ନୂଆଦିଲ୍ଲୀ,୨୪/୫: ବାଂଲାଦେଶ ସାଂସଦଙ୍କୁ ହତ୍ୟା ମାମଲା। ଏହି ଘଟଣାକୁ ନେଇ ଏକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି । ସାଂସଦ ଅନଓ୍ବାରୁଲ ଆଜିମଙ୍କୁ ପ୍ରଥମେ ଗଳା ଚିପି ହତ୍ୟା କରାଯାଇଥିଲା । ଏହାପରେ ତାଙ୍କ ଶରୀରରୁ ଚମଡ଼ା ଉତାରି ଖଣ୍ଡ ଖଣ୍ଡ କାଟି ଦିଆଯାଇଥିଲା । ଯେମିତି ମାଂସ ନ ସଢିବ ସେଥିପାଇଁ ହଳଦୀ ପକାଇ ପ୍ଲାଷ୍ଟିକ ବ୍ୟାଗରେ ଭର୍ତ୍ତି କରି ଫିଙ୍ଗି ଦିଆଯାଇଥିବା ଜଣାପଡିଛି । ତେବେ ଏହି ହାଇପ୍ରୋଫାଇଲ ମର୍ଡରରେ ସାଂସଦଙ୍କ ବନ୍ଧୁଙ୍କ ହାତ ରହିଛି । ସେ ୫ କୋଟି ସୁପାରି ଦେଇ ହତ୍ୟା କରାଇଥିଲେ ।
ଜଣେ କଂସେଇ ତାଙ୍କୁ ହାଣି ଖଣ୍ଡ ଖଣ୍ଡ କରିଥିଲା, ଯିଏକି ବାଂଲାଦେଶରୁ ଆସି ମୁମ୍ବାଇରେ ଅବୈଧ ଭାବେ ରହୁଥିଲା। ଏହା ଏକ ହନିଟ୍ରାପ ମାମଲା ହୋଇଥିବା ମଧ୍ୟ କୁହାଯାଉଛି। ଏନେଇ ସିଆଇଡି ହତ୍ୟାକାଣ୍ଡରେ ଜଡିତ ସେହି କଂସେଇକୁ ଗିରଫ କରିଥିବାବେଳେ ସେ ମଧ୍ୟ ନିଜ ଦୋଷ ସ୍ବୀକାର କରିଛି । ସୂଚନା ମୁତାବକ, କୋଲକାତାର ନ୍ୟୁ ଟାଉନ ଅଞ୍ଚଳରେ ସ୍ଥିତ ଏକ ଫ୍ଲାଟରେ ସାଂସଦ ଆଜିମଙ୍କୁ ହତ୍ୟା କରାଯାଇଥିଲା । ସେହି ଫ୍ଲାଟଟି ଆଜିମଙ୍କ ବନ୍ଧୁଙ୍କର ଥିଲା, ଯିଏ ଏବେ ଆମେରିକାରେ ଅଛନ୍ତି । ପୋଲିସ ସିସିଟିଭି ଫୁଜେଟରୁ ଜାଣିବାକୁ ପାଇଛି ଯେ ଶେଷ ଥର ପାଇଁ ସାଂସଦଙ୍କୁ ସେହି ଫ୍ଲାଟକୁ ଯିବା ସମୟରେ ଦେଖିବାକୁ ମିଳିଥିଲା । ତା' ପରଠୁ ସେ ନିଖୋଜ ହୋଇଯାଇଥିଲେ । ଏହି ବାଂଲାଦେଶୀ ସାଂସଦ ହନିଟ୍ରାପରେ ଫସିଥିବା ଅନୁମାନ କରାଯାଉଛି । ଜଣେ ମହିଳା ତାଙ୍କୁ ଫ୍ଲାଟକୁ ଡକାଇଥିବା ସନ୍ଦେହ କରାଯାଉଛି । ଏହି ମହିଳା ଜଣକ ସାଂସଦଙ୍କ ସେହି ବନ୍ଧୁଙ୍କ ଘନିଷ୍ଠ ଅଟନ୍ତି । ତେବେ ଏହି ମାମଲାକୁ ନେଇ ପୋଲିସ ତଦନ୍ତ ଜାରି ରଖିଛି ।