ମୁମ୍ବାଇ: ବିଜେପିର ୪୦୦ ପାର ନାରାକୁ ନେଇ ବିବାଦ ମୁଣ୍ଡ ଟେକିଛି । ବିଶେଷ କରି ମହାରାଷ୍ଟ୍ରରେ ଏନଡିଏ ମେଣ୍ଟ ପାଇଁ ଏହା ଅଡ଼ୁଆ ପରିସ୍ଥିତି ସୃଷ୍ଟି କରିଛି । ଏକଥା ଆମେ କହୁନାହୁଁ ବରଂ ରାଜ୍ୟର ମନ୍ତ୍ରୀ ଏବଂ ଅଜିତ ପାଓ୍ବାରଙ୍କ ନେତୃତ୍ବାଧୀନ ଏନସିପି ନେତା ଛଗନ ଭୁଜବଳ ଏହା କହିଛନ୍ତି । ସେ କହିଛନ୍ତି ଯେ, ବିଜେପିର ୪୦୦ ପାର ନାରା ରାଜ୍ୟରେ ବିଜେପି-ଶିବସେନା-ଏନସିପି ମହାୟୁତି ମେଣ୍ଟର ରାଜନୈତିକ ପୃଷ୍ଠଭୂମି ଉପରେ ନକାରାତ୍ମକ ପ୍ରଭାବ ପକାଇଛି । ସମାଜର ପଛୁଆ ବର୍ଗଙ୍କ ଉପରେ ଏହାର ପ୍ରଭାବ ପଡ଼ିଛି । ସମ୍ବିଧାନ ପରିବର୍ତ୍ତନ ନେଇ ସେମାନେ ଆଶଙ୍କା କରୁଛନ୍ତି ।
ଏହା ସହ ସ୍କୁଲ ପାଠ୍ୟପୁସ୍ତକରେ ମନୁସ୍ମୃତି ସାମିଲ କରିବା ଉପରେ ଛଗନ ଭୁଜବଳ ପ୍ରଶ୍ନ କରିଛନ୍ତି । ଏହି ନିଷ୍ପତ୍ତି ସମାଜର ଦଳିତ ଏବଂ ଓବିସି ବର୍ଗଙ୍କୁ ବିଚଳିତ କରିଛି ବୋଲି ସେ କହିଛନ୍ତି । ଭୁଜବଳ ଆହୁରି କହିଛନ୍ତି ଯେ, ‘ ୪୦୦ରୁ ଅଧିକ ସିଟ ଜିତି ବିଜେପି ଶାସନକୁ ଫେରିଲେ ସମ୍ବିଧାନ ପରିବର୍ତ୍ତନ ହୋଇପାରେ ବୋଲି ଆଶଙ୍କା କରି ଭୟଭୀତ ହୋଇପଡ଼ିଛନ୍ତି ସମାଜର ପଛୁଆ ବର୍ଗ । ’ ଏହାକୁ ନେଇ ନିର୍ବାଚନୀ ପ୍ରଚାର କରିବାକୁ ବହୁ ଆହ୍ବାନ ଉପୁଜିଥିଲା ବୋଲି ସେ କହିଛନ୍ତି । ଆଉ ଏହାର ପ୍ରଭାବ ଚଳିତ ନିର୍ବାଚନରେ ମେଣ୍ଟ ଉପରେ ପଡ଼ିଛି । ମୁମ୍ବାଇରେ ଦଳୀୟ କାର୍ଯ୍ୟକର୍ତ୍ତାଙ୍କୁ ସମ୍ବୋଧନ ଅବସରରେ ଏଭଳି କହିଛନ୍ତି ଏନସିପି ନେତା ଛଗନ ଭୁଜବଳ ।
ସେପଟେ ଇଣ୍ଡିଆନ ନଲେଜ୍ ସିଷ୍ଟମ (ଆଇକେଏସ୍) ଅନ୍ତର୍ଗତ ସ୍କୁଲ ପାଠ୍ୟପୁସ୍ତକରେ ମନୁସ୍ମୃତି ସାମିଲ କରିବା ନିଷ୍ପତ୍ତି ଚିନ୍ତାର ବିଷୟ । ଏହା ଉପରେ ରୋକ ଲାଗିବା ଦରକାର । ବର୍ତ୍ତମାନ ହୁଏତ ଏହାର ପ୍ରଭାବ ପଡ଼ିନପାରେ । ହେଲେ ଭବିଷ୍ୟତରେ ଏଥିପାଇଁ ଅଡ଼ୁଆ ପରିସ୍ଥିତି ସୃଷ୍ଟି ହୋଇପାରେ ବୋଲି ଦାବି କରିଛନ୍ତି ଛଗନ ଭୁଜବଳ । ତେବେ ଏନସିପି ଭାଗ ହେବା ପାଖରୁ ଅଜିତ ପାଓ୍ବାରଙ୍କ ସହ ରହିଆସିଛନ୍ତି ଛଗନ । ସେ ଦଳର ସବୁ ନିଷ୍ପତ୍ତିରେ ସକ୍ରିୟ ଅଂଶଗ୍ରହଣ କରିଆସୁଛନ୍ତି । ପୂର୍ବରୁ ମରାଠାମାନଙ୍କୁ ଅଧିକ ସଂରକ୍ଷଣ ଦେବା ନେଇ ସରକାରଙ୍କ ନିଷ୍ପତ୍ତିକୁ ସେ ବିରୋଧ କରିଥିଲେ । ଏପରିକି ରାଜ୍ୟର ବିଭିନ୍ନ ପଲିସି ବିରୋଧରେ ସ୍ବର ଉଠାଇ ଚର୍ଚ୍ଚାକୁ ଆସିଛନ୍ତି ଛଗନ ଭୁଜବଳ ।
