ନୂଆଦିଲ୍ଲୀ,୧୬/୫: ପୁଣି ଏୟାର ଇଣ୍ଡିଆରେ ବୋମା ଆତଙ୍କ। ରାଜଧାନୀ ଦିଲ୍ଲୀର ଇନ୍ଦିରା ଗାନ୍ଧୀ ଏୟାରପୋର୍ଟରେ ଏୟାର ଇଣ୍ଡିଆର ଏକ ବିମାନରେ ବୋମା ରହିଥିବା ଖବର ଜଣାପଡିଥିଲା । ବିମାନର ଶୌଚାଳୟରେ ଟିସୁ ପେପରରେ ବୋମା ଲେଖା ହୋଇଥିବା ଦେଖିବାକୁ ମିଳିଥିଲା । ଫଳରେ ଯାତ୍ରୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ତେବେ ଏହି ବିମାନ ଦିଲ୍ଲୀରୁ ଗୁଜୁରାଟର ବଦୋଦରା ଯାଉଥିଲା । ଏହି ଘଟଣା ପରେ ତଦନ୍ତ କରାଯାଇଥିଲେ ମଧ୍ୟ କୌଣସି ତଥ୍ୟ ମିଳିନଥିଲା । ଏହାପରେ ପୋଲିସ ବୋମା ସମ୍ବନ୍ଧୀୟ ସୂଚନା ଗୁଜବ ବୋଲି ପ୍ରକାଶ କରିଥିଲା ।   

ଏନେଇ ଜଣେ ପୋଲିସ ଅଧିକାରୀ ସୂଚନା ଦେଇଛନ୍ତି ଯେ, ବୁଧବାର ସନ୍ଧ୍ୟାରେ ଏହି ନୋଟ ମିଳିବା ପରେ କେନ୍ଦ୍ରୀୟ ସୁରକ୍ଷା ବଳ ଓ ଦିଲ୍ଲୀ ପୋଲିସଙ୍କୁ ସୂଚନା ଦିଆଯାଇଥିଲା । ଏଥିସହ ଯାତ୍ରୀଙ୍କୁ ବିମାନରୁ ବାହାରିବା ପାଇଁ  କୁହାଯାଇଥିଲା ।  ଏହାପରେ ବିମାନର ଯାଞ୍ଚ କରାଯାଇଥିଲା ହେଲେ କୌଣସି ତଥ୍ୟ ମିଳି ନ ଥିଲା। ପରେ ଯାତ୍ରୀମାନଙ୍କୁ ଆଉ ଏକ ବିମାନରେ ପଠାଯାଇଥିଲା । ସେହିପରି ଗତ କିଛିଦିନ ପୂର୍ବେ ଦିଲ୍ଲୀର ୧୦ ଟି ହସ୍ପିଟାଲ ଓ ଇନ୍ଦିରାଗାନ୍ଧୀ ଏୟାରପୋର୍ଟକୁ ଇମେଲ ମାଧ୍ୟମରେ ବୋମା ଫୁଟାଇବା ନେଇ ଧମକ ମିଳିଥିଲା । ଦିଲ୍ଲୀ ପୋଲିସ ଯାଞ୍ଚ କରି ଏହି ଧମକକୁ ମିଥ୍ୟା ଗୁଜବ ବୋଲି ପ୍ରକାଶ କରିଥିଲେ।