ପାତ୍ରପୁର,୨୪/୦୩: ଗଞ୍ଜାମ ଜିଲ୍ଲାର ଅନ୍ୟତମ ଚର୍ଚ୍ଚିତ ନିର୍ବାଚନମଣ୍ଡଳୀ ଚିକିଟି । ଦୀର୍ଘ ଦଶନ୍ଧି ଧରି ଏହି ନିର୍ବାଚନମଣ୍ଡଳୀ ରାଣୀ ବନାମ ମଣି ଲଢ଼େଇକୁ ନେଇ ଚର୍ଚ୍ଚାରେ ରହି ଆସିଛି । କଂଗ୍ରେସର ବରିଷ୍ଠ ନେତା ତଥା ପୂର୍ବତନ ବାଚସ୍ପତି ଚିନ୍ତାମଣି ଦ୍ୟାନସାମନ୍ତରା ଏବଂ ଚିକିଟି ରାଜପରିବାରର ବୋହୂ ତଥା ରାଣୀମା’ ଉଷା ଦେବୀ ଚିକିଟି ଆସନରୁ ପ୍ରାର୍ଥୀ ହୋଇ ଲଢ଼ି ଆସୁଥିଲେ । ବୟସାଧିକ୍ୟ ହେଉ ବା ଅନ୍ୟ କାରଣରୁ ଗତ ଅନେକ ବର୍ଷ ହେଲା ଚିନ୍ତାମଣି ବାବୁ ନିର୍ବାଚନ ଲଢ଼ିନାହାନ୍ତି । କିନ୍ତୁ ଉଷା ଦେବୀ ନିଜ ରାଜନୈତିକ କ୍ୟାରିଅର୍ ସକ୍ରିୟ ରଖିଛନ୍ତି । ନବୀନ ସରକାରରେ ବିଭିନ୍ନ ମନ୍ତ୍ରଣାଳୟ ଦାୟିତ୍ୱ ସମ୍ଭାଳି ଆସିଛନ୍ତି ସେ । ବର୍ତ୍ତମାନ ଉଭୟ ପରିବାରରୁ ପରବର୍ତ୍ତୀ ପିଢ଼ି ନିର୍ବାଚନ ମଇଦାନରେ ସକ୍ରିୟ ଅଛନ୍ତି, ଯଦିଓ ଦୃଶ୍ୟପଟ୍ଟ କିଛିଟା ଭିନ୍ନ ।
ବୟସାଧିକ କାରଣରୁ ଆଗାମୀ ସାଧାରଣ ନିର୍ବାଚନରେ ଉଷା ଦେବୀ ବିଜେଡିରୁ ପ୍ରାର୍ଥୀ ନ ହୋଇ ପୁଅ ଚିନ୍ମୟାନନ୍ଦ ଶ୍ରୀରୂପ ଦେଓଙ୍କୁ ପ୍ରାର୍ଥୀ ଭାବେ ପ୍ରୋଜେକ୍ଟ୍ କରୁଥିବା ଚର୍ଚ୍ଚା ହେଉଛି । ଆଉ ଶ୍ରୀରୂପଙ୍କ ପ୍ରମୁଖ ପ୍ରତିଦ୍ୱନ୍ଦ୍ୱୀ ଭାବେ ଉଭା ହୋଇଛନ୍ତି ଚିନ୍ତାମଣିଙ୍କ ପୁଅ ମନୋରଞ୍ଜନ ଦ୍ୟାନସାମନ୍ତରା । କିନ୍ତୁ ସେ ଅନେକ ବର୍ଷ ତଳୁ କଂଗ୍ରେସ ଛାଡ଼ି ବିଜେପିରେ ଯୋଗ ଦେଇ ସାରିଛନ୍ତି । ସମ୍ପ୍ରତି ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଅଛନ୍ତି ମନୋରଞ୍ଜନ । ତେଣୁ ଦୃଶ୍ୟପଟ୍ଟ ଭିନ୍ନ ହେଲେ ହେଁ ପୂର୍ବରୁ ଉଭୟଙ୍କ ବାପା-ମାଆ ଲଢ଼େଇ ହେଉଥିଲା । ଚଳିତ ଥର ସେମାନଙ୍କ ଉତ୍ତରାଧିକାରୀଙ୍କ ମଧ୍ୟରେ ଟକ୍କର ହେବାକୁ ଯାଉଛି ।