ନୂଆଦିଲ୍ଲୀ,୪।୯: ତୃତୀୟ ଥର ପାଇଁ ବିବାହ ବନ୍ଧନରେ ବାନ୍ଧି ହେଲେ ଭାରତର ପୂର୍ବତନ ସଲିସିଟର ଜେନେରାଲ୍ ହରିଶ ସାଲଭେ। ୬୮ ବର୍ଷ ବୟସରେ ସାଲଭେଙ୍କ ତୃତୀୟ ବିବାହକୁ ନେଇ ଖୁବ ଚର୍ଚ୍ଚା। ଗତକାଲି ଲଣ୍ଡନର ଏକ ବିଳାଶପୂର୍ଣ୍ଣ ହୋଟେଲରେ ସେ କରିଛନ୍ତି ବିବାହ। ହରିଶ ସାଲଭେଙ୍କ ତୃତୀୟ ପତ୍ନୀଙ୍କ ନାଁ ହେଉଛି ତ୍ରିନା। ସେ ଜଣେ ବ୍ରିଟିଶ ବଂଶୋଦ୍ଭବ। ବିବାହ ଉତ୍ସବରେ ନୀତା ଅମ୍ବାନି, ଲଳିତ ମୋଦି, ଉଜ୍ଜ୍ୱଳା ରାଉତଙ୍କ ଭଳି ବହୁ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ।
ହରିଶ ପୂର୍ବରୁ ଦୁଇ ଦୁଇ ଥର ବିବାହ କରିସାରିଛନ୍ତି। ସେ ପ୍ରଥମେ ମୀନାକ୍ଷୀ ସାଲଭେଙ୍କୁ ବିବାହ କରିଥିଲେ। ସେମାନଙ୍କର ସାକ୍ଷି ଓ ସାନିଆ ନାମକ ଦୁଇ ଝିଅ ମଧ୍ୟ ଅଛନ୍ତି। ବିବାହର ୩୮ବର୍ଷ ପରେ ୨୦୨୦ରେ ରେ ଉଭୟଙ୍କ ବିଚ୍ଛେଦ ହୋଇଥିଲା। ଏହାପରେ ୨୦୨୦ ରେ କାରୋଲାଇନ୍ ବ୍ରୋସର୍ଡଙ୍କୁ ବିବାହ କରିଥିଲେ ସାଲଭେ। ବର୍ତ୍ତମାନ ସେ ତ୍ରିନାଙ୍କୁ ତୃତୀୟ ବିବାହ କରିଛନ୍ତି ।
ପୂର୍ବତନ ସଲିସିଟର ଜେନେରାଲ୍ ହରିଶ ଜଣେ ହାଇପ୍ରୋଫାଇଲ ଓକିଲ। ବହୁ ବିବାଦୀୟ ମାମଲାରେ ଆଇନଜୀବୀ ଭାବେ ବେଶ୍ ପରିଚିତ। ସେ ସୁପ୍ରିମକୋର୍ଟରେ ଦୀର୍ଘଦିନ ଧରି ଆଇନଜୀବୀ ଭାବେ କାର୍ଯ୍ୟ କରିଛନ୍ତି। ପାକିସ୍ତାନରେ ଗୃହବନ୍ଦୀ ଥିବା କୂଳଭୂଷଣ ଯାଦବଙ୍କ ମାମଲା ହେଉ କିମ୍ବା ସଲମାନ ଖାନ୍ଙ୍କ ହିଟ୍ ଆଣ୍ଡ ରନ୍ ମାମଲା। ସବୁଠି ତାଙ୍କର ଚର୍ଚ୍ଚା।
Former Solicitor general of India, #HarishSalve got married for the 3rd time. Nita Ambani, Lalit Modi amongst others attended the ceremony.
— Kumar Mihir Mishra (@Mihirlawyer) September 4, 2023
Hopefully he is lucky the third time. pic.twitter.com/RVSPXyTujC
ହରିଶ ସାଲଭେ ଭାରତର ଅଧିକ ପାରିଶ୍ରମିକ ନେଉଥିବା ଓକିଲଙ୍କ ମଧ୍ୟରୁ ଅନ୍ୟତମ । ଗୋଟିଏ ଦିନ ପାଇଁ ହରିଶ ୩୦ ଲକ୍ଷ ଟଙ୍କା ପର୍ଯ୍ୟନ୍ତ ପାରିଶ୍ରମିକ ନେଇଥାନ୍ତି । କିନ୍ତୁ କୁଳଭୂଷଣଙ୍କ କ୍ଷେତ୍ରରେ ମାତ୍ର ୧ ଟଙ୍କାରେ ପୂରା ମାମଲା ଲଢିଛନ୍ତି। ୨୦୧୫ରେ ହିଟ୍ ଆଣ୍ଡ ରନ୍ କେସ ମାମଲାରେ ସଲମାନ ଖାନଙ୍କୁ ୫ ବର୍ଷର ଜେଲଦଣ୍ଡ ଶୁଣାଇଥିଲେ କୋର୍ଟ । ଏପରିକି କୋର୍ଟ ରୁମରୁ ଆର୍ଥର ରୋଡ ଜେଲକୁ ସଲମାନଙ୍କୁ ନିଆଯିବାକୁ ପ୍ରସ୍ତୁତି ଚାଲିଥିବା ବେଳେ ପହଞ୍ଚିଥିଲେ ହରିଶ । ଆଉ ସଲମାନଙ୍କ ପାଇଁ ପକ୍ଷ ରଖିବା ସହ ଜାମିନ କରାଇବାରେ ବଡ ଭୂମିକା ଗ୍ରହଣ କରିଥିଲେ । ସେହିଭଳି ଭୋଡାଫୋନ ଟ୍ୟାକ୍ସ ମାମଲା, ରିଲାଏନ୍ସ ଗ୍ୟାସ ବିବାଦରେ ମୁକେଶ ଅମ୍ବାନିଙ୍କ ପାଇଁ ମାମଲା ଲଢିଛନ୍ତି ହରିଶ। ୧୯୯୯ ରୁ ନଭେମ୍ବର ୨୦୨୨ ପର୍ଯ୍ୟନ୍ତ ଭାରତର ସଲିସିଟର ଜେନେରାଲ ଭାବରସେ କାର୍ଯ୍ୟ କରିଥିଲେ। ହରିଶ ଜାନୁଆରୀରେ ୱେଲ୍ସ ଆଣ୍ଡ ଇଂଲଣ୍ଡ କୋର୍ଟ ପାଇଁ କ୍ୟୁଇନ୍ସ ପରାମର୍ଶଦାତା ଭାବରେ ନିଯୁକ୍ତ ହୋଇଥିଲେ। ଉଲ୍ଲେଖନୀୟ ଯେ, ୨୦୧୫ରେ ସାଲଭେଙ୍କୁ ପଦ୍ମ ଭୂଷଣ ପ୍ରଦାନ କରାଯାଇଥିଲା।
