ନୂଆଦିଲ୍ଲୀ ୨୮/୦୩: ଆମେରିକାର ଫ୍ଲୋରିଡା ରାଜ୍ୟରେ ୧୪ ବର୍ଷରୁ କମ୍‌ ବୟସର ପିଲା ସୋସିଆଲ ମିଡିଆ ବ୍ୟବହାର କରିପାରିବେ ନାହିଁ । ରାଜ୍ୟପାଳ ରନ୍‌ ଡି ସେଣ୍ଟିସ୍‌ ଏହି ବିଲ୍‌ରେ ମୋହର ମାରିଛନ୍ତି । ଆସନ୍ତା ବର୍ଷ ଅର୍ଥାତ୍‌ ୨୦୨୫ ମସିହାରୁ ଏହି ନିୟମ ଲାଗୁ ହେବ । ନିୟମ ଅନୁସାରେ, ଫ୍ଲୋରିଡାରେ ୧୪ରୁ ୧୫ ବର୍ଷ ବୟସର ପିଲା ଇନ୍‌ଷ୍ଟାଗ୍ରାମ୍‌ ଓ ସ୍ନାପ୍‌ଚାଟ୍‌ ବ୍ୟବହାର ସେତେବେଳେ କରିପାରିବେ, ଯଦି ସେମାନଙ୍କ ଅଭିଭାବକ ଏହାର ଲିଖିତ ମଞ୍ଜୁରି ପ୍ରଦାନ କରିବେ । ୧୪ରୁ କମ୍‌ ବୟସ୍କ ପିଲାଙ୍କ ସୋସିଆଲ ମିଡିଆ ଆକାଉଣ୍ଟ ଡିଲିଟ୍‌ କରିବାକୁ କମ୍ପାନିଗୁଡ଼ିକୁ ରାଜ୍ୟପାଳ ନିର୍ଦ୍ଦେଶ ଦେଇଛନ୍ତି । ୟୁଜର୍‌ଙ୍କ ବୟସ ଯାଞ୍ଚ୍‌ ପରେ ଆକାଉଣ୍ଟ୍‌ ଆକ୍ଟିଭ୍‌ କରିବାକୁ ସମସ୍ତ ସୋସିଆଲ ମିଡିଆ ପ୍ଲାଟ୍‌ଫର୍ମକୁ ନିର୍ଦ୍ଦେଶ ଦିଆଯାଇଛି ।

ଯଦି କୌଣସି କମ୍ପାନି ୧୪ରୁ କମ୍‌ ବୟସ୍କ ପିଲାଙ୍କ ସୋସିଆଲ ମିଡିଆ ଆକାଉଣ୍ଟ୍‌ ଡିଲିଟ୍‌ ନ କରେ, ତେବେ ସେହି ପିଲାକୁ ୧୦ ହଜାର ଡଲାର ଜରିମାନା ଦେବାକୁ ପଡ଼ିବ । ଏଥିସହ ଉକ୍ତ କମ୍ପାନି ଉପରେ ମଧ୍ୟ ୫୦ ହଜାର ଡଲାର ଜରିମାନା ଲାଗୁ ହୋଇପାରେ । ଫ୍ଲୋରିଡା ରାଜ୍ୟ ସରକାର ଆସନ୍ତା ବର୍ଷ ଜାନୁଆରୀରେ ଏହି ନିୟମ ଲାଗୁ କରିବେ । ଏହାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ୍‌ କରାଯାଇପାରେ ବୋଲି ବିଶେଷଜ୍ଞମାନେ କହୁଛନ୍ତି । ଫ୍ଲୋରିଡାର ରିପବ୍ଲିକାନ୍‌ ସିନେଟର ପଲ ରିନର୍‌ କହିଛନ୍ତି, ଏହି ବିଲ୍‌କୁ ପାସ୍‌ କରାଇବା ମୋର ସ୍ୱପ୍ନ ଥିଲା । ଯେଉଁ ବୟସରେ ପିଲାଙ୍କ ମସ୍ତିଷ୍କର ବିକାଶ ହୁଏ, ସେହି ବୟସରେ ସେମାନେ ସୋସିଆଲ ମିଡିଆ ନିଶାରେ ପଡୁଛନ୍ତି । ଏଥିରୁ ରକ୍ଷା ପାଇବା ଅତ୍ୟନ୍ତ ଜରୁରୀ । ସୋସିଆଲ ମିଡିଆର ବ୍ୟବହାର ପିଲାଙ୍କ ମସ୍ତିଷ୍କ ଉପରେ କି ପ୍ରଭାବ ପକାଉଛି, ସେ ବିଷୟରେ ଏହି ବିଲ୍‌ରେ ସ୍ପଷ୍ଟ ଉଲ୍ଲେଖ ହୋଇଛି ।