ନୂଆଦିଲ୍ଲୀ,୨୯/୦୮: ଆମେରିକାର ରାଷ୍ଟ୍ରପତି ନିର୍ବାଚନ ପୂର୍ବରୁ ରାଷ୍ଟ୍ରପତି ପ୍ରାର୍ଥୀ ଡୋନାଲ୍ଡ ଟ୍ରମ୍ପ ମେଟା ସିଇଓ ମାର୍କ ଜୁକରବର୍ଗଙ୍କୁ ଟାର୍ଗେଟ କରିଛନ୍ତି। ୨୦୨୦ ନିର୍ବାଚନ ସମୟରେ ଜୁକରବର୍ଗ ଷଡ଼ଯନ୍ତ୍ର କରିଥିବା ଟ୍ରମ୍ପ ଅଭିଯୋଗ କରିଛନ୍ତି। ଟ୍ରମ୍ପ କହିଛନ୍ତି ଯେ ଯଦି ସେ ୨୦୨୪ ନିର୍ବାଚନରେ ହେରଫେର କରିବାକୁ ଚେଷ୍ଟା କରନ୍ତି ତେବେ ତାଙ୍କୁ ଆଜୀବନ କାରାଦଣ୍ଡ ମିଳିପାରେ। ଏହି ଚେତାବନୀ ଟ୍ରମ୍ପଙ୍କ ଲିଖି୍ତ ପୁସ୍ତକ 'ସେଭ୍ ଆମେରିକା' ରୁ ଆସିଛି ଯାହା ସେପ୍ଟେମ୍ବର ୩ ରେ ପ୍ରକାଶ ପାଇବାକୁ ଯାଉଛି। ଏହି ପୁସ୍ତକରେ ଟ୍ରମ୍ପ ମାର୍କ ଜୁକରବର୍ଗଙ୍କୁ ୨୦୨୦ ନିର୍ବାଚନରେ ହେରଫେର କରିଥିବା ଅଭିଯୋଗ କରିଛନ୍ତି।

୭୮ ବର୍ଷୀୟ ପୂର୍ବତନ ରାଷ୍ଟ୍ରପତି ଜୁକରବର୍ଗଙ୍କ ସହ ହୋଇଥିବା ଏକ ବୈଠକ ବିଷୟରେ ଉଲ୍ଲେଖ କରିଛନ୍ତି ଏବଂ ନିର୍ବାଚନ ଫଳାଫଳକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ସେ ଚେତାବନୀ ଦେଇଛନ୍ତି ଯେ ଯଦି ମେଟା ର ସିଇଓ କିମ୍ବା ଅନ୍ୟ କେହି ୨୦୨୪ ରାଷ୍ଟ୍ରପତି ନିର୍ବାଚନରେ ବେଆଇନ କାର୍ଯ୍ୟକଳାପରେ ଜଡିତ ହୁଅନ୍ତି ବା କିଛି ହେରଫେର କରନ୍ତି, ତେବେ ତାଙ୍କୁ ଆଜୀବନ କାରାଦଣ୍ଡ ଭୋଗିବାକୁ ପଡିପାରେ। ସୂଚନାଥାଉକି, ନିକଟରେ ମାର୍କ ଜୁକରବର୍ଗ ସ୍ୱୀକାର କରିଛନ୍ତି ଯେ ସେ ବାଇଡେନ-ହାରିସ ପ୍ରଶାସନର ଅନୁରୋଧରେ କିଛି ତଥ୍ୟକୁ ସେନସର କରିଥିଲେ। ମାର୍କ ଜୁକରବର୍ଗ କହିଛନ୍ତି ଯେ କୋଭିଡ ସହ ଜଡ଼ିତ କିଛି ବିଷୟବସ୍ତୁକୁ ସେନ୍ସର କରିବାକୁ ବାଇଡେନ ପ୍ରଶାସନ ଫେସବୁକ ଉପରେ ଚାପ ପକାଇଥିଲା। ଏହା ପରେ ଟ୍ରମ୍ପ ମାର୍କ ଜୁକରବର୍ଗଙ୍କୁ ୨୦୨୦ ନିର୍ବାଚନରେ ତାଙ୍କ ବିରୁଦ୍ଧରେ ଷଡଯନ୍ତ୍ର କରିଥିବା ଅଭିଯୋଗ କରିଛନ୍ତି।

ଡୋନାଲ୍ଡ ଟ୍ରମ୍ପଙ୍କ ଅନୁଯାୟୀ, ଜୁକରବର୍ଗ ଏବଂ ତାଙ୍କ ପତ୍ନୀ ପ୍ରିସିଲା ଚାନ୍ ୨୦୨୦ ନିର୍ବାଚନରେ ୪୨୦ ମିଲିୟନ ଡଲାର ଦାନ କରିଥିଲେ। ଟ୍ରମ୍ପ ଖୋଲାଖୋଲି ଭାବେ ଜୁକରବର୍ଗଙ୍କୁ ଧମକ ଦେଇଛନ୍ତି ଯେ ଯଦି ସେ କିମ୍ବା ଅନ୍ୟ କୌଣସି ବ୍ୟକ୍ତି ଏଥର ମଧ୍ୟ ବେଆଇନ କାର୍ଯ୍ୟକଳାପରେ ଜଡିତ ହୁଅନ୍ତି ତେବେ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇପାରେ। ପୂର୍ବତନ ରାଷ୍ଟ୍ରପତି ଦାବି କରିଛନ୍ତି ଯେ ଜୁକରବର୍ଗ ୨୦୨୦ ନିର୍ବାଚନ ସମୟରେ ତାଙ୍କ ବିରୋଧରେ ଷଡ଼ଯନ୍ତ୍ର କରିଥିଲେ। ଏହାରି ଭିତରେ ଜୁକରବର୍ଗ ସ୍ପଷ୍ଟ କରିଛନ୍ତି ଯେ ସେ ୨୦୨୪ ରାଷ୍ଟ୍ରପତି ନିର୍ବାଚନରେ କୌଣସି ଦଳକୁ ସମର୍ଥନ କରିବେ ନାହିଁ ଏବଂ ନିର୍ବାଚନ ପର୍ଯ୍ୟନ୍ତ କୌଣସି ପ୍ରକାର ସହାୟତା ପ୍ରଦାନ କରିବେ ନାହିଁ। ତେବେ ଟ୍ରମ୍ପଙ୍କ ଦଳରେ ଏଲୋନ୍ ମସ୍କ ଏକ ସକ୍ରିୟ ଭୂମିକା ଗ୍ରହଣ କରୁଥିବାବେଳେ ଜୁକରବର୍ଗ ନିର୍ବାଚନ ଠାରୁ ଦୂରେଇ ରହିବାକୁ ନିଷ୍ପତ୍ତି ନେଇଛନ୍ତି।