ଭୁବନେଶ୍ୱର,୨୦/୦୯: ଶିରିପୁର ଛକସ୍ଥିତ ଚିଲିକା ଫ୍ରେସ୍ । ପ୍ରାୟ ୧୦ବର୍ଷ ତଳେ ନିର୍ମିତ ଏହି ସରକାରୀ ଆଉଟଲେଟ୍ର ପରିସର ଏବେ ସଙ୍ଗୀନ । ମାଛ କଟାଯାଉଥିବା ପିଣ୍ଡି ଭାଙ୍ଗିପଡ଼ିଲାଣି । ଟାଇଲଗୁଡ଼ିକ ଉଠିଯାଇଥିବା ବେଳେ ପଚାଗନ୍ଧ ଆସୁଛି । ଯଦ୍ୱାରା ଏହି ସ୍ଥାନଟି ଅସ୍ୱାସ୍ଥ୍ୟକର ହୋଇପଡ଼ିଛି । ଆମିଷ ବାରରେ ଏହି ଆଉଟଲେଟ୍ଟି ଖୋଲାରହେ । ସତେଜ ମାଛ କିଣିବା ପାଇଁ ଗ୍ରାହକଙ୍କ ଭିଡ଼ ଜମେ । ହେଲେ ଏହି ଆଉଟଲେଟ୍ର ପରିବେଶ ଦେଖିବା ପରେ ଲୋକେ ମାଛ କିଣିବାକୁ ନାକ ଟେକୁଛନ୍ତି । ଆଉଟଲେଟ୍ କର୍ମଚାରୀଙ୍କ କହିବା କଥା, ଆମେ ଏହି ସ୍ଥାନକୁ ମରାମତି କରିବା ପାଇଁ ଉପରିସ୍ଥ ଅଧିକାରୀଙ୍କୁ ଚିଠି ଲେଖିଛୁ, ହେଲେ ଅଧିକାରୀ ପଦ ଖାଲିଥିବାରୁ କାମ ହୋଇପାରୁନି । କେବଳ ସେତିକି ନୁହେଁ, ରାଜଧାନୀର ବିଭିନ୍ନ ସ୍ଥାନରେ ଥିବା ମୋଟ ୫ଟି ଚିଲିକା ଫ୍ରେସ ବନ୍ଦ ହୋଇଗଲାଣି ।
ରାଜଧାନୀବାସୀ ଚିଲିକାର ସତେଜ ମାଛ ପାଇବେ । ସମ୍ପୂର୍ଣ୍ଣ ସ୍ୱାସ୍ଥ୍ୟକର ପରିବେଶ ସହ ସୁଲଭ ଦରରେ ମାଛ ବିକ୍ରି କରାଯିବ । ଏଥିପାଇଁ ୨୦୧୪ରେ ତତ୍କାଳୀନ ରାଜ୍ୟ ସରକାରଙ୍କ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ପକ୍ଷରୁ ପ୍ରତିଷ୍ଠା କରାଯାଇଥିଲା ‘ଚିଲିକା ଫ୍ରେସ୍’ । ଗତ ୧୦ବର୍ଷ ମଧ୍ୟରେ ଭୁବନେଶ୍ୱରରେ ପାଖାପାଖି ୧୬ଟି ଚିଲିକା ଫ୍ରେସ ନିର୍ମାଣ କରାଯାଇଛି । ହେଲେ ଇତିମଧ୍ୟରେ ଏହି ଚିଲିକା ଫ୍ରେସ ଚଲାଇବା ସରକାରଙ୍କ ପକ୍ଷେ କଷ୍ଟକର ବ୍ୟାପାର ହୋଇପଡ଼ିଛି । ଫଳରେ ପ୍ରାୟ ୯୦ପ୍ରତିଶତ କାଉଣ୍ଟର ଏବେ ଘରୋଇ କମ୍ପାନୀ ପରିଚାଳନା କରୁଛି । ଏପଟେ ଯେଉଁ କେତେକ କାଉଣ୍ଟର ସରକାରଙ୍କ ଅଧୀନରେ ଚାଲିଛି ତାହାର ଅବସ୍ଥା ଖରାପ । ତେଣୁ କେତେବେଳେ ଏହା ବନ୍ଦ ହେବ ତାହା ମଧ୍ୟ କହିହେବନି ।
ଭୁବନେଶ୍ୱରରେ ଶିରିପୁର ବ୍ୟତିତ ସିଆରପି ଛକ, ସହିଦନଗର, ଏକାମ୍ରକାନନ ରୋଡ୍, ଖଣ୍ଡଗିରି ବାରି ଛକ, ରସୁଲଗଡ଼, ପଟିଆ ରଘୁନାଥପୁର, ସଚିବାଳୟ ମାର୍ଗ, ଜାଗମରା-ସୁନ୍ଦରପଦା ରୋଡ୍ ଅନ୍ତର୍ଗତ ଜଗମୋହନ ନଗର, ଝାରପଡ଼ା, ଶୈଳଶ୍ରୀ ବିହାର, ଶାମପୁର ଛକ, ପାତ୍ରପଡ଼ା, ମଞ୍ଚେଶ୍ୱର ଆଦିମାତା କଲୋନୀ, ଡୁମଡୁମା ଫେଜ୍-୫ ଓ ମଞ୍ଚେଶ୍ୱର ଧିରିକୁଟି ସାହି ଆଦି ସ୍ଥାନରେ ଚିଲିକା ଫ୍ରେସ ରହିଛି । ଯେଉଁଠି ଦେଶୀ ରୋହି, ଖଇଁଗା, ଖୁରାଣ୍ଟି, ଚିଲିକା ଚିଙ୍ଗୁଡ଼ି, ହିଲସା, କଙ୍କଡ଼ା, ବଳାଙ୍ଗି, ପାଣିଆଖିଆ, ଚିଲିକା କୁଣ୍ଡଳ, ପୋହଳା, ବାଗ୍ଦା ଚିଙ୍ଗୁଡ଼ି, ଦେଶି ମହୁରାଳି, ଜଳଙ୍ଗ, ଛୋଟ ଚିଙ୍ଗୁଡ଼ି ସହ କୁକୁଡ଼ା ମାଂସ, ମଟନ୍ ଆଦି ଉପଲବ୍ଧ । ବଜାର ଦରଠାରୁ ୩୦ରୁ ୩୫ ଟଙ୍କା କମ୍ରେ ଏଠାରେ ସତେଜ ଦେଶୀ ମାଛ ମିଳୁଥିବାରୁ ଆମିଷପ୍ରେମୀମାନେ ସକାଳ ହେଲେ ଏଠାକୁ ଧାଇଁଆସନ୍ତି ।
ପ୍ରଥମେ ରାଜ୍ୟ ସରକାର ଚିଲିକା ଫ୍ରେସର ପରିଚାଳନା ଦାୟିତ୍ୱରେ ଥିଲେ । ହେଲେ ପରବର୍ତ୍ତୀ ସମୟରେ ୯୦ ପ୍ରତିଶତ ଆଉଟଲେଟ୍ ପିପିପି ମୋଡ୍ରେ ଚାଲିଛି । ପିପିପି ମୋଡ୍ରେ ଚାଲୁଥିବା ଆଉଟଲେଟ୍ରେ ଉଭୟ ମଧୁର ଓ ସାମୁଦ୍ରିକ ମାଛ ମିଳୁଛି । କେବଳ ଶିରିପୁର, ସହିଦନଗର ଓ ସିଆରପିକୁ ଛାଡ଼ିଦେଲେ ଆଉ ସମସ୍ତ ଆଉଟଲେଟ୍ ପିପିପି ମୋଡ୍ରେ ଚାଲିଛି । ଏବେ ଝାରପଡ଼ା, ଜଗମୋହନ ନଗର, ଭିଏସ୍ଏସ୍ ନଗର, ମଞ୍ଚେଶ୍ୱର ଆଦିମାତା କଲୋନୀ, ପାତ୍ରପଡ଼ା ଓ ଡୁମଡୁମା ଆଦି ସ୍ଥାନରେ ଥିବା ଚିଲିକା ଫ୍ରେସ ଆଉଟଲେଟ୍ ଗୁଡ଼ିକରେ ତାଲା ଝୁଲୁଛି । ଫଳରେ ଯେଉଁ ଲକ୍ଷ୍ୟ ରଖି ରାଜ୍ୟ ସରକାର ଚିଲିକା ଫ୍ରେସ୍ ଆରମ୍ଭ କରିଥିଲେ ତାହା ବର୍ତ୍ତମାନ ଦିଗହରା । ସେପଟେ ଚିଲିକା ଫ୍ରେସ ଦାୟିତ୍ୱରେ ଥିବା ଫିସଫେଡ୍ ମଧ୍ୟ ଏଦିଗରେ କୌଣସି ପଦକ୍ଷେପ ଗ୍ରହଣ କରୁନି । ଯେଉଁ ହାତଗଣତୀ ଆଉଟଲେଟ୍ ଚାଲିଛି ତାହାର ଆନୁସଙ୍ଗିକ ବିକାଶ ପାଇଁ କେହି ଚିନ୍ତା କରୁନାହାନ୍ତି । ଏନେଇ ନିଖିଳ ଆମିଷ ବ୍ୟବସାୟୀ ମହାସଂଘର ରାଜ୍ୟ ସଭାପତି ଶେଖ୍ ମୁନ୍ତାକିମ୍ ବକ୍ସ କହିଛନ୍ତି, ଚିଲିକା ଫ୍ରେସ୍ ଏକ ବିଫଳ ଯୋଜନା । ଯଦି ଘରୋଇ ସଂସ୍ଥା ହାତକୁ ଟେକି ଦିଆନଯାଇ ପଞ୍ଜିକୃତ ଆମିଷ ବ୍ୟବସାୟୀଙ୍କୁ ସେଠାରେ ଥଇଥାନ କରାଯାଇଥାନ୍ତା ତେବେ ବ୍ୟବସ୍ଥିତ ବେପାର ହୋଇଥାନ୍ତା ।
