ଭୁବନେଶ୍ଵର, ୨୦/୦୮ : ରାଜ୍ୟରେ ମାଙ୍କଡ଼ ଉପଦ୍ରବ କମାଇବା ପାଇଁ ଗଠନ ହେବ ମଙ୍କି ସ୍କ୍ଵାଡ୍। ସମ୍ଵେଦନଶୀଳ ବନଖଣ୍ଡମାନଙ୍କରେ ମଙ୍କି ସ୍କ୍ଵାଡ୍ ଗଠନ କରିବାକୁ ଯୋଜନା କରିଛନ୍ତି ସରକାର। ବିଜେଡି ବିଧାୟକ ଗଣେଶ୍ଵର ବେହେରାଙ୍କ ପ୍ରଶ୍ନରେ ଉତ୍ତର ରଖିଲେ ଜଙ୍ଗଲ ଏବଂ ପରିବେଶ ମନ୍ତ୍ରୀ ରଣେଶ ରାମସିଂ ଖୁଣ୍ଟିଆ।

ଜଙ୍ଗଲ ମନ୍ତ୍ରୀ କହିଛନ୍ତି ଯେ, ମାଙ୍କଡ ଉତ୍ପାତ କରୁଥିବା ଅଞ୍ଚଳରେ ଅଲଟ୍ରାସୋନିକ୍ ମଙ୍କି ରିପିଲର ମେସିନ ସାହାଯ୍ୟରେ ଆଣ୍ଟି ଡିପ୍ରେଡେସନ ଟିମ୍ ପ୍ରତ୍ୟେକ ବନଖଣ୍ଡରେ ମାଙ୍କଡ ଘଉଡ଼ାଇବା ପାଇଁ ସାହାଯ୍ୟ କରୁଛନ୍ତି। ବିପଦ ସୃଷ୍ଟିକାରୀ ମାଙ୍କଡମାନଙ୍କୁ ନିଶ୍ଚେତକ ଦେଇ ଜଙ୍ଗଲରେ ଛଡାଯାଉଛି। ଆବଶ୍ୟକ ସ୍ଥଳେ ଅଭିଜ୍ଞ ମଙ୍କଡିଆମାନଙ୍କର ସାହାଯ୍ୟ ନେଉଛି ବନ ବିଭାଗ। ରାଜ୍ୟର ବିଭିନ୍ନ ଜନଗହଳି ସ୍ଥାନ ଗୁଡିକରେ ଜନ୍ତା ଏବଂ ପ୍ଲାଷ୍ଟିକ ଜାଲର ବ୍ୟବହାର କରାଯାଉଛି। ମାଙ୍କଡଙ୍କୁ ଘଉଡ଼ାଇବା ପାଇଁ ମଙ୍କି ସ୍କାରିଂ କାନନ ଡିଭାଇସ୍‌ର ବ୍ୟବହାର କରାଯାଉଛି।