ପୁରୀ, ୨୬।୩: ପୁରୀ ସହରରେ ଧୁମଧାମରେ ପାଳିତ ହେଉଛି ହୋଲି l ଶ୍ରୀମନ୍ଦିରଠାରୁ ଆରମ୍ଭ କରି ବଡ଼ଦାଣ୍ଡ, ସମଦ୍ର କୂଳ, ସାହି ଗଳି କାନ୍ଦିରେ ଚାଲୁଛି ହୋଲି ପର୍ବ । କିଛି ସ୍ଥାନରେ ରଙ୍ଗ ଖେଳ ସହ ପିରାମିଡ୍ରେ ହାଣ୍ଡି ଭାଙ୍ଗିବା ଉତ୍ସବ ପାଳନ କରାଯାଉଛି । ସେହିଭଳି ଆନନ୍ଦର ପର୍ବ ହୋଲିକୁ ଜାପାନୀ ପର୍ଯ୍ୟଟକମାନେ ବେଶ୍ ଧୁମଧାମର ସହ ପାଳନ କରିଛନ୍ତି । ଇଣ୍ଡିଆ ଜାପାନ ଫ୍ରେଣ୍ଡସିପ୍ ସେଣ୍ଟର ପକ୍ଷରୁ ପୁରୀ ଚକ୍ରତୀର୍ଥ ରୋଡ୍ଠାରେ ପାଳନ ହୋଇଛି ହୋଲି ଉତ୍ସବ ।
ଜାପାନୀ ମାନେ ହୋଲି ପର୍ବ ବିଷୟରେ ଅଜ୍ଞ ଥିଲେ ମଧ୍ୟ କିଭଳି ଏହି ପର୍ବକୁ ପାଳନ କରିଥାଆନ୍ତି ଭାରତୀୟମାନେ ସେନେଇ ସେମାନଙ୍କୁ ଅବଗତ କରାଇଥିଲେ ଇଣ୍ଡୋ ଜାପାନୀ ପ୍ରେଣ୍ଡସିପି ସେଣ୍ଟରର ସଭାପତି ଶ୍ରୀମନ୍ତ କୁମାର ଦାଶ । ତେବେ କେମିକାଲ ରଙ୍ଗଠାରୁ ଦୂରରେ ରହି ହର୍ବାଲ ରଙ୍ଗରେ ହୋଲି ଖେଳିଛନ୍ତି ଜାପାନୀ ପର୍ଯ୍ୟଟକ । ଶେଷରେ ସମସ୍ତ ଜାପାନୀ ପର୍ଯ୍ୟଟକ ପୁରୀ ସମୁଦ୍ରରେ ସ୍ନାନ କରି ଫେରିଥିଲେ ।
