ପ୍ୟାରିସ୍,୨୬/୦୫: ଆଜିଠୁ ହେବ ସିଜନର ଦ୍ୱିତୀୟ ଗ୍ରାଣ୍ଡସ୍ଲାମ୍ ଫ୍ରେଞ୍ଚ ଓପନ । ପୂର୍ବତନ ଚାମ୍ପିଅନ୍ କାର୍ଲୋସ ଅଲ୍କାରାଜଙ୍କ ସମେତ ବହୁ ତାରକା ଖେଳାଳି ଅଭିଯାନ ଆରମ୍ଭ କରିବେ । ୪ଥର ଗ୍ରାଣ୍ଡସ୍ଲାମ୍ ଚାମ୍ପିଅନ୍ ନାଓମି ଓସାକା ପ୍ରଥମ ମ୍ୟାଚ୍ ଖେଳିବେ । ସେ ଲୁସିଆ ବ୍ରୋଞ୍ଜେଟିଙ୍କୁ ଭେଟିବେ । ଅନ୍ୟ ଟପ୍ ସିଡେଡ ଖେଳାଳିଙ୍କ ମଧ୍ୟରେ ନବମ ସିଡ୍ ଜେଲେନା ଓଷ୍ଟାପେଙ୍କୋ ଫ୍ରାନ୍ସର ଜାକଲିନ ଖ୍ରୀଷ୍ଟିଆନଙ୍କୁ ଭେଟୁଥିବାବେଳେ ବାର୍ବରା କ୍ରେସିକୋଭା ସ୍ୱିଜରଲାଣ୍ଡର ଭିକ୍ଟୋରିଜା ଗୋଲୁବିକଙ୍କୁ ସାମ୍ନା କରିବେ । କ୍ରେସିକୋଭା ୨୦୨୧ରେ ଚାମ୍ପିଅନ୍ ଆଖ୍ୟା ଅର୍ଜନ କରିଥିଲେ ।
ଚଳିତ ସିଜନରେ କ୍ରେସିକୋଭା ମାତ୍ର ୩ଟି ମ୍ୟାଚ୍ ଖେଳିଛନ୍ତି । ପିଠି ଯନ୍ତ୍ରଣା ଯୋଗୁଁ ସେ ଅନେକ ଟୁର୍ଣ୍ଣାମେଣ୍ଟ ଖେଳିପାରି ନଥିଲେ । ମାତ୍ର ବର୍ତ୍ତମାନ ସେ ଫିଟ୍ ଅଛନ୍ତି ଟାଇଟଲ ଦାବିଦାର ରୂପେ ଗଣା ହେଉଛନ୍ତି । ସେହିପରି ଓଷ୍ଟାପେଙ୍କୋ ୨୦୧୭ରେ ଫ୍ରେଞ୍ଚ ଓପନ ଚାମ୍ପିଅନ୍ ହୋଇଥିଲେ । କ୍ଲେ କୋର୍ଟରେ ସେ ସର୍ବଦା ଚମକପ୍ରଦ ପ୍ରଦର୍ଶନ କରିଛନ୍ତି । ପୁରୁଷ ବର୍ଗରେ ତୃତୀୟ ସିଡ୍ ଅଲକାରାଜ ରବିବାର ଜେଜେ ଉଲ୍ଫଙ୍କୁ ଭେଟିବେ । ଗତ ବର୍ଷ ସେ ଜୋକୋଭିକଙ୍କ ଠାରୁ ପରାଜିତ ହୋଇ ଟାଇଟଲ ଦୌଡ଼ରୁ ବାଦ ପଡ଼ିଥିଲେ । ମାତ୍ର ଏଥର କ୍ଲେ କୋର୍ଟରେ ଚମକ ଦେଖାଇବାକୁ ସେ ପ୍ରସ୍ତୁତ ରହିଛନ୍ତି ।
ସେହିପରି ଦୁଇ ପ୍ରସିଦ୍ଧ ଭେଟେରାନ ଷ୍ଟାନିସ୍ଲାସ ୱାରିଙ୍କା ଓ ଆଣ୍ଡି ମରେ ରବିବାର ସାମ୍ନା ସାମ୍ନି ହେବେ । ଅନ୍ୟମାନଙ୍କ ମଧ୍ୟରେ ଷଷ୍ଠ ସିଡ୍ ଆନ୍ଦ୍ରେ ରୁବଲେଭ ପ୍ରଥମ ରାଉଣ୍ଡ୍ରେ ଟାରୋ ଡାନିଏଲଙ୍କୁ ଭେଟୁଥିବାବେଳେ ଅଷ୍ଟମ ସିଡ୍ ହ୍ୟୁବର୍ଟ ହର୍କାଜ ଜାପାନର ସିନ୍ତାରୋ ମୋଚିଜୁକିଙ୍କୁ ସାମ୍ନା କରିବେ ।
