ମୁମ୍ବାଇ,୧୮/୦୫: ଚଳିତ ଆଇପିଏଲ୍ରେ ଶନିବାର ବହୁ ଚର୍ଚ୍ଚିତ ମୁକାବିଲା ରହିଛି । ଆଇପିଏଲ୍ ଇତିହାସର ସବୁଠୁ ଲୋକପ୍ରିୟ ଦୁଇ ଦଳ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ ଚେନ୍ନାଇ ସୁପରକିଙ୍ଗ୍ସ ପରସ୍ପରକୁ ଭେଟିବାକୁ ଯାଉଛନ୍ତି । ଟୁର୍ଣ୍ଣାମେଣ୍ଟର ଏହି ୬୮ତମ ଲିଗ୍ ମୁକାବିଲା ଉଭୟ ଦଳର ଭାଗ୍ୟ ନିର୍ଦ୍ଧାରଣ କରିବ । ଇତି ମଧ୍ୟରେ କୋଲକାତା ନାଇଟ୍ ରାଇଡର୍ସ, ରାଜସ୍ଥାନ ରୟାଲ୍ସ ଓ ସନରାଇଜର୍ସ ହାଇଦ୍ରାବାଦ ପ୍ଲେ- ଅଫ୍ରେ ପ୍ରବେଶ କରିସାରିଛନ୍ତି । ଶନିବାର ବିଜେତା ଚତୁର୍ଥ ଦଳ ଭାବେ ଯୋଗ୍ୟତା ଅର୍ଜନ କରିବାର ସୁଯୋଗ ରହିଥିବାରୁ ମ୍ୟାଚ୍କୁ ଦେଇ ଦର୍ଶକଙ୍କ ମହଲରେ ପ୍ରବଳ ଉତ୍କଣ୍ଠା ପ୍ରକାଶ ପାଇଛି ।
ଏଥର ଉଭୟ ଦଳ ମଧ୍ୟରେ ଟୁର୍ଣ୍ଣାମେଣ୍ଟର ପ୍ରଥମ ମୁକାବିଲା ଖେଳାଯାଇଥିଲା । ସୁପରକିଙ୍ଗ୍ସ ୬ୱିକେଟ୍ରେ ଉକ୍ତ ମ୍ୟାଚ୍ ଜିତିଥିଲା । ଏଥର ଘରୋଇ ଗ୍ରାଉଣ୍ଡ୍ରେ ରୟାଲ୍ ଚ୍ୟାଲେଞ୍ଜର୍ସ ପୂର୍ବ ପରାଜୟର ପ୍ରତିଶୋଧ ନେବାକୁ ପ୍ରୟାସ କରିବ। ମାତ୍ର ବର୍ଷା ଘରୋଇ ଦଳର ସବୁ ସ୍ୱପ୍ନ ମଉଳାଇଦେବାର ଆଶଙ୍କା ରହିଛି । ଶନିବାର ବର୍ଷା ମ୍ୟାଚ୍ରେ ବାଧା ସୃଷ୍ଟି କରିବ ବୋଲି ସ୍ଥାନୀୟ ପାଣିପାଗ ବିଭାଗ ପୂର୍ବାନୁମାନ କରିଛି । ଅପରାହ୍ଣରେ ୪୦ରୁ ୫୦ କିଲୋ ମିଟର ବେଗରେ ପବନ ବହିବ ଓ ବିଜୁଳି ଘଡ଼ଘଡ଼ି ସହ ବର୍ଷା ହେବ । ୧୫ ଓ ୧୬ ତାରିଖରେ ଏଠାରେ ପାଗ ଶୁଖିଲା ରହିଥିଲା । ମାତ୍ର ପୂର୍ବ ରାତିରେ ବର୍ଷା ହୋଇଥିଲା ଓ ଆଜି ଦିନ ସାରା ପାଗ କୋହଲା ରହିଥିଲା । ଅପରାହ୍ଣରେ ବର୍ଷା ହୋଇଛି ଓ ଶନିବାର ସମ୍ଭାବନା ରହିଛି । ଅବଶ୍ୟ ଚିନ୍ନାସ୍ୱାମୀ ଷ୍ଟାଡ଼ିୟମ୍ର ଜଳ ନିଷ୍କାସନ ବ୍ୟବସ୍ଥା ବେଶ୍ ଉନ୍ନତ । ପ୍ରବଳ ବର୍ଷା ହେଲେ ମଧ୍ୟ ଅଧ ଘଣ୍ଟାଏ ମଧ୍ୟରେ ଗ୍ରାଉଣ୍ଡକୁ ଶୁଖାଇ ଖେଳ ଆରମ୍ଭ କରାଯାଇପାରିବ ।
ବର୍ଷା ଆଶଙ୍କା ଘରୋଇ ଦଳର ଚିନ୍ତା ବଢାଇ ଦେଇଛି । ବର୍ଷା ଯୋଗୁଁ ଖେଳ ବାତିଲ ହେଲେ ରୟାଲ୍ ଚ୍ୟାଲେଞ୍ଜର୍ସର ପ୍ଲେ-ଅପ୍ ସ୍ୱପ୍ନ ଧୂଳିସାତ୍ ହୋଇଯିବ । ସୁପରକିଙ୍ଗ୍ସ ଚତୁର୍ଥ ଦଳ ଭାବେ ପ୍ଲେ-ଅଫ୍ରେ ପ୍ରବେଶ କରିବ ।
ରୟାଲ୍ ଚ୍ୟାଲେଞ୍ଜର୍ସ ୧୩ଟି ମ୍ୟାଚ୍ରୁ ୧୨ ପଏଣ୍ଟ ହାସଲ କରିଛି ଓ ରନ ରେଟ୍ ୦.୩୮୭ ରହିଛି । ସେହିପରି ସୁପରକିଙ୍ଗ୍ସ ୧୩ଟି ମ୍ୟାଚ୍ରୁ ୧୪ ପଏଣ୍ଟ ଅର୍ଜନ କରିଛି ଓ ରନ ରେଟ୍ ୦.୫୩୮ ରହିଛି । ଶନିବାର ବଡ଼ ବ୍ୟବଧାନରେ ଜିତି ରନ୍ ରେଟ୍ ବଢାଇ ପାରିଲେ ରୟାଲ୍ ଚ୍ୟାଲେଞ୍ଜର୍ସ ପ୍ଲେ-ଅଫ୍ରେ ପ୍ରବେଶ କରିପାରିବ । ପ୍ରଥମେ ବ୍ୟାଟିଂ କଲେ ସୁପରକିଙ୍ଗ୍ସକୁ ୧୮ ରନ୍ରେ ହରାଇବାକୁ ହେବ । ସେହିପରି ଦ୍ୱିତୀୟରେ ବ୍ୟାଟିଂ କଲେ ଦଳକୁ ୧୧ଟି ବଲ୍ ବାକି ଥାଇ ବିଜୟ ହାସଲ କରିବାକୁ ପଡ଼ିବ ।
କ୍ରମାନ୍ୱୟରେ ୫ଟି ମ୍ୟାଚ୍ ଜିତିବା ପରେ ରୟାଲ୍ ଚ୍ୟାଲେଞ୍ଜର୍ସର ମନୋବଳ ଊଦ୍ଧ୍ୱର୍ରେ ରହିଛି । କେବଳ ଗ୍ଲେନ ମ୍ୟାକ୍ସୱେଲଙ୍କୁ ଛାଡ଼ି ଦେଲେ ବାକି ସମସ୍ତ ଖେଳାଳି ଫର୍ମ ଫେରି ପାଇଛନ୍ତି । ମାତ୍ର ୱିଲ ଜ୍ୟାକ୍ସ ଓ ରିସ ଟପଲିଙ୍କ ଅନୁପସ୍ଥିତି ଦଳକୁ ପ୍ରଭାବିତ କରିବାର ଆଶଙ୍କା ରହିଛି । ସୁପରକିଙ୍ଗ୍ସ ମଧ୍ୟ ଏକାଧିକ ଖେଳାଳିଙ୍କୁ ହରାଇ ସାରିଛି । ମୁସ୍ତାଫିଜୁର ରେହମାନ, ମଥିଶା ପତିରଣା, ଦୀପକ ଚହରଙ୍କ ବିନା ଦଳର ବୋଲିଂ ବିଭାଗ ଦୁର୍ବଳ ହୋଇ ଯାଇଛି ।
ସବୁ ଦିନ ଭଳି ଶନିବାର ମଧ୍ୟ ଦୁଇ ଦଳର ତାରକା ଖେଳାଳି ବିରାଟ କୋହଳି ଓ ମହେନ୍ଦ୍ର ସିଂହ ଧୋନିଙ୍କ ଉପରେ ସମସ୍ତଙ୍କ ନଜର ରହିବ। ଉଭୟଙ୍କ ସମର୍ଥକ ଆସନ୍ତା କାଲି ଷ୍ଟାଡ଼ିୟମ୍କୁ ହଳଦିଆ ଓ ନାଲି ରଙ୍ଗରେ ପୂର୍ଣ୍ଣ କରିଦେବେ। କୋହଲି ସମ୍ପ୍ରତି ଚମତ୍କାର ଫର୍ମରେ ରହିଛନ୍ତି। ସେ ଇତି ମଧ୍ୟରେ ୬୬୧ ରନ୍ ସଂଗ୍ରହ କରିସାରିଛନ୍ତି । ଧୋନି ବିଳମ୍ବରେ ବ୍ୟାଟିଂ କରିବାକୁ ଓହ୍ଲାଉଥିଲେ ହେଁ ଫିଲ୍ଡିଂ ବେଳେ ତାଙ୍କ ରଣନୀତି ସୁପରକିଙ୍ଗ୍ସ ପାଇଁ ଫଳପ୍ରଦ ସାବ୍ୟସ୍ତ ହେବ ।
ଚିନ୍ନାସ୍ୱାମୀ ଷ୍ଟାଡ଼ିୟମ୍ର ପିଚ୍ ଉଭୟ ବ୍ୟାଟିଂ ଅନୁକୂଳ ରହିବ । ଛୋଟ ବାଉଣ୍ଡାରୀ ଓ ଦ୍ରୁତ ଆଉଟ୍ ଫିଲ୍ଡ ଯୋଗୁଁ ଏଠାରେ ବିଶାଳ ସ୍କୋର ସଂଗୃହୀତ ହେବା ସହଜ । ପ୍ରଥମ ଭାଗ ତୁଳନାରେ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଏକାଦଶ
ରୟାଲ୍ ଚ୍ୟାଲେଞ୍ଜର୍ସ : ଫାଫ ଡୁ ପ୍ଲେସି(ଅଧିନାୟକ), ବିରାଟ କୋହଲି, କାମେରନ ଗ୍ରୀନ, ରଜତ ପାତିଦାର, ଗ୍ଲେନ ମ୍ୟାକ୍ସୱେଲ୍, ଦିନେଶ କାର୍ତ୍ତିକ, ମହିପାଲ୍ ଲୋମରର, ସ୍ୱପ୍ନିଲ ସିଂହ, କରଣ ଶର୍ମା, ମହମ୍ମଦ ସିରାଜ, ୟଶ ଦୟାଲ । (ଇମ୍ପାକ୍ଟ ପ୍ଲେୟାର: ଲୋକି ଫର୍ଗୁସନ) ।
ସୁପରକିଙ୍ଗ୍ସ : ରଚିନ ରବିନ୍ଦ୍ର, ଋତୁରାଜ ଗାଏକୱାଡ୍(ଅଧିନାୟକ), ଡାରିଲ ମିଚେଲ, ମୋଇନ ଅଲି, ଶିବମ ଦୁବେ, ରବିନ୍ଦ୍ର ଜାଡେଜା, ସମୀର ରିଜଭୀ, ମହେନ୍ଦ୍ର ସିଂହ ଧୋନି, ସର୍ଦୁଲ ଠାକୁର, ତୁଷାର ଦେଶପାଣ୍ଡେ, ସିମରଜିତ ସିଂହ । (ଇମ୍ପାକ୍ଟ ପ୍ଲେୟାର: ମହୀଶ ତୀକ୍ଷଣା) ।
