ନୂଆଦିଲ୍ଲୀ, ୨୦/୦୩: ଚଳିତବର୍ଷ ୨୫ ତାରିଖରେ ପଡ଼ୁଛି ରଙ୍ଗର ପର୍ବ ହୋଲି । ହୋଲି ପାଇଁ ସମସ୍ତେ ପ୍ରସ୍ତୁତି ଆରମ୍ଭ କରି ଦେଇଛନ୍ତି । ରଙ୍ଗ ଖେଳିବା ସମୟରେ ଅନେକଙ୍କ ମୋବାଇଲ୍ ଫୋନ୍ ପାଣି ବାଜି ଖରାପ ହୋଇ ଯାଇଥାଏ । ତେଣୁ ହୋଲି ଦିନ ଫୋନକୁ ସୁରକ୍ଷିତ ରଖିବା ଜରୁରୀ । ଆସନ୍ତୁ ଜାଣିବା ହୋଲିରେ କେମିତି ମୋବାଇଲ୍ ଫୋନକୁ ରଖିବେ ସୁରକ୍ଷିତ ?
ହୋଲି ଦିନ ଆପଣ ବାହାରକୁ କିମ୍ବା କାହା ଘରକୁ ଯିବା ସମୟରେ ମୋବାଇଲକୁ ଏୟାର ଟାଇଟ୍ ଜିପଲକ୍ ଅଥବା ୱାଟରପ୍ରୁଫ୍ ପାଉଚରେ ରଖନ୍ତୁ । ଏଭଳି କଲେ ରଙ୍ଗ ଖେଳିବା ସମୟରେ ଆପଣଙ୍କ ସ୍ମାର୍ଟଫୋନ୍ ସମ୍ପୂର୍ଣ୍ଣ ସୁରକ୍ଷିତ ରହିବ ।
ହୋଲି ଦିନ ଆପଣଙ୍କ ଫୋନର ପୋର୍ଟ୍ସ ଯେଭଳି ସ୍ପିକର ଗ୍ରିଲ୍, ଚାର୍ଜିଂ ପୋର୍ଟ୍ସ ଆଦିକୁ ଡକ୍ଟ ଟେପ୍ ଜରିଆରେ ବନ୍ଦ କରି ଦେବା ଆବଶ୍ୟକ । ଡକ୍ଟ ଟେପ୍ ଲଗାଇବା ସମୟରେ ଧ୍ୟାନ ଦେବେ ଫୋନ୍ ଯେଭଳି ସାଇଲେଣ୍ଟ ଥିବ । ରଙ୍ଗ ଖେଳ ଦିନ ଆପଣ ଇୟରଫୋନ୍ ଅଥବା ଇୟରବଡ୍ ଲଗାଇ ବାହାରକୁ ବାହାରନ୍ତୁ ନାହିଁ । ଯଦି ଲଗାଇ ଯାଉଛନ୍ତି ତାହେଲେ ଯିବା ପୂର୍ବରୁ ତା ଉପରେ ଗ୍ଲିସରିନ୍ ଲଗାନ୍ତୁ।
ରଙ୍ଗ ଖେଳ ବେଳେ ଯଦି ଅସାବଧାନତା ବଶତଃ ସ୍ମାର୍ଟଫୋନରେ ପାଣି ପଶିଯାଏ ତ ଫୋନକୁ ଚାର୍ଜରେ ବସାଇବାର ଭୁଲ୍ କରନ୍ତୁ ନାହିଁ । ଫୋନରେ ପାଣି ପଶିଗଲେ କିଛି ସମୟ ଖରାରେ ରଖି ଶୁଖିବାକୁ ଦିଅନ୍ତୁ । ଫୋନ୍ ଶୁଖିଯିବା ପରେ ସର୍ଭିସ୍ ସେଣ୍ଟରକୁ ନେଇ ଯାଆନ୍ତୁ ।