ନୂଆଦିଲ୍ଲୀ ୧୫/୦୪: ମଧ୍ୟପ୍ରଦେଶର ରିଭାରେ ଚୋରି ମାମଲାରେ କାର୍ଯ୍ୟାନୁଷ୍ଠାନ ନ ହେବାରୁ ଅସନ୍ତୁଷ୍ଟ ହୋଇ ଏକ ଦମ୍ପତି ନିଆରା ଉପାୟରେ ନିଜର ବିରୋଧ ପ୍ରଦର୍ଶନ କରିଛନ୍ତି । ସେମାନେ ଆରତୀର ଥାଳି ଓ ଫୁଲ ମାଳା ନେଇ ସିଟି କୋତୱାଲି ଥାନାରେ ପହଞ୍ଚିଥିଲେ । ଏହାପରେ ଉପସ୍ଥିତ ଥାନା ପ୍ରଭାରୀଙ୍କର ଆରତୀ କରିଥିଲେ । ଘଟଣାଟି ଏହିପରି । ରିଭାର ବାସିନ୍ଦା ଅନୁରାଧା ସୋନି ଓ ତାଙ୍କର ସ୍ୱାମୀ ଜାନୁଆରୀ ୨୮ ତାରିଖରେ ଚୋରି ନେଇ ଏକ ଅଭିଯୋଗ ଦାଖଲ କରିଥିଲେ । ପରବର୍ତ୍ତୀ ସମୟରେ ପୁଲିସ ଚୋରକୁ ଚିହ୍ନଟ କରିଥିଲା । କିନ୍ତୁ ଦୀର୍ଘ ୨ ମାସରୁ ଅଧିକ ସମୟ ହୋଇଯାଇଥିଲେ ମଧ୍ୟ ତାକୁ ଧରିବାରେ ସକ୍ଷମ ହୋଇନଥିଲା । ସେଥିଯୋଗୁ ଦମ୍ପତି ଭୀଷଣ ଅସନ୍ତୁଷ୍ଟ ଥିଲେ ।
ଗତ ୬ ତାରିଖରେ ସେମାନେ ହାତରେ ପୂଜା ଥାଳି, ନଡ଼ିଆ, ଫୁଲମାଳା ନେଇ ପୁଲିସ ଷ୍ଟେସନ ପହଞ୍ଚିଥିଲେ । ସେଠାରେ ପୁଲିସର କାର୍ଯ୍ୟକୁ ପ୍ରଶଂସା କରିବା ସହିତ ଉପସ୍ଥିତ ଥିବା ଥାନା ପ୍ରଭାରୀ ଜେପି ପଟେଲଙ୍କର କୋଠରୀ ମଧ୍ୟରେ ପ୍ରବେଶ କରି ତାଙ୍କର ଆରତୀ କରିଥିଲେ । ଏଭଳି ନିଆରା ବିରୋଧ ପ୍ରଦର୍ଶନ ଯୋଗୁ ଉପସ୍ଥିତ ପୁଲିସକର୍ମୀମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ । ପରେ ପତି-ପତ୍ନୀଙ୍କୁ ଥାନାରୁ ବାହାର କରି ଦିଆଯାଇଥିଲା । ଏହାପରେ ଥାନା ପ୍ରଭାରୀ ଜେପି ପଟେଲ କହିଛନ୍ତି, ଖୁବ୍ ଶୀଘ୍ର ଏ ସଂପର୍କରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଅଭିଯୁକ୍ତ ଫେରାର ଥିବାବେଳେ ପରେ ହାଇକୋର୍ଟରେ ଆବେଦନ କରି ଆଗୁଆ ଜାମିନ ହାସଲ କରିନେଇଥିଲେ । ମାମଲା ସାମ୍ନାକୁ ଆସିବା ପରେ ଅଭିଯୁକ୍ତଙ୍କର ସନ୍ଧାନ କରାଯାଉଥିଲା । ସେପଟେ ପୁଲିସର କାର୍ଯ୍ୟରେ ବାଧା ସୃଷ୍ଟି କରିବା, ପୁଲିସର ଅପମାନ କରିବା ନେଇ ଦମ୍ପତିଙ୍କ ବିରୋଧରେ ଏକ ମାମଲା ରୁଜୁ ହୋଇଛି ।