ନୂଆଦିଲ୍ଲୀ,୨୪/୦୪: ଇସ୍ରାଏଲ ଓ ହମାସ୍ ଯୁଦ୍ଧକୁ ଟପିଲାଣି ଦୁଇଶହ ଦିନରୁ ଅଧିକ ସମୟ। ଗାଜା ସହରରେ ଇସ୍ରାଏଲି ସେନାର ନରସଂହାରକୁ ନେଇ ଆମେରିକା ମଧ୍ୟ ବର୍ଷିବାରେ ଲାଗିଛି। ଇସ୍ରାଏଲର ଏକ ବାଟାଲିୟନ ଉପରେ ପ୍ରତିବନ୍ଧକ ଘୋଷଣା କରିଛି ଆମେରିକା। ଏହାରି ଭିିିତରେ ଗାଜା ସହରରେ ଆଇଡିଏଫ୍ର ନୂଆ କାଣ୍ଡ ସାମ୍ନାକୁ ଆସିଛି। ହମାସ୍ ଅଧିକାରୀମାନଙ୍କର କହିବା କଥା ହେଲା ଖାନ୍ ୟୂନୁସ୍ ହସ୍ପିଟାଲ ଖୋଳିବା ବେଳେ ୨୦୦ ଜଣଙ୍କର ଶବ ବାହାରିଥିଲା। ହସ୍ପିଟାଲ ଭିତରେ ସାମୁହିକ କବ୍ରସ୍ତାନ କରିଥିବା ନେଇ ଇସ୍ରାଏଲ ଉପରେ ଅଭିଯୋଗ ଆଣିଛି ହମାସ୍। ଅନେକ ଶବ ଗୁଡ଼ିକରେ ହାତ ବନ୍ଧା ହୋଇଥିବା ବେଳେ ଆଉ କେତେକ ଦୁଷ୍କର୍ମ ପରେ ହତ୍ୟା ହୋଇଥିବା କୁହାଯାଇଛି।
ହମାସ୍ର ଅଧିକାରୀମାନେ ଦାବି କରିଛନ୍ତି ଯେ, ଶତାଧିକ ନିର୍ଦ୍ଦୋଷ ଲୋକଙ୍କୁ ଇସ୍ରାଏଲ ସେନା ହତ୍ୟା କରି ହସ୍ପିଟାଲରେ ପୋତି ଦେଇଥିଲା। ଏହାକୁ ହମାସ୍ ସାମୂହିକ କବର ବୋଲି ଅଭିଯୋଗ କରିଛି। ଟାଇମ୍ସ ଅଫ୍ ଇସ୍ରାଏଲର ରିପୋର୍ଟ ମୁତାବକ ସେହି ସ୍ଥାନରେ ଇସ୍ରାଏଲୀ ସୈନ୍ୟ ଓ ହମାସ୍ ଆତଙ୍କୀଙ୍କ ମଧ୍ୟରେ ଆକ୍ରମଣ ମଧ୍ୟରେ ମରିଥିବା ଲୋକଙ୍କର ଶବ ଏଗୁଡ଼ିକ ଅଟେ, ଯାହାକୁ ନିଜେ ପାଲେଷ୍ଟାଇନୀୟମାନେ ହସ୍ପିଟାଲ ଭିତରେ ପୋତି ଦେଇଛନ୍ତି।
ହମାସ୍ର ଏହି ଅଭିଯୋଗକୁ ଇସ୍ରାଏଲୀ ସେନାର ବରିଷ୍ଠ ଅଧିକାରୀମାନେ ଭିତ୍ତିହୀନ ବୋଲି କହିଛନ୍ତି । ଆଇଡିଏଫ୍ର ମୂଖପାତ୍ର ଏକ ବୟାନରେ କହିଛନ୍ତି ଯେ, ଇସ୍ରାଏଲ ସେମାନଙ୍କ ବନ୍ଧକଙ୍କ ସନ୍ଧାନରେ ଅଛି। ଆମ ସେନା ନାସିର୍ ହସ୍ପିଟାଲ ପାଖରେ ପାଲେଷ୍ଟାଈନୀୟଙ୍କ ଦ୍ବାରା ପୋତାଯାଇଥିବା ଶବଗୁଡ଼ିକର ଯାଞ୍ଚ କରିବା ପରେ ସେଇଠି ରଖିଦିଆଯାଇଥିଲା।
