ମୁମ୍ବାଇ: ଲୋକସଭା ନିର୍ବାଚନ ୨୦୨୪ର ଫଳାଫଳ ଆସିବା ପୂର୍ବରୁ କେନ୍ଦ୍ରୀୟ ନିର୍ବାଚନ ଆୟୋଗ ଶିବସେନା (ୟୁବିଟି) ମୁଖ୍ୟ ଉଦ୍ଧବ ଠାକରେଙ୍କୁ ନୋଟିସ ପଠାଇଛନ୍ତି । ମହାରାଷ୍ଟ୍ରରେ ଶେଷ ପର୍ଯ୍ୟାୟ ନିର୍ବାଚନରେ ମୁମ୍ବାଇରେ ଧିମା ମତଦାନ ଲାଗି ଉଦ୍ଧବ ଠାକରେ ନିର୍ବାଚନ ଆୟୋଗଙ୍କୁ ଦାୟୀ କରିଥିଲେ । ଏହି ଅଭିଯୋଗ ଉପରେ ସମୀକ୍ଷା କରିବା ପରେ ନିର୍ବାଚନ ଆୟୋଗ ତାଙ୍କୁ ନୋଟିସ ପଠାଇଛନ୍ତି । ଏହା ପୂର୍ବରୁ ଠାକରେଙ୍କୁ ମେ ୩୦ ତାରିଖରେ ନୋଟିସ ପଠାଇଥିଲେ ନିର୍ବାଚନ ଆୟୋଗ ।
ସେପଟେ ମୁଖ୍ୟ ନିର୍ବାଚନ କମିଶନର ରାଜୀବ କୁମାର ସୋମବାର (୩ ଜୁନ୍) କହିଛନ୍ତି ଯେ, ନିର୍ବାଚନ ଆୟୋଗ ନିର୍ବାଚନ ପ୍ରକ୍ରିୟାରେ ନିରପେକ୍ଷତା ଆଣିବାକୁ ଅନକେ ବଡ଼ ନେତାଙ୍କୁ ନୋଟିସ ପଠାଇଛନ୍ତି । କେତେକଙ୍କ ବିରୋଧରେ ମାମଲା ରୁଜୁ ହୋଇଛି । ସେହିଭଳି କେତେକ ବରିଷ୍ଠ ଅଧିକାରୀଙ୍କୁ ବଦଳି କରାଯାଇଛି ।
ଅନ୍ୟପକ୍ଷରେ, ନିର୍ବାଚନ ଆୟୋଗ ୧୮ ତମ ଲୋକସଭା ନିର୍ବାଚନରେ ଆଚରଣ ବିଧି ଉଲ୍ଲଂଘନ ସମ୍ବନ୍ଧୀୟ ୧୪ଟି ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ନେଇଛନ୍ତି । ଫଳରେ ୧୩ଟି ନୋଟିସ୍ ଜାରି କରାଯାଇଛି । ୩ ଜଣ ନେତାଙ୍କ ପ୍ରଚାର ଉପରେ ପ୍ରତିବନ୍ଧକ ଲଗାଯାଇଛି ।
ନିର୍ବାଚନ ଆୟୋଗଙ୍କ ଓ୍ବେବସାଇଟ୍ରେ ଉପଲବ୍ଧ ନୋଟିସ ଏବଂ ନିର୍ଦେଶ ଅନୁସାରେ, ଆୟୋଗ ୧୪ଟି ମାମଲାକୁ ସିଧାସଳଖ ଗ୍ରହଣ କରିଥିବା ବେଳେ ୧୩ଟି ନୋଟିସ ଜାରି କରିଛନ୍ତି । ସେହିଭଳି ବିଆରଏସ୍ର ଅଭିଯୋଗ ଆଧାରରେ ନିର୍ବାଚନ ଆୟୋଗ ବିନା ନୋଟିସ୍ରେ କଂଗ୍ରେସ ନେତା ଏବଂ ତେଲେଙ୍ଗାନା ମନ୍ତ୍ରୀ କୋଣ୍ଡା ସୁରେଖାଙ୍କ ବିରୋଧରେ ଆକ୍ସନ ନେଇଛନ୍ତି । ସୁରେଖା ବ୍ୟକ୍ତିଗତ ଭାବରେ ବିଆରଏସ ନେତା କେଟି ରାମାରାଓଙ୍କ ବିରୋଧରେ ଅଭିଯୋଗ ଆଣି ଆଚରଣ ବିଧି ଉଲ୍ଲଂଘନ କରିଥିଲେ ।
୧୪ଟି ମାମଲା ମଧ୍ୟରୁ ୫ଟିରେ ବିଜେପି ନେତାଙ୍କ ସଂପୃକ୍ତି ରହିଛି । ଏହା ବ୍ୟତୀତ ୪ କଂଗ୍ରେସ ନେତା ଏବଂ ଜଣେ ଲେଖାଏଁ ଟିଡିପି, ଆପ, ଓ୍ବାଇଏସଆର କଂଗ୍ରେସ, ବିଆରଏସ୍ ଏବଂ ଟିଏମସି ବିରୋଧରେ ମାମଲା ହୋଇଥିଲା । ସେହିଭଳି ଏପ୍ରିଲ ୫ରେ ନିର୍ବାଚନ ଆୟୋଗ ଦିଲ୍ଲୀ ମନ୍ତ୍ରୀ ଆତିଶୀ ଏବଂ ମେ’ ୧୮ରେ ପଶ୍ଚିମବଙ୍ଗର ବିଜେପି ମୁଖ୍ୟ ସୁକାନ୍ତ ମଜୁମଦାରଙ୍କୁ ନୋଟିସ ପଠାଇଥିଲେ ।
