ନୀଳଗିରି -୧୭/୩ :ନୀଳଗିରି ମାଟିର ସୁଯୋଗ୍ୟ ସନ୍ତାନ, ଭାରତ ଛାଡ଼ ଆନ୍ଦୋଳନର ମହାନାୟକ, ନୀଳଗିରି ଗଡ଼ଜାତ ଆନ୍ଦୋଳନର ଜଣେ କର୍ଣ୍ଣଧାର ତଥା ପ୍ରଚଣ୍ଡ ଧିସମ୍ପନ୍ନ ସ୍ଵାଧୀନତା ସଂଗ୍ରାମୀ ସୁନାରାମ ସିଂଙ୍କ (୧୦୧) ରବିବାର ସନ୍ଧ୍ୟାରେ ପରଲୋକ ହୋଇଛି।
୧୯୨୪ମସିହା ଏପ୍ରିଲ ମାସ ୧୬ତାରିଖରେ ବର୍ତ୍ତମାନର ଜାମୁଡିହା ପଞ୍ଚାୟତ ଗୋଡ଼ିଶୂଳ ଗ୍ରାମରେ ଜନ୍ମଗ୍ରହଣ କରିଥିଲେ। ବାଲ୍ୟକାଳରୁ ଖୁବ୍ ମେଧାବୀ ଛାତ୍ର ଭାବରେ ରେମୁଣା ହାଇସ୍କୁଲରେ ଶ୍ରେଣୀରେ ପ୍ରଥମ ସ୍ଥାନ ଅଧିକାର କରୁଥିଲେ। ପରେ ଲୋକସମ୍ପର୍କ ବିଭାଗରେ କିଛିଦିନ ପାଇଁ ଚାକିରି ଜୀବନ ଆରମ୍ଭ କରିଥିବା ବେଳେ ଦେଶ ମାତୃକା ପ୍ରେମରେ ଉଦବୁଦ୍ଧ ହୋଇ ୧୯୪୨ ମସିହାରେ ଭାରତ ଛାଡ଼ ଆନ୍ଦୋଳନରେ ସାମିଲ ହୋଇଥିଲେ। ଏପରିକି ଦେଶପ୍ରେମ ତାଙ୍କୁ ଏପରିଭାବରେ ଉଦବୁଦ୍ଧ କରିଥିଲା ଯେ ସାଇକେଲରେ ରାଞ୍ଚି ପର୍ଯ୍ୟନ୍ତ ଯାଉଥିଲେ।
୧୯୪୮ମସିହାରେ ନୀଳଗିରି ଗଡ଼ଜାତ ଆନ୍ଦୋଳନର ସକ୍ରିୟ ଭୂମିକା ଗ୍ରହଣ କରିଥିଲେ। ସେଥିପାଇଁ ତାଙ୍କୁ ନିର୍ଯାତନାର ଶିକାର ହେବାକୁ ପଡ଼ିଥିଲା। ଦେଶ ସ୍ବାଧୀନ ପରେ ସେ ଜନସେବାରେ ନିଜକୁ ନିୟୋଜିତ କରି ସେତେବେଳର ଅବିଭକ୍ତ ଜଡିଦା ପଞ୍ଚାୟତର ସରପଞ୍ଚ ଭାବେ ନିର୍ବାଚିତ ହୋଇ ଜନସେବାରେ ନିୟୋଜିତ ଥିଲେ। ତାଙ୍କ ମୃତ୍ୟୁ ଖବର ପାଇ ନୀଳଗିରି ବିଧାୟକ ସୁକାନ୍ତ କୁମାର ନାୟକ ତାଙ୍କ ବାସଭବନରେ ପହଞ୍ଚି ଶେଷ ଦର୍ଶନ କରିଥିଲେ।ସେହିପରି ସାଂସଦ ପ୍ରତାପ ଷଡ଼ଙ୍ଗୀ, ବିଜେଡିନେତା ସନ୍ତୋଷ ଖଟୁଆ ତାଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି।