ନୂଆଦିଲ୍ଲୀ : ତେଲେଙ୍ଗାନାରେ ପ୍ରସିଦ୍ଧ ତେଲୁଗୁ ଅଭିନେତା ନାଗାର୍ଜୁନଙ୍କ ଉପରେ ବଡ଼ କାର୍ଯ୍ୟାନୁଷ୍ଠାନ। ହାଇଦ୍ରାବାଦ ବିପର୍ଯ୍ୟୟ ମୁକାବିଲା ଏବଂ ସଂପତ୍ତି ସଂରକ୍ଷଣ ଏଜେନ୍ସି ହାଇଡ୍ରା (HYDRA) ତାଙ୍କ ଉପରେ କାର୍ଯ୍ୟାନୁଷ୍ଠାନ ନେଇଛି। ହାଇଡ୍ରା ନାଗାର୍ଜୁନଙ୍କ କନଭେନ୍ସନ ହଲ୍ରେ ବୁଲଡୋଜର ଚଲାଇଛି। ହାଇଡ୍ରା ଓ ପୁଲିସର ଏହି ମିଳିତ ଆକ୍ସନରେ କନଭେନ୍ସନ ହଲ୍କୁ ଧ୍ୱଂସ କରି ଦିଆ ଯାଇଛି। ଏହି ହଲ୍ ରଙ୍ଗାରେଡ୍ଡୀ ଜିଲ୍ଲାର ଶିଳ୍ପରାମମ ନିକଟରେ ତିଆରି କରାଯାଇ ଥିଲା।
ଅଭିନେତାଙ୍କ ବିରୋଧରେ ଅଭିଯୋଗ ହୋଇଥିଲା ଯେ ,ସେ ତୁମ୍ମିଡିକୁଣ୍ଟା ହ୍ରଦର ଲ୍ୟାଣ୍ଡରେ ବେଆଇନ ଭାବେ ଏହି ନିର୍ମାଣ କରିଥିଲେ। ଅନ୍ୟପଟେ ଅଭିନେତା ନାଗାର୍ଜୁନ HYDRAର ଏହି ଆକ୍ସନ ଉପରେ ଅଭିଯୋଗ କରିଛନ୍ତି। ରିପୋର୍ଟ ଆଧାରରେ, ରଙ୍ଗାରେଡ୍ଡି ଜିଲ୍ଲାର ଶିଳ୍ପରାମମ ନିକଟରେ ମାଧାପୁରରେ ଏକ ହାଇଟେକ୍ ସିଟି ପାଖରେ N-କନଭେନସନ୍ ସେଣ୍ଟର ନିର୍ମାଣ କରିଥିଲେ। କନଭେନସନ ସେଣ୍ଟର ୬.୬୯ ଏକର ଭୂମିରେ ନିର୍ମାଣ ହୋଇଥିଲା।
ଅଭିଯୋଗ ଥିଲା ଯେ , କନଭେନସନ ସେଣ୍ଟର ପାଇଁ ତୁମ୍ମିଡିକୁଣ୍ଟା ହ୍ରଦର ୩.୩୦-୪.୪୦ ଏକର ଜମି ବେଆଇନ ଭାବେ ଅଧିଗ୍ରହଣ କରାଯାଇଥିଲା । ତୁମ୍ମିଡିକୁଣ୍ଟା ହ୍ରଦ ୨୯ ଏକରେ ବିସ୍ତୃତ ଥିଲା । ହେଲେ ଅଭିନେତା ନାଗାର୍ଜୁନ ଏହାକୁ ଅସ୍ୱୀକାର କରିଛନ୍ତି ।
