ଜୟପୁର,୧୦/୦୨: କୋରାପୁଟ ଜିଲ୍ଲାର ଗୁପ୍ତେଶ୍ୱର ବନାଞ୍ଚଳକୁ ମିଳିଛି ଜୈବ ବିବିଧତା ଐତିହ୍ୟସ୍ଥଳ(ବାୟୋଡାଇଭର୍ସିଟି ହେରିଟେଜ୍ ସାଇଟ୍ ବା ବିଏଚ୍ଏସ୍) ମାନ୍ୟତା । ଏ ସମ୍ପର୍କରେ ଶୁକ୍ରବାର ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସାମାଜିକ ଗଣମାଧ୍ୟମ ‘ଏକ୍ସ’ରେ ସୂଚନା ଦିଆଯାଇଛି । ଏହା ରାଜ୍ୟରେ ଚତୁର୍ଥ । ବନାଞ୍ଚଳରେ ଥିବା ବିଭିନ୍ନ ବିଲୁପ୍ତ ପ୍ରଜାତିର ଗଛ, ଜୀବଜନ୍ତୁ, ଅଭୟାରଣ୍ୟରେ ଥିବା ଦୁର୍ଲଭ ପଦାର୍ଥର ସଂରକ୍ଷଣ ହେବ । ଏଥିସହ ଅଞ୍ଚଳବାସୀ ଉପକୃତ ହେବେ । ସେମାନଙ୍କ ଜୀବନଜୀବିକାର ମାନ ଉନ୍ନତ ହେବ । ପରିବେଶବିତ୍ମାନେ ଏଭଳି ପଦକ୍ଷେପକୁ ସ୍ୱାଗତ କରିଛନ୍ତି ।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ଯେ କୋରାପୁଟର ଗୁପ୍ତେଶ୍ୱର ଜଙ୍ଗଲକୁ ଜୈବ ବିବିଧତା ଐତିହ୍ୟସ୍ଥଳ ଟ୍ୟାଗ୍ ମିଳିଛି । ଚିହ୍ନଟ ହୋଇଥିବା ୩୫୦ ହେକ୍ଟର ଅଞ୍ଚଳରେ ଅତିକମ୍ରେ ୬୦୮ ପ୍ରଜାତିର ପ୍ରାଣୀସମୂହ ରହିଛି । ୧୮୨ ପ୍ରଜାତିର ଫୁଲଗଛ, ୭୬ ପ୍ରଜାତିର ଗୁଳ୍ମ, ୧୭୭ ପ୍ରଜାତିର ଚେରମୂଳି, ୬୬୯ ପ୍ରଜାତିର ଲତା ଅଛି । ୧୪ ପ୍ରଜାତିର ଅର୍ଚିଡ୍ ଏବଂ ବିଲୁପ୍ତପ୍ରାୟ ଔଷଧୀୟ ବୃକ୍ଷ ରହିଛି । ପ୍ରକୃତିର ବରଦାନ ଏହି ଅଞ୍ଚଳକୁ ଜୈବକ ବିବିଧତା ଆଇନ-୨୦୦୨ ଅଧୀନରେ ବିଏଚ୍ଏସ୍ ମାନ୍ୟତା ମିଳିଛି । ସ୍ଥାନୀୟ ଡିଏଫ୍ଓ ପ୍ରତାପ କୁମାର ବେହେରା କହିଛନ୍ତି, ଏହା ଖୁସି ଖବର । ଶୁକ୍ରବାର ଅପରାହ୍ଣରେ ଘୋଷଣା ବାବଦରେ ଜଣାପଡ଼ିଛି । ଏ ସମ୍ପର୍କିତ ଚିଠି ମିଳିନି । ପୂର୍ବରୁ କନ୍ଧମାଳର ମଣ୍ଡାସାରୁ, ଗଜପତିର ମହେନ୍ଦ୍ରଗିରି ପର୍ବତ ଏବଂ ବଲାଙ୍ଗିର, ବରଗଡ଼ ଜିଲ୍ଲାର ଗନ୍ଧମାର୍ଦ୍ଦନକୁ ଜୈବ ବିବିଧତା ଐତିହ୍ୟସ୍ଥଳ ମାନ୍ୟତା ମିଳିସାରିଛି ।
ଐତିହ୍ୟସ୍ଥଳ ଘୋଷଣାର ପ୍ରଭାବ ସ୍ଥାନୀୟ ଲୋକଙ୍କ ଉପରେ ପଡ଼ିବ । ଅବାଧ ଗଛକଟା, ଜୀବଜନ୍ତୁ ଶିକାର, ପଥର ଖୋଳା ସହ ପ୍ରାକୃତିକ ସମ୍ପଦର ରକ୍ଷଣାବେକ୍ଷଣ କରିବେ । ଏଥିଲାଗି ପାଣ୍ଠି ଯୋଗାଇ ଦିଆଯିବ । ବିନା ଅନୁମତିରେ ବାହାର ଲୋକ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ପାରିବେନି । ଉତ୍ପାଦିତ ଦ୍ରବ୍ୟର ବିକ୍ରିବଟା ଲାଗି ବ୍ୟବସ୍ଥା କରାଯିବ । ଦରକାର ପଡ଼ିଲେ ପ୍ରବେଶ ଟିକସ ଲଗାଯିବ । ପାଣ୍ଠିର କିଛି ପ୍ରତିଶତ ସେ ଅଞ୍ଚଳର ବିକାଶରେ ଖର୍ଚ୍ଚ କରାଯିବ ।
