କଟକ,୦୫/୧୨: ବହୁଚର୍ଚ୍ଚିତ ସେକ୍ସ ସ୍କାଣ୍ଡାଲ୍ ଓ ବ୍ଲାକ୍ମେଲିଂ ଘଟଣାରେ ଗିରଫ ଅର୍ଚ୍ଚନା ନାଗ୍ଙ୍କୁ ସୋମବାର ହାଇକୋର୍ଟରୁ ଜାମିନ୍ ମିଳିଛି । ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ରୁଜୁ ଏହି ମାମଲାରେ ୨ ଲକ୍ଷ ଟଙ୍କା ଏବଂ ଦୁଇ ଜଣ ଜାମିନ୍ଦାରଙ୍କ ବଦଳରେ ଅର୍ଚ୍ଚନା ଜାମିନରେ ଯିବେ ବୋଲି ହାଇକୋର୍ଟର ବିଚାରପତି ଜଷ୍ଟିସ୍ ଗୌରୀଶଙ୍କର ଶତପଥୀ ନିର୍ଦ୍ଦେଶ ଦେଇଛନ୍ତି । ପୂର୍ବରୁ ପୁଲିସ ପକ୍ଷରୁ ରୁଜୁ ଦୁଇଟି ମାମଲାରେ ତାଙ୍କୁ ଜାମିନ୍ ମିଳିସାରିଛି । ଏହି ତୃତୀୟ ମାମଲାରେ ଜାମିନ୍ ମିଳିବା ଫଳରେ ଅର୍ଚ୍ଚନା ଏବେ ଜେଲରୁ ମୁକୁଳିପାରିବେ ।
ବିବାହ ପ୍ରତିଶ୍ରୁତି ଦେଇ ଯୁବତୀଙ୍କୁ ଦୁଷ୍କର୍ମ ମାମଲା: ସୌରିନ୍ଙ୍କ ନାଁରେ ଏନ୍ବିଡବ୍ଲୁ ଜାରି
ହାଇକୋର୍ଟ ରାୟ ପ୍ରକାଶ କରି କହିଛନ୍ତି, ଏହି ମାମଲାରେ ଆବେଦନକାରିଣୀ ଗିରଫ ହେବାର ଗୋଟେ ବର୍ଷ ପରେ ବି ନିମ୍ନ ଅଦାଲତରେ ବିଚାର (ଟ୍ରାଏଲ୍) ଆରମ୍ଭ ହୋଇନାହିଁ । ତାଙ୍କର ଜଣେ ସହଯୋଗୀ ଏଯାଏ ଗିରଫ ହୋଇନଥିବାରୁ ତାଙ୍କ ବିରୋଧରେ ଜାମିନ୍ବିହୀନ ପରୱାନା ମଧ୍ୟ ଜାରି କରାଯାଇଛି । ତେଣୁ ନିକଟ ଭବିଷ୍ୟତରେ ଟ୍ରାଏଲ୍ ଆରମ୍ଭ ହେବା ନେଇ କୌଣସି ପ୍ରକାର ସମ୍ଭାବନା ଦେଖାଯାଉ ନାହିଁ। ଏସବୁକୁ ଆଧାର କରି ହାଇକୋର୍ଟ ଅର୍ଚ୍ଚନା ନାଗ୍ଙ୍କୁ ଜାମିନ୍ ପ୍ରଦାନ କରିଛନ୍ତି । ଅର୍ଚ୍ଚନା ଯଦି ଜାମିନ୍ ପାଇଁ ଧାର୍ଯ୍ୟ ସର୍ତ୍ତ ଭାଙ୍ଗନ୍ତି ତାହେଲେ ନିମ୍ନ ଅଦାଲତ ଏହି ଜାମିନ ଖାରଜ କରିପାରିବେ ବୋଲି ହାଇକୋର୍ଟ ସ୍ପଷ୍ଟ କରିଛନ୍ତି । ଆବେଦନକାରିଣୀଙ୍କ ପକ୍ଷରୁ ଆଇନଜୀବୀ ଜୟଦୀପ ପାଲ୍ ମାମଲା ପରିଚାଳନା କରୁଥିଲେ ।
ଉଲ୍ଲେଖଯୋଗ୍ୟ, ପ୍ରତିଷ୍ଠିତ ଲୋକଙ୍କୁ ବ୍ଲାକ୍ମେଲ୍ କରି ଲକ୍ଷ ଲକ୍ଷ ଟଙ୍କା ଆଦାୟ କରୁଥିବା ଅଭିଯୋଗରେ ପ୍ରଥମେ ପୁଲିସ୍ ଏବଂ ପରେ ଇଡି ଅର୍ଚ୍ଚନା ନାଗ୍, ତାଙ୍କ ସ୍ୱାମୀ ଏବଂ କିଛି ସହଯୋଗୀଙ୍କ ନାମରେ ମାମଲା ରୁଜୁ କରିଥିଲା । ଏହି ମାମଲାରେ ଅର୍ଚ୍ଚନା ନାଗ୍ ୨୦୨୨ ଡିସେମ୍ବର ୧୩ରେ ଗିରଫ ହୋଇଥିଲେ । ନିମ୍ନ ଅଦାଲତରୁ ଜାମିନ୍ ଖାରଜ ପରେ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।
