ନାଗପୁର : ନିକଟରେ ନାଗପୁରର ଜିଲ୍ଲା କୋର୍ଟର ଜଣେ ବିଚାରପତି କିଛି ଏମିତି କରିଛନ୍ତି, ଯାହାକୁ ସହର ଠାରୁ ନେଇ ଆଇନ ଜଗତରେ ଖୁବ୍‌ ଚର୍ଚ୍ଚା। ବିଚାରପତି ଏସବି ପାୱାରଙ୍କ କୋର୍ଟରେ ଶନିବାର ( ୧୭ ଅଗଷ୍ଟ) କୌଣସି ମାମଲାରେ ତର୍କ ଚାଲିଥିଲା। ଏହି ସମୟରେ ୬୫ ବର୍ଷିୟ ବରିଷ୍ଠ ଓକିଲ ତଲତ ଇକବାଲ କୁରୈଶୀ ନିଜ କେସ୍‌ର ପାଳି ଆସିବାକୁ ଅପେକ୍ଷା କରିଥିଲେ। ସେତେବେଳେ ହଠାତ୍‌ ବରିଷ୍ଠ ଓକିଲ କୁରୈଶୀଙ୍କର ସ୍ୱାସ୍ଥ୍ୟ ଖରାପ ହୋଇଗଲା। ସେ ସେଠାରେ ତଳେ ଶୋଇ ପଡ଼ିଲେ। ବିଚାରପତି ପାୱାର ଯିଏ କି ସେହି ସମୟରେ ଅନ୍ୟ ଜଣଙ୍କ ମାମଲାର ଶୁଣାଣି କରୁଥିଲେ, ଏହା ଦେଖି ତୁରନ୍ତ ନିଜ ଚେୟାରରୁ ଉଠି ତଳକୁ ଗଲେ। 

ଏହାପରେ ବିଚାରପତି ପାୱାର , କୁରୈଶୀଙ୍କୁ ତୁରନ୍ତ ସିପିଆର ଦେବାକୁ ଚେଷ୍ଟା କରିଥିଲେ , କିନ୍ତୁ କୁରୈଶୀଙ୍କ ଠାରେ ଏହାର କୌଣସି ପ୍ରଭାବ ଦେଖିବାକୁ ମିଳି ନଥିଲା। ଏହି ସମୟରେ ଆଉ ଜଣେ ଓକିଲ ନାଗପୁରର ଜିଲ୍ଲା ବାର ଆସୋସିଏସନର ପୂର୍ବତନ ସଚିବ ତଥା ଅଧିବକ୍ତା ନୀତିନ ଦେଶମୁଖଙ୍କୁ ସଂପର୍କ କରି ଥିଲେ ଏବଂ ତାଙ୍କୁ ମେଡିକାଲ ହେଲ୍ଫ କରିବାକୁ  ଅନୁରୋଧ କରି ଥିଲେ। ଯେପର୍ଯ୍ୟନ୍ତ ଦେଶମୁଖ କୋର୍ଟରୁମ୍‌ରେ ପହଞ୍ଚିଲେ , ସେପର୍ଯ୍ୟନ୍ତ କୁରୈଶୀ ଚେତାଶୂନ୍ୟ ସ୍ଥିତିରେ ଥିଲେ। ଏହାପରେ ବିଚାରପତି ପୱାର ଓ ଦେଶମୁଖ ତୁରନ୍ତ କୁରୈଶୀଙ୍କୁ ହସ୍ପିଟାଲକୁ ପହଞ୍ଚାଇଲେ , କିନ୍ତୁ ସେତେବେଳେ ଯାଏ ବିଳମ୍ୱ ହୋଇ ଯାଇ ଥିଲା। 

ବାର୍‌ ଆଣ୍ଡ ବେଞ୍ଚର ରିପୋର୍ଟ ମୁତାବିକ , ଦେଶମୁଖ କହିଛନ୍ତି , ଯେମିତି ଆମେ ହସ୍ପିଟାଲରେ ପହଞ୍ଚିଲୁ , ତାଙ୍କୁ ଆଇସିୟୁକୁ ନିଆଗଲା କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷିତ କରିଦେଲେ। ହେଲେ ଯେବେ ସେ ହସ୍ପିଟାଲରେ ପହଞ୍ଚିଲେ , ସେପର୍ଯ୍ୟନ୍ତ କୁରୈଶୀଙ୍କର ନାଡି ଚାଲୁ ନଥିଲା। ପରେ କୁରୈଶୀଙ୍କ ମେଡିକାଲ ରେକର୍ଡର ସମୀକ୍ଷାରେ ଜଣାପଡ଼ିଛି କି, ସେ କିଛି ଦିନ ହେବ ଅସୁସ୍ଥ ଅନୁଭବ କରୁଥିଲେ। 

ଦେଶମୁଖଙ୍କ ମୁତାବିକ , କୁରୈଶୀ କିଛି ସମୟ ପୂର୍ବେ ହିଁ ଇନୋ ନେଇ ଥିଲେ , କାରଣ ତାଙ୍କୁ ଲାଗୁଥିଲା କି , ତାଙ୍କୁ ଏସିଡିଟି ଭଳି କୌଣସି ସମସ୍ୟା ରହିଛି। ହେଲେ , ଏହି ଘଟଣାର ଠିକ୍‌ ଦୁଇ ଦିନ ପୂର୍ବେ ଜଣେ ଡାକ୍ତର କୁରୈଶୀଙ୍କୁ ଇସିଜି କରାଇବାକୁ ପରାମର୍ଶ ଦେଇଥିଲେ, କିନ୍ତୁ କୁରୈଶୀ ଏମିତି କରି ନଥିଲେ। 

ଉଲ୍ଲେଖନୀୟ ଯେ, ଶନିବାର ବରିଷ୍ଠ ଓକିଲ କୁରୈଶୀଙ୍କୁ କୋର୍ଟ ରୁମ୍‌ରେ ହୃଦଘାତ ହୋଇଥିଲା, ଯେଉଁଥିରେ ତାଙ୍କର ମୃତ୍ୟୁ ହୋଇଛି। ବରଷ୍ଠ ଓକିଲଙ୍କ ଏପରି ଅସମୟରେ ନିଧନରେ ନାଗପୁରର ଲିଗାଲ୍‌ କମ୍ୟୁନିଟି ବହୁତ ଦୁଃଖ ପ୍ରକାଶ କରିଛି।