ବିଶାଖାପଟ୍ଟନମ୍,୩୧/୦୩: ଆଇପିଏଲ୍ର ୧୪ତମ ଲିଗ୍ ମୁକାବିଲାରେ ରବିବାର ଦିଲ୍ଲୀ କ୍ୟାପିଟାଲ୍ସ ଓ ଚେନ୍ନାଇ ସୁପରକିଙ୍ଗ୍ସ ପରସ୍ପରକୁ ଭେଟିବେ । ଏହି ମ୍ୟାଚ୍ ଜରିଆରେ ଗୁରୁ ମହେନ୍ଦ୍ର ସିଂହ ଧୋନି ଓ ଶିଷ୍ୟ ରିଷଭ ପନ୍ତ ସାମ୍ନା ସାମ୍ନି ହେବେ । ଧୋନି ଅନ୍ତର୍ଜାତୀୟ କ୍ରିକେଟ୍ରୁ ଅବସର ନେଇ ସାରିଛନ୍ତି । ସେହିପରି ମର୍ମନ୍ତୁଦ ସଡ଼କ ଦୁର୍ଘଟଣାର ୧୫ ମାସ ପରେ ଫିଟ୍ ହୋଇ ଖେଳ ଆରମ୍ଭ କରିଛନ୍ତି । ଉଭୟଙ୍କ ମଧ୍ୟରେ ସାକ୍ଷାତ ଉପସ୍ଥିତ ଦର୍ଶକଙ୍କୁ ଭାବ ବିହ୍ୱଳ କରିବ ।
କ୍ରମାନ୍ୱୟରେ ୨ଟି ମ୍ୟାଚ୍ ହାରିବା ପରେ ଦିଲ୍ଲୀ କ୍ୟାପିଟାଲ୍ସ ବିଜୟ ପାଇଁ ବ୍ୟାକୁଳ । ସାମ୍ନାରେ୨ଟି ମ୍ୟାଚ୍ ଜିତିସାରିଥିବା ଡିଫେଣ୍ଡିଂ ଚାମ୍ପିଅନ୍ ସୁପରକିଙ୍ଗ୍ସ । ଆହତ ଜର୍ଜ୍ଜରିତ ଦିଲ୍ଲୀ କ୍ୟାପିଟାଲ୍ସ ପାଇଁ ରବିବାର ବିଜୟ କଠିନ ହେବା ଆଶା କରାଯାଉଛି । ବିଶାଖାପଟ୍ଟନମ୍କୁ ଘରୋଇ ଗ୍ରାଉଣ୍ଡ ରୂପେ ବାଛିଥିବା ଦିଲ୍ଲୀ କ୍ୟାପିଟାଲ୍ସ ରବିବାର ଶ୍ରେଷ୍ଠ ଖେଳ ପ୍ରଦର୍ଶନ କରିବା ଲକ୍ଷ୍ୟ ରଖିଛି ।
ଦିଲ୍ଲୀ କ୍ୟାପିଟାଲ୍ସ ପାଇଁ ବିଜୟ ସହଜ ହେବ ନାହିଁ । ବ୍ୟାଟିଂ ବିଭାଗରେ ସନ୍ତୁଳନ ନାହିଁ । ବୋଲିଂ ବିଭାଗ ଆହତ ସମସ୍ୟାରୁ ବାହାରି ନାହିଁ। ଦଳରେ ବହୁ ତାରକା ଖେଳାଳି ରହିଛନ୍ତି । ମାତ୍ର ସମସ୍ତେ ଉପର ଭାଗରେ ଖେଳିବାକୁ ପସନ୍ଦ କରନ୍ତି । ମଧ୍ୟ ଭାଗ ଓ ନିମ୍ନ ଭାଗରେ ବିସ୍ଫୋରକ ବ୍ୟାଟିଂ କରିବା ଭଳି ଖେଳାଳି ଦଳରେ ନାହାନ୍ତି । ପେସ୍ ବୋଲର ଈଶାନ୍ତ ଶର୍ମା ଆହତ ଥିବାବେଳେ ଆନରିଚ ନର୍ଜ ଓ ଝେୟ ରିଚାର୍ଡସନ ଏପର୍ଯ୍ୟନ୍ତ ଲୟ ଫେରି ପାଇ ନାହାନ୍ତି । ଦଳରେ ଅଲ୍ରାଉଣ୍ଡରଙ୍କ ଅଭାବ ସ୍ପଷ୍ଟ ବାରି ହୋଇ ପଡ଼ୁଛି ।
ସୁପରକିଙ୍ଗ୍ସ ସବୁ ବିଭାଗରେ ଶକ୍ତିଶାଳୀ । ବ୍ୟାଟିଂ ବିଭାଗ ବେଶ୍ ଲମ୍ବା । ବୋଲିଂ ବିଭାଗରେ ଯଥେଷ୍ଟ ବିଭିନ୍ନତା ରହିଛି । ତେଣୁ ସୁପରକିଙ୍ଗ୍ସର ବିଜୟ ସମ୍ଭାବନା ଅଧିକ । ବିଶାଖାପଟ୍ଟନମ୍ ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ଟସ୍ ବିଜୟୀ ଦଳ ଫିଲ୍ଡିଂ କରିବା ନିଶ୍ଚିତ । ତେବେ ପନ୍ତଙ୍କ ବ୍ୟାଟିଂ ଓ କୁଲଦୀପ ଯାଦବଙ୍କ ବୋଲିଂ ଉପରେ କ୍ୟାପିଟାଲ୍ସର ଭାଗ୍ୟ ନିର୍ଭର କରିବ ।
ସମ୍ଭାବ୍ୟ ଦଳ
କ୍ୟାପିଟାଲ୍ସ ଏକାଦଶ: ଡେଭିଡ୍ ୱାର୍ଣ୍ଣର, ମିଚେଲ ମାର୍ଶ, ରିକି ଭୁଇ/ପୃଥ୍ୱୀ ଶ, ରିଷଭ ପନ୍ତ(ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ଅଭିଷେକ ପୋରେଲ, ଅକ୍ଷର ପଟେଲ, କୁଲଦୀପ ଯାଦବ, ମୁକେଶ କୁମାର, ଆନରିଚ ନର୍ଜ, ଖଲିଲ ଅହମ୍ମଦ, ଲଳିତ ଯାଦବ ।
ସୁପରକିଙ୍ଗ୍ସ ଏକାଦଶ: ଋତୁରାଜ ଗାଏକୱାଡ୍(ଅଧିନାୟକ), ରଚିନ ରବିନ୍ଦ୍ର, ଅଜିଙ୍କ୍ୟ ରାହାଣେ, ଶିବମ ଦୁବେ, ଡାରିଲ ମିଚେଲ, ରବିନ୍ଦ୍ର ଜାଡେଜା, ସମୀର ରିଜଭୀ, ମହେନ୍ଦ୍ର ସିଂହ ଧୋନି, ଦୀପକ ଚହର, ତୁଷାର ଦେଶପାଣ୍ଡେ, ମଥିଶା ପତିରଣା, ମୁସ୍ତାଫିଜୁର ରେହମାନ ।
