ନୂଆଦିଲ୍ଲୀ: ତାଇୱାନରେ ଘଟିଥିବା ଭୂକମ୍ପ ସମୟରେ ୫୦ ଜଣ ଯାତ୍ରୀଙ୍କୁ ନେଇ ଯାଉଥିବା ଏକ ବସ୍ ଏବେ ନିଖୋଜ ରହିଛି । ଏ ନେଇ କାହାରି ପାଖରେ କୌଣସି ସୂଚନା ନାହିଁ । ତାଇୱାନର ସୁରକ୍ଷା ଏଜେନ୍ସିମାନେ ଏହାର ସନ୍ଧାନରେ ଲାଗି ପଡିଛନ୍ତି । ତାଇୱାନ କର୍ତ୍ତୃପକ୍ଷ କହିଛନ୍ତି ଯେ, ଏକ ଶକ୍ତିଶାଳୀ ଭୂକମ୍ପ ଫୋନ୍ ନେଟୱାର୍କକୁ ଧକ୍କା ଦେବା ପରେ ମିନିବସରେ ଯାତ୍ରା କରୁଥିବା ୫୦ ଜଣ ଯାତ୍ରୀଙ୍କ ସହ ଯୋଗାଯୋଗ ବିଛିନ୍ନ ହୋଇଛି । ଏହାକୁ ନେଇ ଚିନ୍ତାରେ ସ୍ଥାନୀୟ ପ୍ରଶାସନ । ସେହି ଲୋକମାନେ କେଉଁଠାରେ ଏବଂ କେଉଁ ଅବସ୍ଥାରେ ଅଛନ୍ତି ସେ ନେଇ ପ୍ରଶାସନ ଚିନ୍ତାରେ ରହିଛି ।
ସୂଚନାଥାଉକି, ଆଜି ( ବୁଧବାର) ତାଇୱାନରେ ଏକ ଶକ୍ତିଶାଳୀ ଭୂକମ୍ପ ଘଟିଥିଲା, ଯାହା ଫଳରେ ସମଗ୍ର ଦ୍ୱୀପ ଦୋହଲି ଯାଇଥିଲା । ଭୂକମ୍ପ ଯୋଗୁଁ ଅନେକ ଆକାଶ ଛୁଆ କୋଠା ଗୁଡିକ କ୍ଷତିଗ୍ରସ୍ତ ହୋଇଛି । ତାଇୱାନର କେନ୍ଦ୍ରୀୟ ପାଣିପାଗ ବିଭାଗ କହିଛି ଯେ ବୁଧବାର ସକାଳେ ତାଇୱାନର ରାଜଧାନୀ ତାଇପେଇରେ ପ୍ରବଳ ଭୂକମ୍ପ ଅନୁଭୂତ ହୋଇଛି । ଭୂକମ୍ପ ପରେ ଜାପାନ ପାଣିପାଗ ବିଭାଗ ସୁନାମି ଚେତାବନୀ ଦେଇଛି। ଜାପାନ କହିଛି ଯେ ସୁନାମିର ପ୍ରଥମ ଲହର ଏହାର ଦୁଇଟି ଦକ୍ଷିଣ ଦ୍ୱୀପକୁ ଆସିଛି। ଜାପାନ ଓକିନାୱା ଦକ୍ଷିଣ ଦ୍ୱୀପ ଗୋଷ୍ଠୀ ପାଇଁ ସୁନାମି ଚେତାବନୀ ଦେଇଛି । ଆହୁରି ମଧ୍ୟ, ଲୋକଙ୍କୁ ସ୍ଥାନାନ୍ତର କରିବା ପାଇଁ କାର୍ଯ୍ୟ ଆରମ୍ଭ ହୋଇଛି ।
ଭୂକମ୍ପ ବିଶେଷଜ୍ଞଙ୍କ ଅନୁଯାୟୀ, ତାଇୱାନରେ ହୋଇଥିବା ଭୂକମ୍ପର ତୀବ୍ରତା ରିଚ୍ଟର ସ୍କେଲରେ ୭.୨ ମାପ କରାଯାଇଛି । ତାଇୱାନରେ ହୋଇଥିବା ଭୂକମ୍ପ ଏତେ ଶକ୍ତିଶାଳୀ ଥିଲା ଯେ ସାଂଘାଇ ପର୍ଯ୍ୟନ୍ତ କମ୍ପନ ଅନୁଭୂତ ହୋଇଥିଲା ।
