ନୂଆଦିଲ୍ଲୀ,୨୮/୯: ଦରଦାମ ବୃଦ୍ଧି ଭାରତୀୟଙ୍କ ନିଦ ହଜାଇଦେଲାଣି । ସବୁକିଛି ମହଙ୍ଗା । ଦରମା ସ୍ଥିର ଥିବାବେଳେ ଖର୍ଚ୍ଚ ବଢ଼ିଚାଲିଛି । ଖାଦ୍ୟସାମଗ୍ରୀ, ପନିପରିବା, ଇନ୍ଧନଠାରୁ ଆରମ୍ଭ କରି ସବୁକିଛି ପକେଟ୍କୁ ବାଧୁଛି । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ ହେଲା ସ୍ୱାସ୍ଥ୍ୟସେବା ଖର୍ଚ୍ଚ । ଚିକିତ୍ସା ଖର୍ଚ୍ଚରେ ବ୍ୟାଙ୍କ୍ ବାଲାନ୍ସ ସଫା ହୋଇଯାଉଛି । ବର୍ଷକୁ ବର୍ଷ ମେଡକାଲ ବିଲ୍ ୧୪% ହାରରେ ବଢୁଥିବା ଏକ ରିପୋର୍ଟରୁ ଜଣାପଡ଼ିଛି ।
ସମ୍ପ୍ରତି ଜୀବନଶୈଳୀ ଯେଉଁଭଳି ଭାବେ ବଦଳୁଛି ନୂଆ ନୂଆ ରୋଗ ମନୁଷ୍ୟ ଶରୀରକୁ ମାଡ଼ିବସୁଛି । ଚିକିତ୍ସା ବିଲ୍ ଚଉଡ଼ା ହୋଇଚାଲିଥିବାବେଳେ ସାଧାରଣ ଲୋକଙ୍କ ପାଇଁ ଏ ବାବଦ ଖର୍ଚ୍ଚ ଉଠାଇବା କାଠିକର ପାଠ୍ ପାଲଟିଛି । ଆକୋ ଇଣ୍ଡିଆ ହେଲ୍ଥ ଇନ୍ସ୍ୟୁରାନ୍ସ ଇଣ୍ଡେକ୍ସ-୨୦୨୪ ଅନୁସାରେ, ଦୁଇଅଙ୍କ ମୁଦ୍ରାସ୍ଫୀତି ସ୍ୱାସ୍ଥ୍ୟସେବା ବାବଦ ଖର୍ଚ୍ଚକୁ ବହୁ ଗୁଣା କରିଛି । ରିପୋର୍ଟ ଅନୁସାରେ, ଲୋକେ କରଜ କରି ହସ୍ପିଟାଲ ଖର୍ଚ୍ଚର ୨୩% ଉଠାଉଛନ୍ତି । ଏହା ପରିବାରଗୁଡ଼ିକର ଆର୍ଥିକ ମେରୁଦଣ୍ଡ ଭାଙ୍ଗିଦେଉଛି । ୬୨% ଚିକିତ୍ସା ଖର୍ଚ୍ଚ ପକେଟରୁ ଯାଉଛି । ଅପ୍ରତ୍ୟାଶିତ ସ୍ୱାସ୍ଥ୍ୟ ସଂକଟରୁ ଲୋକଙ୍କୁ ସୁରକ୍ଷା ଦେବା ପାଇଁ ଉନ୍ନତ ସ୍ୱାସ୍ଥ୍ୟ କଭରେଜ୍ର ଆବଶ୍ୟକତା ରହିଥିବା ରିପୋର୍ଟରେ ଉଲ୍ଲେଖ କରାଯାଇଛି ।
ରିପୋର୍ଟ ଅନୁସାରେ, ଭାରତରେ କିଡ୍ନୀ ରୋଗ ପାଇଁ ସ୍ୱାସ୍ଥ୍ୟ ବୀମା କ୍ଲେମ୍ ଦିଲ୍ଲୀରେ ସର୍ବାଧିକ ରହିଛି। ଏହା ପଛକୁ ରହିଛି କୋଚି । କିଡ୍ନୀ ରୋଗର ରାଜଧାନୀ ହେଉଛି ଦିଲ୍ଲୀ । ଏହା ପଛକୁ କୋଚି ରହିଥିବା ରିପୋର୍ଟରେ କୁହାଯାଇଛି । କିଡ୍ନୀ ସ୍ୱାସ୍ଥ୍ୟ ସଂକ୍ରାନ୍ତ କ୍ଲେମ୍ କ୍ଷେତ୍ରରେ ଦିଲ୍ଲୀ ଏନ୍ସିଆର୍ର ଭାଗ ସର୍ବାଧିକ ରହିଛି । କ୍ଲେମ୍ କ୍ଷେତ୍ରରେ କୋଚି, ସିକନ୍ଦରାବାଦ, ବେଙ୍ଗାଲୁରୁ ଏବଂ ଜୟପୁରର ସେୟାର ଜାତୀୟ ହାରାହାରି ତୁଳନାରେ ଅଧିକ ରହିଥିବା ଇଣ୍ଡେକ୍ସ ରିପୋର୍ଟରେ ଉଲ୍ଲେଖ କରାଯାଇଛି । କିଡ୍ନୀ ସମସ୍ୟା ରହିଥିବା ରୋଗୀମାନଙ୍କ ହାରାହାରି ବୟସ ୪୭ ରହିଛି । ସେହିଭଳି କିଡ୍ନୀଜନିତ ସମସ୍ୟା ପାଇଁ ସର୍ବାଧିକ ବିଲ୍ ୨୪,୭୩,୮୯୪ ଟଙ୍କାରେ ପହଞ୍ଚିଥିବା ଏଥିରେ କୁହାଯାଇଛି । କୋଲ୍କାତା ଏବଂ ମୁମ୍ବାଇରେ ହୃଦରୋଗ କ୍ଲେମ୍ ସର୍ବାଧିକ ରହିଛି । ବିଶେଷକରି ୩୧ରୁ ୫୦ ବର୍ଷ ବୟସ ମଧ୍ୟରେ ଏ ସମସ୍ୟା ଅଧିକ ରହୁଥିବା ଜଣାପଡ଼ିଛି । ମେଟ୍ରୋ ସହରଗୁଡ଼ିକ ମଧ୍ୟରେ ଦୃଦ୍ଘାତ ମୁମ୍ବାଇରେ ଅଧିକ ହେଉଥିବା ରିପୋର୍ଟରେ ଉଲ୍ଲେଖ କରାଯାଇଛି । ୨୦୨୦ରୁ ୨୦୨୫ ମଧ୍ୟରେ କ୍ୟାନ୍ସର ମାମଲା ୧୩% ବଢିଥିବା ଏଥିରେ କୁହାଯାଇଛି ।
