ଲମତାପୁଟ, ୦୯/୦୯ : ମାଛକୁଣ୍ଡରେ ବନ୍ଦ ହେଲା ବିଦ୍ୟୁତ୍ ଉତ୍ପାଦନ। ମାଛକୁଣ୍ଡ ବିଦ୍ୟୁତ ପ୍ରକଳ୍ପରେ ବନ୍ୟାଜଳ ପ୍ରବେଶ କରିବା ପରେ ପ୍ରକଳ୍ପକୁ ସମ୍ପୂର୍ଣ୍ଣ ବନ୍ଦ କରାଯାଇଛି। ପ୍ରକଳ୍ପର ଦୁଇ ନମ୍ବର ୟୁନିଟ ଏବଂ ୫ ନମ୍ବର ୟୁନିଟରେ ନବୀକରଣ ଚଲିଥିବା ବେଳେ ପାଣି ପଶି ଯିବାରୁ ମଟର ଯୋଗେ ପାଣି ନିଷ୍କାସନ ଉଦ୍ୟମ କରାଯିଥିଲା। କିନ୍ତୁ ଜଳଭଣ୍ଡାର ଉପରେ ଜଳସ୍ତର ବଢିବାରୁ ବିଦ୍ୟୁତ ପ୍ରକଳ୍ପରୁ ସମ୍ପୂର୍ଣ୍ଣ ବିଦ୍ୟୁତ ଉତ୍ପାଦନ ବନ୍ଦ କରାଯାଇଛି। ଟରବାଇନ ଗୁଡିକରେ ପାଣି ପଶିଯାଇ ଓଏଲ ସବୁ ନଷ୍ଟ ହୋଇଯିବା ଫଳରେ ପ୍ରକଳ୍ପ କେବେ ଚାଲିବ ତାହା କହିବା ମୁସ୍କିଲ ବୋଲି ପ୍ରକଳ୍ପ ଅଧିକାରୀ ସୂଚନା ଦେଇଛନ୍ତି।

ସୂଚନାନୁଯାୟୀ, ତିନିଦିନ ଧରି ଲଗାଣ ବର୍ଷା ଯାଗୁଁ ଚଳିତ ବର୍ଷ ପ୍ରଥମ ଥର ଜଲାପୁଟ ଡ୍ୟାମର ୬ଟି ଗେଟ୍ ଖୋଲିଛି। ଜଲାପୁଟ ଡ୍ୟାମର କ୍ଷମତା ୨୭୫୦ ଫୁଟ ରହିଥିବା ବେଳେ ୨୭୪୯.୪୫କୁ ଜଳସ୍ତର ଛୁଇଁଛି। ଡ୍ୟାମକୁ ୨୦୦୦ କ୍ୟୁସେକ ପାଣି ପ୍ରବେଶ କରୁଥିବା ବେଳେ ଜଲାପୁଟର ସ୍ପିଲ ୱେ ଏବଂ ମୁଖ୍ୟ ଡ୍ୟାମ ଦେଇ ୨୩ ହଜାର କ୍ୟୁସେକ ପାଣି ଛଡାଯାଉଛି। ସେହି ପାଣି ମାଛକୁଣ୍ଡ ଜଳବିଦ୍ୟୁତ ପ୍ରକଳ୍ପର ଡି ଡ୍ୟାମରେ ପହଞ୍ଚି ଜଳସ୍ଥର ବଢ଼ିବାରୁ ୪ଟି ଗେଟ ଖୋଲାଯାଇଛି। ଡି. ଡ୍ୟାମରୁ ଅଧିକା ପାଣି ନିଷ୍କାସନ ଫଳରେ ମାଛକୁଣ୍ଡ ଜଳବିଦ୍ୟୁତ ପ୍ରକଳ୍ପକୁ ପାଣି ପଶିଛି।