କଟକ,୧୧/୧୧: ତାଳଦଣ୍ଡା କେନାଲ୍‌ ରୋଡ୍‌ରେ ଥିବା ଏକ ଇ-ବାଇକ୍‌ ବା ବ୍ୟାଟେରୀ ଚାଳିତ ଦୁଇ ଚକିଆ ଗାଡ଼ି ସୋ-ରୁମ୍‌ରେ  ଭୟାବହ ଅଗ୍ନିକାଣ୍ଡ ଘଟିଛି । ନିଆଁକୁ ଆୟତ୍ତ କରିବା ପାଇଁ ଘଟଣାସ୍ଥଳରେ ୭ଟି ଦମକଳ ଗାଡ଼ିକୁ ନିୟୋଜିତ କରାଯାଇଥିଲା । ପ୍ରାୟ ଦେଢ଼ ଘଣ୍ଟାର କସରତ ପରେ ସେ।।-ରୁମ୍‌ରେ ନିଆଁ ଲିଭିଛି । ଏଥିରେ ୧୫ଟି ଇ-ବାଇକ୍‌ ପୋଡ଼ିଯାଇଛି । ଅଗ୍ନିଶମ ଟିମ୍‌ ନିଆଁର କାରଣ ଓ ଏଥିରେ ହୋଇଥିବା କ୍ଷୟକ୍ଷତି ବିଷୟ ଆକଳନ କରୁଛନ୍ତି । 

ତାଳଦଣ୍ଡା କେନାଲ୍‌ ରୋଡ୍‌ ଅର୍ଥାତ୍‌ ରାଣୀହାଟ୍‌ ଛକରୁ ମାଲ୍‌ଗୋଦାମ ଥାନା ଅଭିମୁଖେ ଯାଇଥିବା ରାସ୍ତା କଡ଼ରେ ଗ୍ରେଡ୍‌ ଇଣ୍ଡିଆ ଟ୍ରାନ୍ସପୋର୍ଟ ପାଖରେ ପିୟୋର ଇଭି ନାମକ ସଂସ୍ଥାର ଗାଡ଼ି ସୋ-ରୁମ୍‌ ଅଛି । ଏହି ସୋ-ରୁମ୍‌ ଆଜି ଖୋଲାଥିଲା । ସନ୍ଧ୍ୟା ପ୍ରାୟ ସାଢ଼େ ୬ଟା ହେବ ଏହି ସୋ-ରୁମ୍‌ରୁ ଧୂଆଁ ବାହାରୁଥିଲା । ତଳ ମହଲାରେ ଧୂଆଁ ବାହାରୁଥିବା ଦେଖି ଉପରେ ଥିବା ତିନିଟି ମହଲାର ଲୋକେ ଧାଁଦୌଡ଼ କରି ବାହାରକୁ ଚାଲିଆସିଥିଲେ ।  ବେଳକୁ ବେଳ ନିଆଁ ବଢ଼ିଯାଇ ହୁହୁ ହୋଇ ଜଳିବାକୁ ଲାଗିଲା । ଘଟଣା ଘଟିବାର କିଛି ମିନିଟ୍‌ ଭିତରେ ଅଗ୍ନିଶମ୍‌ ଟିମ୍‌ ଖବର ପାଇ ନିଆଁ ଲିଭାଇବାକୁ ପହଞ୍ଚିଲେ । 

ଦୀପାବଳି ପାଇଁ ମାଲ୍‌ଗୋଦାମ ପାଖରେ ନିୟୋଜିତ ଥିବା ଏକ ଦମକଳ ଗାଡ଼ି ପ୍ରଥମେ ପହଞ୍ଚି ନିଆଁ ଲିଭାରେ ନିୟୋଜିତ ହୋଇଥିଲା । ତେବେ ନିଆଁ ଖୁବ୍‌ ଜୋର୍‌ରେ ବାହାରୁଥିବା ଦେଖି ଅଗ୍ନିଶମ ଟିମ୍‌ ଚାଉଳିଆଗଞ୍ଜ ଓ ସିଡିଏ ଅଗ୍ନିଶମ୍‌ କେନ୍ଦ୍ରରୁ ପ୍ରାୟ ୭ଟି ଗାଡ଼ିକୁ ଡାକିଥିଲେ । ପ୍ରାୟ ୨୦ ଜଣ ଅଗ୍ନିଶମ କର୍ମଚାରୀ ଉକ୍ତ କୋଠାକୁ ଚାରିପଟୁ ଘେରିଯାଇ ପାଣି ମାରିଥିଲେ । ପ୍ରାୟ ଦେଢ଼ ଘଣ୍ଟା ପରେ ନିଆଁ ଆୟତ୍ତକୁ ଆସିଥିଲା । ଅଗ୍ନିଶମର ତତ୍ପରତା ପାଇଁ ନିଆଁ ତଳମହଲା ଭିତରେ ସୀମିତ ରହିଥିଲା। ଅନ୍ୟଥା ସେହି କୋଠାରେ ବ୍ୟାପକ କ୍ଷୟକ୍ଷତି ହୋଇଥାନ୍ତା ବୋଲି ଅଗ୍ନିଶମ ଟିମ୍‌ କହିଛି । ତେବେ ନିଆଁ ଲିଭିଲା ବେଳକୁ ତଳ ମହଲାରେ ଥିବା ସୋ-ରୁମ୍‌ର ୧୫ଟି ବ୍ୟାଟେରୀ ଚାଳିତ ଗାଡ଼ି ଓ ଅନ୍ୟ ଜିନିଷପତ୍ର ପୋଡ଼ି ପାଉଁଶ ହୋଇଯାଇଥିଲା । କେବଳ ସୋ’ରୁମ୍‌ ବାହାରେ ଆଣି ରଖାଯାଇଥିବା ୩ଟି ଗାଡ଼ି ଏଥିରୁ ବର୍ତ୍ତି ଯାଇଛି । ତେବେ ଅଗ୍ନିକାଣ୍ଡର କାରଣ ଏଯାବତ ସ୍ପଷ୍ଟ ହୋଇନାହିଁ । ସଟ୍‌ସର୍କିଟ୍‌ରୁ ଅଗ୍ନିକାଣ୍ଡ ହୋଇଥିବା ଅଗ୍ନିଶମ ଅଧିକାରୀ ଏଏଫ୍‌ଓ ସଂଜିବ ବେହେରା ସୂଚନା ଦେଇଛନ୍ତି ।