ନୂଆଦିଲ୍ଲୀ: ଅରୁଣାଚଳ ପ୍ରଦେଶର ତଓ୍ବାଙ୍ଗରେ ଥିବା ଏକ ପର୍ବତ ଶିଖରକୁ ଷଷ୍ଠ ଦଲାଇ ଲାମାଙ୍କ ନାମାନୁସାରେ ନାମିତ କରିଛନ୍ତି ଭାରତୀୟ ପର୍ବତାରୋହୀ । ଆଉ ଏହାକୁ ନେଇ ଚିହିଁକି ଉଠିଛି ଚୀନ୍ । ଏହାକୁ ‘ଚୀନ୍ ଅଞ୍ଚଳ’ରେ ଅନୁପ୍ରବେଶ ବୋଲି ଦର୍ଶାଇଛି ଡ୍ରାଗନ । ଦିରାଙ୍ଗରେ ଥିବା ରାଷ୍ଟ୍ରୀୟ ପର୍ବତାରୋହଣ ଏବଂ ସାହସିକ କ୍ରୀଡ଼ା ପ୍ରତିଷ୍ଠାନ (NIAMS)ର ୧୫ ଜଣ ପର୍ବତାରୋହୀଙ୍କ ଏକ ଦଳ ସଫଳତାର ସହ ପର୍ବତ ଶିଖରରେ ପହଞ୍ଚିଥିଲେ ।
NIAMS ପ୍ରତିରକ୍ଷା ମନ୍ତ୍ରାଳୟ ଅଧୀନରେ ରହିଛି । ସେଠାରେ ପହଞ୍ଚିବା ପରେ ତଓ୍ବାଙ୍ଗରେ ଜନ୍ମଗ୍ରହଣ କରିଥିବା ଷଷ୍ଠ ଦଲାଇ ଲାମା, ତ୍ୟାଙ୍ଗୟାଙ୍ଗ ଗ୍ୟାତ୍ସୋଙ୍କ ସମ୍ମାନରେ ଏହାର ନାମ ‘ତ୍ୟାଙ୍ଗୟାଙ୍ଗ ଗ୍ୟାତ୍ସୋ ଶିଖର’ ବୋଲି ରଖିଥିଲେ । କିନ୍ତୁ ଏଥିରେ ଚୀନ ଉତକ୍ଷିପ୍ତ ହୋଇଉଠିଛି । ପୂର୍ବ ଲଦାଖରେ ଥିବା ପ୍ରକୃତ ନିୟନ୍ତ୍ରଣ ରେଖା (ଏଲଏସି)ରେ ସୈନିକଙ୍କୁ ପଛକୁ ହଟାଇବା ଲାଗି ଭାରତ ଏବଂ ଚୀନ୍ ମଧ୍ୟରେ ହୋଇଥିବା ଆଲୋଚନା କେତେକାଂଶରେ ସଫଳ ହୋଇଥିବା ବେଳେ ଅରୁଣାଚଳ ପ୍ରଦେଶରେ ପୁଣି ଥରେ ଚୀନ୍ ବିସ୍ତାରବାଦୀ ନୀତି ଆପଣାଇଛି ।
ଅରୁଣାଚଳର ଅଜ୍ଞାତ ପର୍ବତ ଶିଖରକୁ ଦଲାଇ ଲାମାଙ୍କ ନାମାନୁସାରେ ନାମିତ କରାଯିବାକୁ ନେଇ ଚୀନ ବୈଦେଶିକ ମନ୍ତ୍ରାଳୟର ମୁଖପାତ୍ର ଲିନ୍ ଜିୟାନ୍ ଅସନ୍ତୋଷ ପ୍ରକାଶ କରିଛନ୍ତି । ବେଜିଂରେ ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି, ଚୀନ୍ ଅଞ୍ଚଳରେ ଭାରତର ତଥାକଥିତ ‘ଅରୁଣାଚଳ ପ୍ରଦେଶ’ ପ୍ରତିଷ୍ଠା କରିବା ଅବୈଧ ଏବଂ ନିରର୍ଥକ । ତେବେ ଚୀନ୍ ଅରୁଣାଚଳ ପ୍ରଦେଶକୁ ‘ଜାଙ୍ଗନାନ୍’ ବୋଲି ନାମିତ କରିବା ସହ ଏହାକୁ ନିଜର ଅଞ୍ଚଳ ବୋଲି ଦାବି କରିଆସିଛି ।
ଅନ୍ୟପଟେ ପର୍ବତ ଶିଖରକୁ ଷଷ୍ଠ ଦଲାଇ ଲାମାଙ୍କ ନାମରେ ନାମିତ କରିବାକୁ ନେଇ ଏକ ବିଜ୍ଞପ୍ତି ପ୍ରକାଶ କରିଛି ଭାରତର ପ୍ରତିରକ୍ଷା ମନ୍ତ୍ରାଳୟ । ମନ୍ତ୍ରାଳୟ ଅନୁସାରେ, ଦଲାଇ ଲାମାଙ୍କ ଅଦମ୍ୟ ବୁଦ୍ଧିମତା ଏବଂ ମୋନପା ସମୁଦାୟଙ୍କ ଲାଗି ତାଙ୍କର ଅବଦାନକୁ ସମ୍ମାନ ଜଣାଇ ପର୍ବତ ଶିଖରର ନାଁ ତାଙ୍କ ନାମରେ ନାମିତ ହୋଇଛି । ଏମିତି ଲାଗୁଛି ଏହି କଥା କେତେକଙ୍କୁ ବିଚଳିତ କରିଛି । ଏହା ସହ ଅରୁଣାଚଳ ପ୍ରଦେଶକୁ ନେଇ ଚୀନର ଦାବିକୁ ଖଣ୍ଡନ କରିଛି ଭାରତ ।
