ନୂଆଦିଲ୍ଲୀ,୨୭/୦୫: ବଙ୍ଗୋପସାଗରରେ ଆସିଥିବା ଭୀଷଣ ସାମୁଦ୍ରିକ ବାତ୍ୟା ‘ରେମାଲ’ ପଶ୍ଚିମବଙ୍ଗର ସାଗରଦ୍ୱୀପ ଓ ବାଂଲାଦେଶର ଖେପୁପଡା ମଧ୍ୟବର୍ତ୍ତୀ ଉପକୂଳରେ ଲ୍ୟାଣ୍ଡଫଲ କରିଛି । ରାତି ୮ଟା ୩୦ରେ ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହୋଇଥିଲା । ପ୍ରାୟ ୪ ଘଣ୍ଟା ଧରି ଅର୍ଥାତ ରାତି ୧୨ଟା ୩୦ ପର୍ଯ୍ୟନ୍ତ ଉପକୂଳରେ ଏହା ତାଣ୍ଡବ ସୃଷ୍ଟି କରିଥିଲା । ଲ୍ୟାଣ୍ଡଫଲ ସମୟରେ ପବନର ବେଗ ଘଣ୍ଟାପ୍ରତି ୯୦ କି.ମି. ଥିଲା । ପରବର୍ତ୍ତୀ ସମୟରେ ପବନର ବେଗ ଘଣ୍ଟା ପ୍ରତି ୧୧୦ରୁ ୧୨୦ ଓ ସ୍ଥଳ ବିଶେଷରେ ୧୩୫ ରହିଥିଲା । ଫଳରେ ଉପକୂଳରେ ବ୍ୟାପକ କ୍ଷୟକ୍ଷତି ଘଟିଛି ।
ବାତ୍ୟା ମୁକାବିଲା ପାଇଁ ବାଂଲାଦେଶ ସରକାର ବ୍ୟାପକ ପଦକ୍ଷେପ ଗ୍ରହଣ କରିଥିଲେ । ବାଂଲାଦେଶର ୧୯ଟି ଉପକୂଳବର୍ତ୍ତୀ ଜିଲ୍ଲା ପ୍ରଭାବିତ ହେବାର ଆଶଙ୍କା କରି ଏସବୁ ଜିଲ୍ଲାର ଉପକୂଳ ଅଞ୍ଚଳରୁ ପ୍ରାୟ ୮ ଲକ୍ଷରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି । ସେମାନଙ୍କୁ ନିକଟସ୍ଥ ଆଶ୍ରୟ ସ୍ଥଳୀରେ ରଖାଯାଇଛି । ସେମାନଙ୍କ ଲାଗି ୮,୪୬୪ଟି ଆଶ୍ରୟସ୍ଥଳୀ ଖୋଲାଯାଇଛି । ଏଥିସହ ୧,୧୮୫ଟି ଡାକ୍ତରୀ ଟିମ ଓ ୭୮ ହଜାର ସ୍ୱେଚ୍ଛାସେବୀଙ୍କୁ ପ୍ରସ୍ତୁତ କରି ରଖାଯାଇଛି । ସତଖିରା ଓ କକ୍ସବଜାର ଉପକୂଳରେ ୮-୧୨ ଫୁଟ ଉଚ୍ଚର ସମୁଦ୍ର ଜୁଆର ଆସିବାର ସମ୍ଭାବନା ଥିବାରୁ ଲୋକଙ୍କୁ ସତର୍କ କରାଇ ଦିଆଯାଇଛି । ପାୟରା ଓ ମୋଙ୍ଗଳା ବିମାନବନ୍ଦରରେ ୧୦ ଏବଂ ଚଟୋଗ୍ରାମ ଓ କକ୍ସବଜାର ବନ୍ଦରରେ ୯ ନମ୍ବର ବିପଦ ସଙ୍କେତ ଲଗାଇ ଦିଆଯାଇଛି । ଏସବୁ ବନ୍ଦରରେ ସମସ୍ତ କାର୍ଯ୍ୟ ବନ୍ଦ କରିଦିଆଯାଇଛି ।
ଚିଟାଗଙ୍ଗ ଓ କକ୍ସବଜାର ବିମାନବନ୍ଦର ଠାରେ ବିମାନ ସେବାକୁ ବନ୍ଦ କରିଦିଆଯାଇଛି । ମୋଙ୍ଗଳା ବନ୍ଦର ନିକଟରେ ୫୦ ଯାତ୍ରୀଙ୍କୁ ନେଇ ଆସୁଥିବା ଏକ ବୋଟ ବୁଡିଯାଇଛି । ତେବେ ଅନ୍ୟ ବୋଟର କର୍ମଚାରୀ ସେମାନଙ୍କୁ ଉଦ୍ଧାର କରିଥିଲେ । ଏହି ଘଟଣାରେ ୧୩ ଯାତ୍ରୀ ଆହତ ହୋଇଛନ୍ତି ପଶ୍ଚିମବଙ୍ଗ ସରକାର ମଧ୍ୟ ବାତ୍ୟା ମୁକାବିଲା ସ୍ୱରୂପ ସୁନ୍ଦରବନ ଓ ସାଗରଦ୍ୱୀପର ଉପକୂଳରୁ ୧ ଲକ୍ଷ ୧୦ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଛନ୍ତି । କୋଲକାତା ବିମାନବନ୍ଦରରେ ରବିବାର ପୂର୍ବାହ୍ନରୁ ୨୧ ଘଣ୍ଟା ପର୍ଯ୍ୟନ୍ତ ବିମାନସେବା ବନ୍ଦ କରାଯାଇଛି । ଫଳରେ ୩୯୪ଟି ଘରୋଇ ଓ ଆନ୍ତର୍ଜାତିକ ବିମାନ ଚଳାଚଳ ପ୍ରଭାବିତ ହୋଇଛି । ରାଜ୍ୟର ଉପକୂଳବର୍ତ୍ତୀ ଜିଲ୍ଲାରେ ୧୪ଟି ଏନ୍ଡିଆରଏଫ୍ ଟିମକୁ ମୁତୟନ କରାଯାଇଛି । ସାଲିମାର ରେଳ ଷ୍ଟେସନରେ କେତେକ ଟ୍ରେନକୁ ଟ୍ରାକ୍ରେ ଚେନ୍ ସହିତ ତାଲା ପକାଇ ରଖାଯାଇଛି । ବାତ୍ୟା ଯୋଗୁ ଟ୍ରେନ ଟ୍ରାକରୁ ଖସିଯିବା କିମ୍ବା ଗଡିଯିବାର ଆଶଙ୍କା କରି ଏଭଳି କରାଯାଇଛି । ସୁନ୍ଦରବନ ଅଞ୍ଚଳରେ କଣ୍ଟ୍ରୋଲ ରୁମ୍ ଖୋଲାଯାଇଛି । ଭାରତୀୟ ନୌସେନା ପକ୍ଷରୁ ରିଲିଫ ଓ ଉଦ୍ଧାର କାର୍ଯ୍ୟ ପାଇଁ ପ୍ରସ୍ତୁତି କରାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନୂଆଦିଲ୍ଲୀରେ ସମ୍ଭାବ୍ୟ ବାତ୍ୟାର ମୁକାବିଲା ନେଇ ଏକ ଜରୁରି ବୈଠକ କରିଛନ୍ତି।