ଭୁବନେଶ୍ୱର,୨୮/୦୩: ଆଗୁଆ ପ୍ରାର୍ଥୀ ଘୋଷଣା କରିବୁ । ଗତ କିଛି ମାସ ହେବ ଏମିତି ଦମ୍ଭୋକ୍ତି ବାଢ଼ୁଥିଲା ରାଜ୍ୟ କଂଗ୍ରେସ । ଟିକେଟ୍ କସରତ ବି ଚଳାଇଥିଲା ଢେର ଆଗୁଆ । ପ୍ରଥମ ଥର ପାଇଁ ଅନଲାଇନ ଟିକଟ ଆବେଦନ ପୋର୍ଟାଲ ବି ଖୋଲିଲେ । କହିଲେ, ହଜାର ହଜାର ଆବେଦନ ପଡ଼ିଛି । ହେଲେ ଫୁସ୍... । ଏଯାଏଁ କିଛି ନାହିଁ । ଜଣେ ପ୍ରାର୍ଥୀଙ୍କ ନାଁ ବି ଘୋଷଣା କରିପାରିନି କଂଗ୍ରେସ । ନିର୍ବାଚନ ବିଗୁଲ୍ ବାଜି ସାରିଲାଣି ।
ପ୍ରତିଦିନ ବିଜେଡିର ନିର୍ବାଚନମଣ୍ଡଳୀ ସମୀକ୍ଷା ବସୁଛି ନବୀନ ନିବାସରେ । ବୁଧବାର ବିଜେଡି ୭୨ ବିଧାନସଭା ଓ ୧୫ ଲୋକସଭା ପାଇଁ ପ୍ରାର୍ଥୀ ଘୋଷଣା କରିଦେଲା । ବିଜେପି ବି ୩ ଦିନ ତଳୁ ୧୮ଟି ସଂସଦୀୟ କ୍ଷେତ୍ର ପାଇଁ ପ୍ରାର୍ଥୀ ତାଲିକା ଜାରି କରି ସାରିଛି ଓଡ଼ିଶାରେ । ମାତ୍ର କୁଆଡ଼େ ଗଲା କଂଗ୍ରେସ ଟିକେଟ୍ ? ଟିକେଟ୍ ଘୋଷଣା ହେଉନି । ଅନ୍ୟପଟେ ନେତାମାନେ ଦଳ ଛାଡ଼ି ଚାଲିଛନ୍ତି । ଆଗକୁ ବି କିଛି ନେତା ଦଳ ଛାଡ଼ିବା ନେଇ ଚର୍ଚ୍ଚା ଜାରି ରହିଛି । ଏମିତିରେ ଦଳ ଟିକେଟ୍ କେବେ ଘୋଷଣା କରିବ, ତାହା ଏଯାଏଁ ସ୍ପଷ୍ଟ ହୋଇପାରିନି । ଦଳର ଫୋକସ ମୁଖ୍ୟତଃ ୪୦ଟି ବିଧାନସଭା ଉପରେ ରହିଛି । ଅନ୍ତତଃ ସେତିକି ଆସନରେ ବି ଦଳ ଟିକଟ ଘୋଷଣା ବିଳମ୍ବ କରିବା ଆଶାୟୀ ଓ କର୍ମୀଙ୍କ ଚିନ୍ତା ବଢ଼ାଇ ଚାଲିଛି । ସଂଗଠନ ଦୁର୍ବଳ ଥିବାରୁ ବିଳମ୍ବରେ ଟିକେଟ୍ ପାଇଲେ ପ୍ରାର୍ଥୀ ସଂଗଠନ ସଜାଡ଼ି ଲୋକଙ୍କ ପାଖକୁ ଯିବାକୁ ସମୟ ପାଇବେନି ବୋଲି ବହୁ ନେତା କହୁଛନ୍ତି ।
