ନୂଆଦିଲ୍ଲୀ, ୧୦/୦୯: ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ (ହାଲ୍)ରୁ କିଣାଯିବ ୨୬ ହଜାର କୋଟି ଟଙ୍କାର ଲଢ଼ୁଆ ବିମାନ ଇଞ୍ଜିନ । ପ୍ରତିରକ୍ଷା ସମ୍ପର୍କିତ କ୍ୟାବିନେଟ କମିଟି ଏହି ପ୍ରସ୍ତାବକୁ ମଞ୍ଜୁରୀ ପ୍ରଦାନ କରିଛି । ବାୟୁସେନାର ଏସ୍ୟୁ ୩୦ ଏମ୍କେଆଇ ଏୟାରକ୍ରାଫ୍ଟ ପାଇଁ ୨୪୦ ଏଏଲ୍-୩୧ ଏଫ୍ପି ଏରୋ ଇଞ୍ଜିନ ଲାଗି ପ୍ରତିରକ୍ଷା ମନ୍ତ୍ରଣାଳୟ ହାଲ୍ସହ ୨୬ ହଜାର କୋଟିର ଚୁକ୍ତି ସ୍ୱାକ୍ଷର କରିଛି । ଏହା ଦ୍ୱାରା ଆତ୍ମ ନିର୍ଭର ଭାରତ ଲକ୍ଷ୍ୟକୁ ପ୍ରୋତ୍ସାହନ ମିଳିବ ।
ନୂଆଦିଲ୍ଲୀରେ ପ୍ରତିରକ୍ଷା ସଚିବ ଗିରିଧର ଅର୍ମାନେ ଏବଂ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶାଲ ଭିଆର୍ ଚୌଧୁରୀଙ୍କ ଉପସ୍ଥିତିରେ ମନ୍ତ୍ରଣାଳୟ ଏବଂ ହାଲ୍ର ବରିଷ୍ଠ ଅଧିକାରୀମାନେ ଏହି ଚୁକ୍ତି ସ୍ୱାକ୍ଷରିତ କରିଥିଲେ । ଏହି ଏରୋ ଇଞ୍ଜିନ ଗୁଡିକ ହାଲ୍ର କୋରାପୁଟ ଡିଭିଜନ ଦ୍ୱାରା ନିର୍ମିତ ହେବ ।
ଦେଶର ପ୍ରତିରକ୍ଷା ପ୍ରସ୍ତୁତି ଲାଗି ଏସ୍ୟୁ ୩୦ ଫ୍ଲିଟ୍ର ପରିଚାଳନା କ୍ଷମତା ବଜାୟ ରଖିବା ଲାଗି ଭାରତୀୟ ବାୟୁସେନାର ଆବଶ୍ୟକତା ପୂରଣ କରିବ ବୋଲି ଆଶା କରାଯାଉଛି । ଚୁକ୍ତି ଭିତ୍ତିକ ହସ୍ତାନ୍ତର ଅନୁଯାୟୀ ହାଲ୍ ବାର୍ଷିକ ୩୦ଟି ଏରୋ ଇଞ୍ଜିନ ଯୋଗାଇବ । ଆଗାମୀ ୮ ବର୍ଷରେ ମୋଟ ୨୪୦ଟି ଇଞ୍ଜିନର ଯୋଗାଣ ହେବ ।
ଉତ୍ପାଦନ ସମୟରେ ଏମ୍ଏସ୍ଏମ୍ଇ, ରାଷ୍ଟ୍ରାୟତ୍ତ ଏବଂ ଘରୋଇ ଉଦ୍ୟୋଗ ଗୁଡିକୁ ସାମିଲ କରି ଦେଶର ପ୍ରତିରକ୍ଷା ଉତ୍ପାଦନ ଇକୋସିଷ୍ଟମର ସହାୟତା ନେବାକୁ ହାଲ୍ ଲକ୍ଷ୍ୟ ରଖିଛି । ହସ୍ତାନ୍ତର କାର୍ଯ୍ୟକ୍ରମ ଶେଷ ସୁଦ୍ଧା ହାଲ୍ ୫୪%ରୁ ଅଧିକ ହାରାହାରି ଲକ୍ଷ୍ୟ ହାସଲ କରିବା ଲାଗି ସ୍ୱଦେଶୀକରଣ ପରିମାଣକୁ ୬୩%କୁ ବୃଦ୍ଧି କରିବ । ଏହି ଏରୋ ଇଞ୍ଜିନର ମରାମତି ଏବଂ ଓଭରହୋଲ କାର୍ଯ୍ୟରେ ସ୍ୱଦେଶର ଉତ୍ପାଦନକୁ ବୃଦ୍ଧି କରିବାରେ ମଧ୍ୟ ସହାଯ୍ୟ କରିବ ।
ଘରୋଇ ବଜାରର ଉତ୍ପାଦ କିଣାକୁ ପ୍ରାଥମିକତା ପ୍ରଦାନ କରି ଏଭଳି ପଦକ୍ଷେପ ଗ୍ରହଣ କରିଛନ୍ତି ସରକାର । ଗୋଟିଏ ବର୍ଷ ପରେ ଏହି ଇଞ୍ଜିନ ଗୁଡିକର ଡେଲିଭରି ଆରମ୍ଭ ହୋଇଯିବ । ଏହି ଇଞ୍ଜିନ ଗୁଡିକରେ ୫୪% ସ୍ୱଦେଶୀ ସାମଗ୍ରୀ ବ୍ୟବହାର କରାଯିବ । ଏସ୍ୟୁ ୩୦ ଏମ୍କେଆଇ ହେଉଛି ବାୟୁସେନାର ସବୁଠାରୁ ଶକ୍ତିଶାଳୀ ଏବଂ ଗୁରୁତ୍ୱପୂର୍ଣ୍ଣ ଲଢ଼ୁଆ ବିମାନ । ହାଲ୍ ଏହି ବିମାନ ଲାଗି ଇଞ୍ଜିନ ଯୋଗାଣ କରିବାକୁ ଥିବାରୁ ଏହା ଦେଶର ଗୁରୁତ୍ୱପୂର୍ଣ୍ଣ ପ୍ରସ୍ତୁତିକୁ ଦର୍ଶାଉଛି ।
