଯାଞ୍ଚରେ କୌଣସି ବାର୍‌ରେ ବାଉନ୍ସରଙ୍କୁ ନିଯୁକ୍ତି ଦିଆଯିବନି । ଘରୋଇ ସୁରକ୍ଷା  ସଂସ୍ଥା (ପରିଚାଳନା) ଆଇନ୍‌ (ପସାରା) ଅଧୀନରେ ପଞ୍ଜିକୃତ ସଂସ୍ଥାଠାରୁ ବାର ମାଲିକମାନେ ବାଉନ୍ସର ମଗାଇ ପାରିବେ। କେତେଜଣ ବାଉନ୍ସର ନିଯୁକ୍ତ ହେଲେ,  ସେନେଇ ବାର୍‌ ମାଲିକମାନେ ନିକଟସ୍ଥ ଥାନାକୁ ଲିଖିତ ଭାବେ ଅବଗତ କରାଇବେ । 

ବାଉନ୍ସରମାନେ ଯେମିତି ଆଇନ ଅନୁସାରେ କାମ କରିବେ, ସେନେଇ ବାର କର୍ତ୍ତୃପକ୍ଷ  ଧ୍ୟାନ ରଖିବେ । ବାଉନ୍ସରମାନେ ବିଗତ ଦିନରେ ବିଭିନ୍ନ ବାର୍‌ରେ ବିଶୃଙ୍ଖଳା ସୃଷ୍ଟି  କରିବା ନଜର ରହିଛି । ସେମାନେ ଆଇନକୁ ହାତକୁ ନେଇ ଗ୍ରାହକମାନଙ୍କୁ ମାରଧର  କରୁଥିବା ଦୃଶ୍ୟ ମଧ୍ୟ ସିସି କ୍ୟାମେରାରେ କଏଦ୍‌ ହୋଇଛି । ବାଉନ୍ସରଙ୍କ ମନମାନି  ରୋକିବାକୁ ପୁଲିସ ଏଭଳି କାର୍ଯ୍ୟାନୁଷ୍ଠାନ ନେଇଛି । ଏହି କଟକଣା ଆସନ୍ତାକାଲିଠୁ  ଲାଗୁ ହୋଇ ଏପ୍ରିଲ ୫ ତାରିଖ ଯାଏ ବଳବତ୍ତର ରହିବ ।