ବାଲେଶ୍ୱର, ୨୧/୦୯ : ବାଲେଶ୍ୱର ଜିଲ୍ଲା ଗ୍ରାମ୍ୟ ନିର୍ମାଣ ମଣ୍ଡଳ କାର୍ଯ୍ୟାଳୟର ମୁଖ୍ୟ ନିର୍ମାଣ ଯନ୍ତ୍ରୀ ଏନ୍ଭି ହରିହର ରାଓ ଗିରଫ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ତାଙ୍କୁ ଗିରଫ କରାଯାଇଛି। ଏନ୍ଭି ହରିହର ରାଓ କୋଟି କୋଟି ଟଙ୍କାର ବେନାମୀ ସମ୍ପତ୍ତି ଠୁଳ କରିଛନ୍ତି। ଏହି ସରକାରୀ ବାବୁଙ୍କର ବ୍ରହ୍ମପୁରର ଭବାନୀପୁରରେ ୨୧୦୦ ବର୍ଗଫୁଟରେ ୨ ମହଲା କୋଠା, ବ୍ରହ୍ମପୁର କମାପଲ୍ଲୀ ବୈଦ୍ୟନାଥପୁରରେ ସ୍ପେକ୍ଟ୍ରମ ଗ୍ରୀନ୍ ଆପାର୍ଟମେଣ୍ଟର ୩ ବିଏଚ୍କେ ଫ୍ଲାଟ୍, ଭୁବନେଶ୍ୱରର ପାତ୍ରପଡ଼ାରେ ଥିବା ୩ ହଜାର ବର୍ଗଫୁଟରେ ନିର୍ମିତ ଏକ ମହଲା କୋଠା ରହିଛି।
ଶୁକ୍ରବାର ସକାଳୁ ଭିଜିଲାନ୍ସ ଅଦାଲତଙ୍କ ନିର୍ଦ୍ଦେଶକ୍ରମେ ୧୧ ଡିଏସ୍ପି, ୭ ଇନ୍ସପେକ୍ଟର, ୧୧ ଏଏସ୍ଆଇଙ୍କ ନେତୃତ୍ୱରେ ଏନ୍ଭି ହରିହର ରାଓଙ୍କ ୧୧ଟି ଠିକଣାରେ ଏକକାଳୀନ ଚଢ଼ାଉ ହୋଇଥିଲା। ଚଢାଉ ବେଳେ ତାଙ୍କ ନାମରେ ବହୁ ବେନାମୀ ସମ୍ପତ୍ତି ଠାବ ହୋଇଥିଲା। ଶ୍ରୀ ରାଓଙ୍କ ଶାଳକଙ୍କ ଘରୁ ନଗଦ ୪୬.୪୫ଲକ୍ଷ ଟଙ୍କା ମିଳିଥିଲା। ଯାହାକି ଏନଭି ରାଓଙ୍କର ବୋଲି ଅନୁମାନ କରାଯାଉଛି। କେବଳ ସେତିକି ନୁହେଁ ସେ ୫ଟି ଦାମୀ ଜମି କିଣିଥିଲେ । ସେଥିରୁ ଭୁବନେଶ୍ୱରରେ ୩ଟି, ବ୍ରହ୍ମପୁର ଓ ଗଞ୍ଜାମ ଜିଲ୍ଲାର ବଡଗୁମୁଳାରେ ଗୋଟିଏ ଲେଖାଏଁ ଜମି ଶ୍ରୀ ରାଓଙ୍କ ନାମରେ ଅଛି।
ଏନ୍ଭି ରାଓ ପ୍ରାୟ ୨.୧୦ କୋଟି ଟଙ୍କାର ବ୍ୟାଙ୍କ ଓ ଇନ୍ସୁରାନ୍ସ ଆକାରରେ ଜମା କରିଛନ୍ତି। ମୋଟ ୧. ୧୧ କୋଟି ଟଙ୍କା ସେ ମ୍ୟୁଚୁଆଲ୍ ଫଣ୍ଡ ଓ ଷ୍ଟକ ମାକେର୍ଟରେ ନିବେଶ କରିଛନ୍ତି । ଅଧ କେଜି ସୁନା ଓ ୩୦୦ ଗ୍ରାମର ରୁପା ଅଳଙ୍କାର ମଧ୍ୟ ଗଚ୍ଛିତ ରଖିଛନ୍ତି । ତାଙ୍କର ଗୋଟିଏ ଲେଖାଏଁ କାର, ବାଇକ୍ ଥିବା ଭିଜିଲାନ୍ସ ପକ୍ଷରୁ ସୂଚନା ମିଳିଛି । ବ୍ରହ୍ମପୁର ଷ୍ଟେଟ ବ୍ୟାଙ୍କ ଶାଖାରେ ଏନ୍ଭି ରାଓଙ୍କ ପତ୍ନୀଙ୍କ ନାଁରେ ଥିବା ଲକର ଖୋଲା ହେଲେ ସମ୍ପତ୍ତି ତାଲିକା ବଢ଼ିପାରେ ବୋଲି ଅନୁମାନ କରାଯାଉଛି।
