ନୂଆଦିଲ୍ଲୀ ୦୪/୦୫: ଆପଣ କେବେ ଇଂରାଜୀ ବର୍ଣ୍ଣମାଳାକୁ ପଛୁଆ ଟାଇପ୍ କରିବାକୁ ଉଦ୍ୟମ କରିଛନ୍ତି? ପଛୁଆ ଭାବେ ଟାଇପ୍ କରିବା କଥା ଛାଡ଼ନ୍ତୁ, ଅନେକ ଲୋକଙ୍କ ଲାଗି ଶୀଘ୍ର ଶୀଘ୍ର ଟାଇପ୍ କରିବା ଅତି କଷ୍ଟକର କାମ ହୋଇଥାଏ । ଏଭଳି କ୍ଷେତ୍ରରେ ତେଲଙ୍ଗାନା, ହାଇଦ୍ରାବାଦର ଜଣେ ବ୍ୟକ୍ତି ଇଂରାଜୀ ବର୍ଣ୍ଣମାଳାକୁ ୩ ସେକେଣ୍ଡରୁ କମ୍ ସମୟରେ ପଛୁଆ ଟାଇପ୍ କରି ଗିନିଜ୍ ରେକର୍ଡ ସ୍ଥାପନ କରିଛନ୍ତି । ସେ ହେଲେ ଏସ୍କେ ଅଶରଫ । ସେ ପେସାରେ ଜଣେ ଓକିଲ ।
ଗତ ଫେବ୍ରୁଆରୀ ୫ ତାରିଖରେ ମାତ୍ର ୨.୮୮ ସେକେଣ୍ଡ୍ ସମୟ ମଧ୍ୟରେ ସେ ଏହି ଉପଲବ୍ଧି ହାସଲ କରିଥିଲେ । ଗିନିଜ୍ ରେକର୍ଡ ପକ୍ଷରୁ ନିକଟରେ ଏହାର ଏକ ଭିଡିଓକୁ ସୋସିଆଲ ମିଡିଆରେ ସେୟାର କରାଯାଇଛି । ଭିଡିଓରେ ଦେଖିବାକୁ ମିଳୁଛି ଯେ ଲାପ୍ଟପ୍ର ସ୍କ୍ରିନ୍ ଖୋଲିବା ମାତ୍ରେ ଆଖି ପିଛୁଳାକେ ଅଶରଫ୍ ଇଂରାଜୀ ବର୍ଣ୍ଣମାଳାର ୨୬ଟି ଯାକ ଅକ୍ଷରକୁ ପଛୁଆ ଟାଇପ୍ କରି ପକାଉଛନ୍ତି । ତାଙ୍କର ବିରଳ ଉପଲବ୍ଧିର ଏହି ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ୍ ହେଉଛି । ଅଶରଫ ପ୍ରଥମ ଥର ଗିନିଜ୍ ରେକର୍ଡର ଅଧିକାରୀ ହୋଇନାହାନ୍ତି । ସବୁଠୁ ଶୀଘ୍ର ବର୍ଣ୍ଣମାଳା ଟାଇପ୍ କରିବା ନେଇ ତାଙ୍କୁ ପୂର୍ବରୁ ଗିନିଜ୍ ରେକର୍ଡରେ ସ୍ଥାନ ମିଳିଥିଲା ।