ବିଞ୍ଝାରପୁର, ୦୬/୦୯ : ବିଞ୍ଝାରପୁର ପୋଲିସ ଉପରକୁ ମରଣାନ୍ତକ ଆକ୍ରମଣ। ଯୁବକଙ୍କ କଟୁରୀ ଚୋଟରେ ୨ ପୋଲିସ କର୍ମଚାରୀ ଗୁରୁତର ହୋଇଛନ୍ତି। ଗୁରୁତରଙ୍କୁ ପୋଲିସ ଉଦ୍ଧାର କରି ବିଞ୍ଝାରପୁର ଗୋଷ୍ଠି ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛି। ଆକ୍ରମଣ କରିଥିବା ଯୁବକଙ୍କୁ ଧରିବା ପାଇଁ ପୋଲିସ ଚେଷ୍ଟା ଚଳାଇଛି।

ସୂଚନାନୁଯାୟୀ, ବିଞ୍ଝାରପୁର ପଞ୍ଚାୟତ ୯ ନମ୍ବର ୱାର୍ଡ ବଳରାମ ରାଉଳଙ୍କ ପୁଅ ଦୀପ୍ତି ନାରାୟଣ ରାଉଳ କୌଣସି କାରଣ ପାଇଁ ନିଜ ଘରେ ପାଟିତୁଣ୍ଡ କରୁଥିଲେ। ପରିବାର ଲୋକେ ଏନେଇ ବିଞ୍ଝାରପୁର ପୋଲିସକୁ ଜଣାଇଥିଲେ। ଖବର ପାଇ ୧୧୨ ପାଟ୍ରୋଲିଂ ଗାଡି ତାଙ୍କ ଘର ପାଖରେ ପହଁଚିବା କ୍ଷଣି ଉତ୍ତ୍ୟକ୍ତ ଯୁବକ ପୋଲିସ କର୍ମଚାରୀଙ୍କ ଉପରକୁ ଅତର୍କିତ ଆକ୍ରମଣ କରିଥିଲେ। ଦୀପ୍ତି ନାରାୟଣଙ୍କ କଟୁରୀ ଚୋଟରେ ଦୁଇ ଜଣ ପୋଲିସ କର୍ମଚାରୀ ସନ୍ଦୀପ କୁମାର ସାହୁ ଓ ୧୧୨ ଗାଡିର ଡ୍ରାଇଭର ପ୍ରଦିପ ସାମଲ ଗୁରୁତର ହୋଇଛନ୍ତି। ଗୁରୁତରଙ୍କୁ ପୋଲିସ ଉଦ୍ଧାର କରି ବିଞ୍ଝାରପୁର ଗୋଷ୍ଠି ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛି। ଏହା ସହ ଅଭିଯୁକ୍ତକୁ ଧରିବା ପାଇଁ ଚେଷ୍ଟା ଚଳାଇଛି।