ନୂଆଦିଲ୍ଲୀ,୧୪/୦୯: ଚଳିତ ବର୍ଷ ବର୍ତ୍ତମାନ ସୁଦ୍ଧା କେବଳ ଭାରତୀୟ ନୁହେଁ ବରଂ ଅନେକ ବିଦେଶୀ କ୍ରିକେଟର ଅବସର ନେଇସାରିଲେଣି। ଡେଭିଡ ୱାର୍ଣ୍ଣରଙ୍କ ଠାରୁ ଦୀନେଶ କାର୍ତ୍ତିକ ପର୍ଯ୍ୟନ୍ତ ଏବଂ ଶିଖର ଧାୱନ ଓ ମୋଇନ ଅଲିଙ୍କ ଭଳି ଖେଳାଳି ମଧ୍ୟ କ୍ରିକେଟରୁ ଅବସର ନେଇସାରିଛନ୍ତି। ଏପରିକି ବିରାଟ କୋହଲି ଏବଂ ରୋହିତ ଶର୍ମା ଟି ୨୦ କ୍ରିକେଟକୁ ବିଦାୟ ଦେଇସାରିଛନ୍ତି। ବର୍ତ୍ତମାନ ଖୁବ୍ ଶୀଘ୍ର ଭାରତୀୟ ଦ୍ରୁତ ବୋଲର ଭୁବନେଶ୍ୱର କୁମାରଙ୍କ ନାମ ମଧ୍ୟ ଏହି ତାଲିକାରେ ଯୋଡି ହୋଇପାରେ ବୋଲି ଚର୍ଚ୍ଚା ହେଉଛି।
୨୦୧୨ ରେ ପାକିସ୍ତାନ ବିପକ୍ଷ ଟି ୨୦ ମ୍ୟାଚରେ ଭୁବନେଶ୍ୱର କୁମାର ଭାରତ ପାଇଁ ଅନ୍ତର୍ଜାତୀୟ ଡେବ୍ୟୁ କରିଥିଲେ। ବର୍ତ୍ତମାନ ସୋସିଆଲ ମିଡିଆରେ ଦାବି କରାଯାଉଛି ଯେ ଭୁବନେଶ୍ୱର କୁମାର ଖୁବ୍ ଶୀଘ୍ର ଅବସର ଘୋଷଣା କରିପାରନ୍ତି। ଯଦିଓ ଏନେଇ କୌଣସି ଅଫିସିଆଲ ଘୋଷଣା କରାଯାଇ ନାହିଁ ତଥାପି ଏନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି। ଭୁବନେଶ୍ୱର ନ୍ୟୁଜିଲାଣ୍ଡ ବିପକ୍ଷରେ ଭାରତ ପାଇଁ ଶେଷ ମ୍ୟାଚ୍ ଖେଳିଥିଲେ। ନଭେମ୍ବର ୨୦୨୨ ରେ ଅନୁଷ୍ଠିତ ହୋଇଥିବା ଟି ୨୦ ମ୍ୟାଚ୍ ରେ ଭୁବନେଶ୍ୱର କୌଣସି ୱିକେଟ୍ ନେଇପାରିନଥିଲେ ଏବଂ ଡକୱର୍ଥ-ଲୁଇସ୍ ନିୟମ ଅନୁଯାୟୀ ସେହି ମ୍ୟାଚ୍ ଟାଇ ଘୋଷିତ ହୋଇଥିଲା।
ଜୁଲାଇ ୨୦୨୩ ରେ ଭୁବନେଶ୍ୱର ତମାମ ଚର୍ଚ୍ଚାରେ ଥିଲେ। କହିରଖୁଛୁ ଯେ, ଏହା ପୂର୍ବରୁ ସେ ନିଜ ଇନଷ୍ଟାଗ୍ରାମ ପ୍ରୋଫାଇଲରେ 'ଇଣ୍ଡିଆନ କ୍ରିକେଟର' ଲେଖିଥିଲେ। କିନ୍ତୁ ଗତ ବର୍ଷ ଜୁଲାଇରେ ସେ 'କ୍ରିକେଟର' ଶବ୍ଦକୁ ହଟାଇ ତାଙ୍କ ପ୍ରୋଫାଇଲରେ କେବଳ 'ଇଣ୍ଡିଆନ' ଲେଖାକୁ ଉଲ୍ଲେଖ କରିଥିଲେ। ଯଦିଓ ଏହା ଏହି କ୍ୟାପ୍ସନ୍କୁ ଅବସରର ସଙ୍କେତ ଭାବରେ ଦେଖାଯାଉଥିଲା, ତେବେ ଏପର୍ଯ୍ୟନ୍ତ ସେ ଏହି ବିଷୟରେ କୌଣସି ସ୍ପଷ୍ଟ ସୂଚନା ଦେଇନାହାନ୍ତି।
ଭୁବନେଶ୍ୱର କୁମାର ୨୫ ଡିସେମ୍ବର ୨୦୧୨ ରେ ପାକିସ୍ତାନ ବିପକ୍ଷରେ ପ୍ରଥମ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ। କ୍ୟାରିୟରର ପ୍ରଥମ ଓଭରରେ ସେ ପାକିସ୍ତାନୀ ବ୍ୟାଟରମାନଙ୍କୁ ତାଙ୍କ ସ୍ୱିଙ୍ଗର ଜାଲରେ ଫସାଇଥିଲେ। ତାଙ୍କର ପ୍ରଥମ ଓଭରର ଶେଷ ବଲରେ ସେ ନାସିର ଜାମସେଦଙ୍କୁ ଏକ ଇନ୍-ସୁଇଙ୍ଗ୍ ବଲ୍ ବୋଲିଂ କରି କ୍ଳିନ୍ ବୋଲ୍ଡ କରିଥିଲେ। ସେ ଏହି ମୁକାବିଲାରେ ୪ ଓଭର ବୋଲିଂ କରିଥିଲେ, ଯେଉଁଥିରେ ଭୁବନେଶ୍ୱର ମାତ୍ର ୯ ରନ୍ ଦେଇ ୩ ୱିକେଟ୍ ନେଇଥିଲେ।
