କାନପୁର,୨୭/୦୯: ଶୁକ୍ରବାରଠୁ ଘରୋଇ ଭାରତ ଓ ବାଂଲାଦେଶ ମଧ୍ୟରେ ଆରମ୍ଭ ହେବ ଦ୍ୱିତୀୟ ଟେଷ୍ଟ । ୩ବର୍ଷ ପରେ ଗ୍ରୀନ୍ ପାର୍କ ଷ୍ଟାଡ଼ିୟମ୍କୁ ଟେଷ୍ଟ କ୍ରିକେଟ୍ ଫେରିଛି । ଦୁଇ ଦଳ ଗତ ୩ଦିନ ଧରି ଜୋରଦାର ଅଭ୍ୟାସ କରିବା ପରେ ପିଚ୍ ଓ ସ୍ଥାନୀୟ ଜଳବାୟୁକୁ ଦେଖି ରଣନୀତି ପ୍ରସ୍ତୁତ କରିଛନ୍ତି । ପ୍ରଥମ ଟେଷ୍ଟକୁ ୨୨୮ ରନ୍ରେ ଜିତିବା ପରେ ଭାରତର ନଜର ଏବେ ‘କ୍ଲିନ୍ ସୁଇପ’ ଉପରେ । ବାଂଲାଦେଶ ମଧ୍ୟ କଡ଼ା ଟକ୍କର ଦେବାକୁ ପ୍ରସ୍ତୁତ ।
ଭାରତର ଏହା ସବୁଠୁ ସଫଳ ଟେଷ୍ଟ କ୍ରିକେଟ୍ ଗ୍ରାଉଣ୍ଡ । ଏଠାରେ ଭାରତ ୨୩ଟି ଟେଷ୍ଟ ଖେଳିଛି ଓ ୭ଟିରେ ବିଜୟ ହାସଲ କରିଛି । ୩ଟି ଟେଷ୍ଟରେ ଦଳ ପରାଜିତ ହୋଇଥିବାବେଳେ ବାକି ୧୩ଟି ଟେଷ୍ଟ ଡ୍ର’ ରହିଛି । ମୋଟ୍ ଉପରେ କହିବାକୁ ଗଲେ ୧୯୮୩ ପରଠୁ ଭାରତ ଏହି ଗ୍ରାଉଣ୍ଡ୍ରେ କୌଣସି ଟେଷ୍ଟ ହାରି ନାହିଁ । ଶେଷ ଥର ପାଇଁ ୨୦୨୧ରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଏଠାରେ ଏକ ଟେଷ୍ଟ ଖେଳାଯାଇଥିଲା । ନ୍ୟୁଜିଲାଣ୍ଡ ଲଢୁଆ ଖେଳ ପ୍ରଦର୍ଶନ କରି ମ୍ୟାଚ୍କୁ ଡ୍ର’ ରଖିବାରେ ସଫଳ ହୋଇଥିଲା । ଶ୍ରେୟାସ ଆୟର ଉଭୟ ଇନିଂସରେ ଯଥାକ୍ରମେ ଶତକ ଓ ଅର୍ଦ୍ଧଶତକ ଅର୍ଜନ କରିଥିଲେ ।
ଚେନ୍ନାଇ ଭଳି ଭାରତୀୟ ଦଳ ଗ୍ରୀନ୍ ପାର୍କରେ ମଧ୍ୟ ଆଧିପତ୍ୟ ଜାରି ରଖିବ ବୋଲି ଅନୁମାନ କରାଯାଉଛି । ମାତ୍ର ପିଚ୍ ଓ ଜଳବାୟୁ ସବୁ ପୂର୍ବାନୁମାନକୁ ବିଗାଡ଼ି ଦେବାର ଯଥେଷ୍ଟ ସମ୍ଭାବନା ରହିଛି । ଦ୍ୱିତୀୟ ଟେଷ୍ଟ ପାଇଁ କ୍ୟୁରେଟର କଳାମାଟିରେ ପିଚ୍ ପ୍ରସ୍ତୁତ କରିଛନ୍ତି । ତେଣୁ ସ୍ପିନରମାନେ ଏଠାରେ ସଫଳତା ପାଇବେ । ମାତ୍ର ପ୍ରଥମ ୩ ଦିନ ବର୍ଷା ସମ୍ଭାବନା ରହିଥିବାରୁ ପିଚ୍ ଏତେ ଶୀଘ୍ର ଶୁଷ୍କ ହେବ ନାହିଁ । ତେଣୁ ସ୍ପିନରଙ୍କୁ ମଧ୍ୟ ଅପେକ୍ଷା କରିବାକୁ ହେବ । ଏଭଳି ପରିସ୍ଥିତିରେ ଏକାଦଶ ଚୟନ କରିବା ମଧ୍ୟ କଷ୍ଟକର ହେବ । ଭାରତ ମଧ୍ୟ ଏକାଦଶ ଚୟନକୁ ନେଇ ଚୁପ ରହିଛି ।
ଚେନ୍ନାଇରେ ୨ଜଣ ସ୍ପିନରଙ୍କୁ ନେଇ ଭାରତ ଖେଳିଥିଲା । ମାତ୍ର ଗ୍ରୀନ୍ ପାର୍କରେ ୩ସ୍ପିନର ରଣନୀତି ଆପଣେଇପାରେ । ତୃତୀୟ ସ୍ପିନର ସ୍ଥାନ ପାଇଁ ଅକ୍ଷର ପଟେଲ ଓ କୁଲଦୀପ ଯାଦବଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ । ୨୦୨୧ରେ ଅନୁଷ୍ଠିତ ଟେଷ୍ଟର ପ୍ରଥମ ଇନିଂସରେ ଅକ୍ଷର ୫ଟି ୱିକେଟ୍ ନେଇଥିଲେ । ମାତ୍ର କୁଲଦୀପଙ୍କ ଏହା ଘରୋଇ ଗ୍ରାଉଣ୍ଡ୍ । ତେଣୁ କୁଲଦୀପ ଖେଳିବା ଆଶା ବଢି ଯାଇଛି ।
ବାଂଲାଦେଶ ମଧ୍ୟ ବିଶେଷ ପରିବର୍ତ୍ତନ କରିବ ନାହିଁ । କେବଳ ଜଣେ ପେସ୍ ବୋଲରଙ୍କୁ ବିଶ୍ରାମ ଦେଇ ଅଭିଜ୍ଞ ତାଇଜୁଲ ଇସଲାମଙ୍କୁ ଖେଳାଇବା ଏକ ପ୍ରକାର ନିଶ୍ଚିତ । ତାଇଜୁଲ ଖେଳିଲେ ସାକିବ ଅଲ୍ ହାସନଙ୍କ ଉପରୁ ଚାପ ହ୍ରାସ ପାଇବ ।
ପ୍ରଥମ ଟେଷ୍ଟରେ ଶତକ ଅର୍ଜନ କରିଥିବା ଶୁଭମନ ଗିଲ ଓ ରିଷଭ ପନ୍ତ ଏଥର ମଧ୍ୟ ଦର୍ଶକଙ୍କ ନଜରରେ ରହିବେ । ମାତ୍ର ଅନ୍ୟ କିଛି ଖେଳାଳିଙ୍କ ପାଇଁ ରେକର୍ଡ ଅପେକ୍ଷା କରି ରହିଛି ।
> ରବିନ୍ଦ୍ର ଜାଡେଜା ଗୋଟିଏ ୱିକେଟ୍ ନେଲେ ସପ୍ତମ ଭାରତୀୟ ବୋଲର ଭାବେ ୩୦୦ ଟେଷ୍ଟ ୱିକେଟ୍ କ୍ଲବ୍ରେ ସାମିଲ ହେବେ । କେବଳ ସେତିକି ନୁହେଁ, ସେ ବିଶ୍ୱର ୧୧ତମ ଖେଳାଳି ଭାବେ ଟେଷ୍ଟ କ୍ରିକେଟ୍ରେ ୩୦୦ ୱିକେଟ୍ ଓ ୩୦୦୦ ରନ୍ ପୂରଣ କରିବେ ।
> ତାଇଜୁଲ ୨୦୦ ଟେଷ୍ଟ ୱିକେଟ୍ କ୍ଲବ୍ରେ ସାମିଲ ହେବା ପାଇଁ ଆଉ ମାତ୍ର ୫ଟି ୱିକେଟ୍ ଆବଶ୍ୟକ କରୁଛନ୍ତି । ସେ ବାଂଲାଦେଶର ଦ୍ୱିତୀୟ ବୋଲର ଭାବେ ଏହି ସଫଳତା ଅର୍ଜନ କରିପାରିବେ । କେବଳ ସାକିବ ସର୍ବାଧିକ ୨୪୨ଟି ୱିକେଟ୍ ନେଇଛନ୍ତି ।
> ଷ୍ଟାର୍ ବ୍ୟାଟର ବିରାଟ କୋହଲି ଆଉ ୧୨୯ ରନ୍ କଲେ ଟେଷ୍ଟ କ୍ରିକେଟ୍ରେ ୯୦୦୦ ରନ ପୂରଣ କରିବେ ।
ଚର୍ଚ୍ଚାରେ ପିଚ୍: କାନପୁର ପିଚ୍ ପାରମ୍ପରିକ ଭାବେ ସ୍ପିନରଙ୍କୁ ସହାୟତା କରି ଆସିଛି । ବ୍ୟାଟିଂ ପାଇଁ ମଧ୍ୟ ପିଚ୍ ବେଶ୍ ଅନୁକୂଳ । ମୋଟ୍ ଉପରେ କହିବାକୁ ଗଲେ ଗ୍ରୀନ ପାର୍କ ଆଦର୍ଶ ଟେଷ୍ଟ କ୍ରିକେଟ୍ ପିଚ୍ ପ୍ରସ୍ତୁତ କରି ପ୍ରଶଂସା ସାଉଁଟିଛି । ପ୍ରଥମ ଦିନର ପ୍ରଥମାର୍ଦ୍ଧରେ ପିଚ୍ ପେସ୍ ବୋଲରଙ୍କୁ ସୁହାଇବ । ଦିନ ବଢିବା ସହ ପିଚରୁ ବ୍ୟାଟରମାନେ ଫାଇଦା ଉଠାଇ ପାରିବେ । ଶେଷ ୨ ଦିନରେ ସ୍ପିନରମାନଙ୍କୁ ପିଚ୍ ସହାୟତା କରିବ ।
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା(ଅଧିନାୟକ), ଯଶସ୍ୱୀ ଜୈସ୍ୱାଲ୍, ଶୁଭମନ ଗିଲ୍, ବିରାଟ କୋହଲି, କେଏଲ ରାହୁଲ, ରିଷଭ ପନ୍ତ, ରବିନ୍ଦ୍ର ଜାଡେଜା, ରବି ଚନ୍ଦ୍ରନ ଅଶ୍ୱିନ, କୁଲଦୀପ ଯାଦବ/ଅକ୍ଷର ପଟେଲ, ଯଶପ୍ରୀତ ବୁମରା, ମହମ୍ମଦ ସିରାଜ ।
ବାଂଲାଦେଶ: ସଦମନ ଇସଲାମ, ଜାକିର ହାସାନ, ନଜମୁଲ ହୋସେନ ଶାନ୍ତୋ(ଅଧିନାୟକ), ମୋମିନୁଲ ହକ୍, ମୁସଫିକର ରହିମ, ଲିଟନ ଦାସ, ସାକିବ ଅଲ୍ ହାସନ, ମେହଦି ହାସାନ ମିରାଜ, ତାଇଜୁଲ୍ ଇସଲାମ, ଟସ୍କିନ ଅହମ୍ମଦ, ହାସାନ ମାହମୁଦ ।
