ସହାରନପୁର – ଦିଲ୍ଲୀରୁ ସହାରନପୁର ମଧ୍ୟରେ ଚାଲୁଥିବା ମେମୁ ଟ୍ରେନ୍‌ ରବିବାର ଦିନ ଲାଇନଚ୍ୟୁତ ହୋଇଛି। ଟ୍ରେନ୍‌ ଲାଇନଚ୍ୟୁତ୍‌ ହେବାର ସୂଚନା ମିଳିବା କ୍ଷଣି ରେଲୱେ ଅଧିକାରୀଙ୍କ ମଧ୍ୟରେ ତତ୍ପରତା ଖେଳି ଯାଇଛି। ତୁରନ୍ତ ଅଧିକାରୀମାନେ ଘଟଣା ସ୍ଥଳରେ ପହଞ୍ଚି ନିରୀକ୍ଷଣ କରିଛନ୍ତି। ଟ୍ରେନ୍‌ରେ କିନ୍ତୁ କେହି ଯାତ୍ରୀ ନଥିଲେ।

ରବିବାର ଦ୍ୱିପ୍ରହର ୧.୩୦ ରୁ ୨ଟା ସମୟ ମଧ୍ୟରେ ଦିଲ୍ଲୀରୁ ସହାରନପୁର ଅଭିମୁଖେ ଯାଉଥିଲା ଟ୍ରେନ୍‌। ଟ୍ରେନ୍‌ଟି (ନମ୍ୱର ୦୧୬୧୯) ୱାଂଶିଙ୍ଗ ଲାଇନ୍‌ ଦେଇ ଯାଉଥିବା ବେଳେ ଟ୍ରାକ୍‌ରୁ ବାହାରି ଯାଇଥିଲା। ରବିବାର ଟ୍ରେନ୍‌ଟି ନିଜର ନିର୍ଦ୍ଧାରିତ ସମୟର ପାଖାପାଖି ଦେଢ ଘଣ୍ଟା ବିଳମ୍ୱରେ ସହାରନପୁର ଷ୍ଟେସନରେ ପହଞ୍ଚି ଥିଲା। ଟ୍ରେନ୍‌ର ସହାରନପୁରରେ ପହଞ୍ଚିବାର ସମୟ ଥିଲା ସକାଳ ୧୦.୫୫ ।

ହେଲେ ଟ୍ରେନ୍‌ ଦ୍ୱିପ୍ରହର ସମୟ ୧୨.୨୬ରେ ସହାରନପୁରରେ ପହଞ୍ଚି ଥିଲା। ଟ୍ରେନ୍‌କୁ ୱାଶିଙ୍ଗ ଲାଇନ୍‌କୁ ନିଆ ଯାଉଥିଲା। ଯେମିତି ଟ୍ରେନ୍‌ ଶାରଦା ନଗର ବ୍ରିଜ୍‌ ତଳେ ପହଞ୍ଚିଲା, ତାହା ଟ୍ରାକ୍‌ରୁ ବାହାରି ଗଲା। ଟ୍ରାକ୍‌ରୁ ବାହାରିବା କ୍ଷଣି ଖୁବ୍‌ ଜୋରରେ ଶବ୍ଦ ହେଲା। ଏହାପରେ ଆଖପାଖର ଲୋକେ ମଧ୍ୟ ଘଟଣା ସ୍ଥଳରେ ପହଞ୍ଚି ଥିଲେ। ଲୋକ ପାଇଲଟ ଦୁର୍ଘଟଣାର ଖବର କଣ୍ଟ୍ରୋଲ ରୁମକୁ ଦେଲେ। କଣ୍ଟ୍ରୋଲ ରୁମ୍‌କୁ ସୂଚନା ମିଳିବା ପରେ ତୁରନ୍ତ ରେଲୱେ ଅଧିକାରୀ ଟେକ୍ନିକାଲ ଟିମ୍‌ ସହ ଘଟଣା ସ୍ଥଳରେ ପହଞ୍ଚି ଥିଲେ। 

ଏହାପରେ ରେଲୱେ ଅଧିକାରୀ ଓ କର୍ମଚାରୀମାନେ ମିଶି ଟ୍ରେନକୁ ଟ୍ରାକ୍‌କୁ ଆଣିବାକୁ ଚେଷ୍ଟା କରିଥିଲେ। ଜ୍ୟାକ୍‌ ଦ୍ୱାରା ଟ୍ରେନ୍‌କୁ ଉଠାଇ ଟ୍ରାକ୍‌କୁ ଅଣାଗଲା। ପାଖାପାଖି ସମୟ ୫ଟାରେ ଟ୍ରେନ୍‌କୁ ପୁଣି ଟ୍ରାକ୍‌କୁ ଅଣାଗଲା। ଟ୍ରେନ୍‌ଟି ମେନ୍‌ ଲାଇନ୍‌ରେ ନଥିବାରୁ ରେଳ ସଞ୍ଚାଳନ ଉପରେ ଏହାର କୌଣସି ପ୍ରଭାବ ପଡି ନଥିଲା।