ନୂଆଦିଲ୍ଲୀ,୧୨/୦୯: ଓ୍ବାକଫ୍ ବିଲ୍କୁ ନେଇ ଗଠିତ ହୋଇଥିବା ସଂସଦର ମିଳିତ କମିଟି ବିଲ୍ର ସମୀକ୍ଷା ପାଇଁ ଲଗାତର ବୈଠକ କରୁଛନ୍ତି। ଏହି ସଂପର୍କରେ ଗତ ସପ୍ତାହରେ ଶୁକ୍ରବାର ଦିନ କମିଟି ସେମାନଙ୍କ ମତାମତ ନେବାକୁ ଭାରତର ପ୍ରତ୍ନତତ୍ତ୍ୱ ସର୍ବେକ୍ଷଣ ଅଧିକାରୀମାନଙ୍କୁ ଡକାଇଥିଲେ। ବୈଠକରେ ଏଏସ୍ଆଇ ଏକ ଉପସ୍ଥାପନା ଦେଖାଇଥିଲେ, ଯେଉଁଥିରେ କିଛି ଆଶ୍ଚର୍ଯ୍ୟଜନକ କଥା ସାମ୍ନାକୁ ଆସିଥିଲା। ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ (ଏଏସ୍ଆଇ) ଅନୁଯାୟୀ, ମହାରାଷ୍ଟ୍ରର ଔରଙ୍ଗାବାଦ (ବର୍ତ୍ତମାନର ସମ୍ଭାଜିନଗର) ରେ ଅବସ୍ଥିତ ଔରଙ୍ଗଜେବଙ୍କ ସମାଧି, ୱାକଫ ସମ୍ପତ୍ତି ଅଟେ। ଆଗ୍ରା ର ଜାମା ମସଜିଦକୁ ମଧ୍ୟ ୱାକଫର ସମ୍ପତ୍ତି ଘୋଷିତ କରାଯାଇଛି? କେବଳ ଏତିକି ନୁହେଁ, କର୍ଣ୍ଣାଟକର ବିଦର ଦୁର୍ଗ ଏବଂ ଔରଙ୍ଗାବାଦ ନିକଟରେ ଅବସ୍ଥିତ ପ୍ରସିଦ୍ଧ ଦୌଲତାବାଦ ଦୁର୍ଗ ମଧ୍ୟ ୱାକଫର ସମ୍ପତ୍ତି ଅଟେ। ୱାକଫ୍ ବିଲ୍ ଉପରେ ମିଳିତ କମିଟିକୁ ଏଏସ୍ଆଇ ଏହି ସୂଚନା ଦେଇଛି।
୫୩ ଟି ଐତିହାସିକ ସ୍ଥାନର ତାଲିକା ରଖିଛି ଏଏସ୍ଆଇ:
ଭାରତର ପ୍ରତ୍ନତତ୍ତ୍ୱ ସର୍ବେକ୍ଷଣ ୱାକଫ ବିଲ୍ ଉପରେ ସଂସଦର ମିଳିତ କମିଟି ସମ୍ମୁଖରେ ଏକ ଉପସ୍ଥାପନା ବା ପ୍ରେଜେଣ୍ଟେସନ୍ ରଖିଥିଲା। ଜାତୀୟ ଗଣମାଧ୍ୟମ ଏନ୍ଡିଟିଭି ଦ୍ବାରା ପ୍ରାପ୍ତ ସୂଚନା ଅନୁଯାୟୀ, ଏଏସ୍ଆଇ କମିଟିରେ ୫୩ ଟି ଏପରି ଐତିହାସିକ ଅଟ୍ଟାଳିକାର ତାଲିକା ଦାଖଲ କରିଛି ଯାହା ଏଏସ୍ଆଇ ର ସୁରକ୍ଷା ଅଧୀନରେ ଅଛି, କିନ୍ତୁ ୱାକଫ୍ ସମ୍ପତ୍ତି ଭାବରେ ଘୋଷିତ ହୋଇଛି। ତେବେ, ବର୍ତ୍ତମାନ ଏଏସ୍ଆଇ ଏହାର ୨୪ ଟି ଜୋନ୍ ମଧ୍ୟରୁ କେବଳ ୯ ଟି ଜୋନ୍ ତାଲିକା ଦାଖଲ କରିଛି। ସେହି ଜୋନ୍ ଗୁଡିକରେ ଦିଲ୍ଲୀ ମଧ୍ୟ ରହିଛି, ଯାହାର ତାଲିକା ଏପର୍ଯ୍ୟନ୍ତ ଦାଖଲ ହୋଇନାହିଁ ।
ଔରଙ୍ଗଜେବଙ୍କ ସମାଧି ସ୍ଥଳ କେବେ ହେଲା ଓ୍ବାକଫ୍ ସମ୍ପତ୍ତି:
ଭାରତର ପ୍ରତ୍ନତତ୍ତ୍ୱ ସର୍ବେକ୍ଷଣ ଅନୁଯାୟୀ, ୧୯୫୧ ରେ ଔରଙ୍ଗଜେବଙ୍କ ସମାଧି ସଂରକ୍ଷିତ କୋଠା ଭାବରେ ଘୋଷିତ ହୋଇଥିଲା, କିନ୍ତୁ ଏହା ୧୯୭୩ ରେ ୱାକଫ ସମ୍ପତ୍ତିରେ ପରିଣତ ହୋଇଥିଲା। ସେହିଭଳି, ୧୯୨୦ ମସିହାରୁ ଏଏସ୍ଆଇ ଦ୍ବାରା ସୁରକ୍ଷିତ ଆଗ୍ରାର ଜାମା ମସଜିଦକୁ ମଧ୍ୟ ୱାକଫ ସମ୍ପତ୍ତି ଭାବରେ ଘୋଷଣା କରାଯାଇଛି। ସେହିଭଳି, ୧୯୫୧ ପରଠାରୁ ସଂରକ୍ଷିତ ବିଦର ଦୁର୍ଗକୁ ୨୦୦୫ ରେ ୱାକଫ ସମ୍ପତ୍ତି ଭାବରେ ଘୋଷିତ କରାଯାଇଥିବା ବେଳେ ୧୯୫୧ ପରଠାରୁ ସଂରକ୍ଷିତ ଥିବା ଦୌଲତାବାଦ ଦୁର୍ଗକୁ ୧୯୭୩ ରେ ୱାକଫ ସମ୍ପତ୍ତି ଭାବରେ ଘୋଷଣା କରାଯାଇଥିଲା। ଏହି କୋଠାଗୁଡ଼ିକରେ ମକ୍କା ମସଜିଦ୍ (୨୦୦୫ ରେ ୱାକଫ୍ ଘୋଷିତ), ଗୁଲବର୍ଗ ଦୁର୍ଗ ଏବଂ ଦାମ୍ରି ମସଜିଦ୍ ମଧ୍ୟ ଅନ୍ତର୍ଭୁକ୍ତ।
