ନୂଆଦିଲ୍ଲୀ: ଜମ୍ମୁକାଶ୍ମୀରରେ ଦୀର୍ଘ ୧୦ ବର୍ଷ ପରେ ବିଧାନସଭା ନିର୍ବାଚନ ହେବାକୁ ଯାଉଛି । ବୁଧବାର ( ସେପ୍ଟେମ୍ବର ୧୮) ପ୍ରଥମ ପର୍ଯ୍ୟାୟରେ ୭ ଜିଲ୍ଲାର ୨୪ ବିଧାନସଭା ଆସନରେ ମତଦାନ ହେବ । ପ୍ରଥମ ପର୍ଯ୍ୟାୟରେ ୨୪ ଆସନ ମଧ୍ୟରୁ ୮ଟି ଜାମ୍ମୁ ଡିଭିଜନ୍ରେ ଯାଉଥିବା ବେଳେ ବାକି ୧୬ଟି ଆସନ କାଶ୍ମୀର ଘାଟିରେ ରହିଛି । ସବୁଠୁ ଅଧିକ ୭ଟି ଆସନ ଅନନ୍ତନାଗରେ ଥିବା ବେଳେ ସବୁଠାରୁ କମ୍ ୨-୨ଟି ଶୋପିୟାନ ଏବଂ ରାମବନ ଜିଲ୍ଲାରେ ରହିଛି । ଆର୍ଟିକିଲ୍ ୩୭୦ ହଟିବା ପରେ ଜମ୍ମୁକାଶ୍ମୀରରେ ପ୍ରଥମ ଥର ନିର୍ବାଚନ ହେଉଥିବାରୁ ଏହା ଉପରେ ସମସ୍ତଙ୍କ ନଜର ରହିଛି ।
୨୦୧୪ ନିର୍ବାଚନ ସମୟରେ ଜମ୍ମୁକାଶ୍ମୀର ଏକ ରାଜ୍ୟ ଥିଲା । ସେଠାରେ ବିଜେପି ଏବଂ ପିଡିପି ମେଣ୍ଟ ସରକାର ଥିଲା । କିନ୍ତୁ ଏବେ ସ୍ଥିତି ବଦଳିଯାଇଛି । ଏବେ ଜମ୍ମୁକାଶ୍ମୀର ଏକ ରାଜ୍ୟ ନୁହେଁ ବରଂ ଗୋଟିଏ କେନ୍ଦ୍ରଶାସିତ ପ୍ରଦେଶ । ପ୍ରଥମ ପର୍ଯ୍ୟାୟରେ ପୁଲଓ୍ବାମାରେ ୪ ଆସନ, ଶୋପିୟାନରେ ୨, କୁଲଗାମରେ ୩, ଅନନ୍ତନାଗରେ ୭, ରାମବନରେ ୨, କିଶ୍ତଓ୍ବାଡ ୩ ଏବଂ ଡୋଡା ଜିଲ୍ଲାର ୩ଟି ଆସନରେ ନିର୍ବାଚନ ହେବ ।
ନିର୍ବାଚନ ଆୟୋଗଙ୍କ ଅନୁସାରେ, ପ୍ରଥମ ପର୍ଯ୍ୟାୟରେ ୨୩,୨୭,୫୮୦ ଭୋଟର ମତଦାନ କରିବାକୁ ଯୋଗ୍ୟ । ସେଥିମଧ୍ୟରୁ ୧୧, ୭୬,୪୬୨ ପୁରୁଷ ଏବଂ ୧୧,୫୧,୦୫୮ ମହିଳା ରହିଛନ୍ତି । ଏହା ସହ ୬୦ ହଜାର କିନ୍ନର ସାମିଲ ଅଛନ୍ତି । ଏହି ସମୟରେ ୧୮ରୁ ୧୯ ବର୍ଷ ଆୟୁବର୍ଗର ୧.୨୩ ଲକ୍ଷ, ୨୮,୩୦୯ ଦିବ୍ୟାଙ୍ଗ ଏବଂ ୮୫ ବର୍ଷରୁ ଅଧିକ ବୟସର ୧୫,୭୭୪ ଜଣ ମତଦାନ କରିବେ । ପ୍ରଥମ ପର୍ଯ୍ୟାୟ ଭୋଟିଂରେ ପ୍ରଥମ ଥର ଭୋଟ ଦେବାକୁ ଯାଉଥିବା ମତଦାତାଙ୍କ ସଂଖ୍ୟା ୧.୨୩ ଲକ୍ଷରୁ ଅଧିକ । ସେହିଭଳି ୩୫ ହଜାର ବିସ୍ଥାପିତ କାଶ୍ମୀର ପଣ୍ଡିତ ୨୪ଟି ମତଦାନ କେନ୍ଦ୍ରରେ ନିଜର ମତସାବ୍ୟସ୍ତ କରିବେ । ୨୪ଟି ଆସନରେ ୯୦ ଜଣ ସ୍ବାଧୀନ ପ୍ରାର୍ଥୀ ଏବଂ ୨୧୯ ଦଳୀୟ ପ୍ରାର୍ଥୀ ନିଜର ଭାଗ୍ୟ ପରୀକ୍ଷା କରିବେ ।
