ନୂଆଦିଲ୍ଲୀ,୧୬/୦୪: ଚଳିତବର୍ଷ ମାର୍ଚ୍ଚରେ ଦେଶର ରପ୍ତାନିରେ ହ୍ରାସ ଦେଖାଦେଇଛି । ଏହି ସମୟରେ ଦେଶରୁ ମୋଟ ୪୧୬୮ କୋଟି ଡଲାର ମୂଲ୍ୟର ସାମଗ୍ରୀ ବିଦେଶକୁ ରପ୍ତାନି ହୋଇଛି । ତେବେ ସମଗ୍ର ୨୦୨୩-୨୪ ଆର୍ଥିକବର୍ଷରେ ରପ୍ତାନି ୩.୧୧% ସଂକୁଚିତ ହୋଇଛି । ଆଲୋଚ୍ୟ ସମୟରେ ଦେଶରୁ ମୋଟ ୪୩୭୦୬ କୋଟି ଡଲାର ମୂଲ୍ୟର ସାମଗ୍ରୀ ରପ୍ତାନି ହୋଇଛି । ଭୁ-ରାଜନୈତିକ ସମସ୍ୟା ବିଶ୍ୱ ବଜାରକୁ ପ୍ରଭାବିତ କରିଛି । ଏହାର ପ୍ରଭାବ ଭାରତର ରପ୍ତାନି ଉପରେ ପଡ଼ିଥିବା ବିଶେଷଜ୍ଞମାନେ ପ୍ରକାଶ କରିଛନ୍ତି ।
ଆମଦାନିରେ ମଧ୍ୟ ହ୍ରାସ ଘଟିଛି । ଗତ ମାର୍ଚ୍ଚ ମାସରେ ଦେଶର ଆମଦାନିରେ ୫.୯୮% ହ୍ରାସ ଦେଖାଦେଇଛି । ଏହି ସମୟରେ ଦେଶକୁ ମୋଟ ୫୭୨୮ କୋଟି ଡଲାର ମୂଲ୍ୟର ସାମଗ୍ରୀ ଆମଦାନି ହୋଇଛି । ଏଥିସହିତ ବାଣିଜ୍ୟ ନିଅଣ୍ଟ ୧୫୬୦ କୋଟି ଡଲାର ରହିଛି ।
ସୋମବାର ଜାରି ହୋଇଥିବା ବାଣିଜ୍ୟ ମନ୍ତ୍ରାଳୟ ତଥ୍ୟ ଅନୁସାରେ, ୨୦୨୩-୨୪ରେ ଦେଶକୁ ମୋଟ ୬୭୭୨୪ କୋଟି ଡଲାର ମୂଲ୍ୟର ସାମଗ୍ରୀ ଆମଦାନି ହୋଇଛି, ଯାହାକି ୨୦୨୨-୨୩ରେ ୭୧୫୯୭ କୋଟି ଡଲାର ଥିଲା । ଏ କ୍ଷେତ୍ରରେ ୫.୪୧% ହ୍ରାସ ଘଟିଛି । ଗତ ଆର୍ଥିକବର୍ଷରେ ଦେଶର ବାଣିଜ୍ୟ ନିଅଣ୍ଟ ରହିଛି ୨୪୦୧୭ କୋଟି ଡଲାର । ମଧ୍ୟପ୍ରାଚ୍ୟରେ ସଂକଟ ବଢୁଥିବାବେଳେ ଏହାକୁ ନେଇ ବାଣିଜ୍ୟ ସଚିବ ସୁନିଲ ବର୍ଥୱଲ କହିଛନ୍ତି ଯେ, ସ୍ଥିତି ଉପରେ ମନ୍ତ୍ରାଳୟ ନଜର ରଖିଛି । ଏହା ଉପରେ ଉପଯୁକ୍ତ ପଦକ୍ଷେପ ନିଆଯିବ ।