କାକଟପୁର,୩୧/୦୩ :କାକଟପୁର ବିଧାନସଭା କ୍ଷେତ୍ରରୁ କିଏ ହେବ ବିଜେଡି  ପ୍ରାର୍ଥୀ ? ମନ୍ତ୍ରୀ ତୁଷାରକାନ୍ତି ବେହେରାଙ୍କ  ଉପରେ ଦଳ ଭରସା କରିବ ନା ନୂଆ  ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇବ? ଯଦି  ଗଣିତ ଓଲଟେ, ତେବେ ତୁଷାରକାନ୍ତିଙ୍କୁ  କେଉଁଠି ଥଇଥାନ୍‌ କରାଯିବ? ଏବେ  ଏଭଳି ଅନେକ ପ୍ରଶ୍ନ ଗୁଞ୍ଜରିତ ହେଉଛି  କାକଟପୁର ନିର୍ବାଚନମଣ୍ଡଳୀରେ । 

ଜଗତ୍‌ସିଂହପୁର ସଂସଦୀୟ  କ୍ଷେତ୍ର ଅଧୀନରେ ରହିଛି କାକଟପୁର  ନିର୍ବାଚନମଣ୍ଡଳୀ । କାକଟପୁର ବ୍ଲକର  ୧୬ ପଞ୍ଚାୟତ, ଅସ୍ତରଙ୍ଗ ବ୍ଲକର ୧୫  ପଞ୍ଚାୟତ, ଗୋପ ବ୍ଲକର ୧୪ ପଞ୍ଚାୟତ  ଓ କୋଣାର୍କ ଏନ୍‌ଏସିକୁ ନେଇ ଗଠିତ  ଏହି ନିର୍ବାଚନମଣ୍ଡଳୀ ୨୦୦୦ ମସିହାରୁ  ବିଜେଡି ଅକ୍ତିଆରରେ ରହିଛି । ୨୦୦୦  ଏବଂ ୨୦୦୪ରେ ଏଠାରୁ ସୁରେନ୍ଦ୍ରନାଥ  ନାଇକ ଦୁଇଥର ବିଜୟୀ ହୋଇଥିଲେ ।  ନିର୍ବାଚନମଣ୍ଡଳୀ ପୁନର୍ଗଠିତ ହେବା ପରେ  ୨୦୦୯ରୁ ପ୍ରତିଥର ପ୍ରାର୍ଥୀ ବଦଳାଇଛି  ଦଳ । ୨୦୦୯ରେ ରବି ମଲ୍ଲିକ, ୨୦୧୪ରେ  ସୁରେନ୍ଦ୍ରନାଥ ସେଠୀ ଏବଂ ୨୦୧୯ରେ  ଇଂ. ତୁଷାରକାନ୍ତି ବେହେରାଙ୍କୁ ପ୍ରାର୍ଥୀ କରି  ବିପକ୍ଷଙ୍କୁ ଚକ୍‌ମା ଦେଇଥିଲା ବିଜେଡି ।  ହେଲେ ଏବେ ସ୍ଥିତି ବଦଳିଛି । ଶାସକ  ଦଳରେ ଅନ୍ତଃକନ୍ଦଳ ତେଜିଛି । ତେଣୁ  କ୍ରାଇସିସ୍‌ ମ୍ୟାନେଜ୍‌ କରିବା ପାଇଁ ଏଠାରୁ କିଏ  ପ୍ରାର୍ଥୀ ହେବ ତାହା ଉପରେ ଅଟକିଛି ସମସ୍ତଙ୍କ  ନଜର । ବିଭିନ୍ନ ଚର୍ଚ୍ଚା ଓ ଆଲୋଚନା ମଧ୍ୟରେ  ବିଧାୟକ ପ୍ରାର୍ଥୀ ଦୌଡ଼ରେ ମନ୍ତ୍ରୀ ତୁଷାରକାନ୍ତି,  ପୂର୍ବତନ ବିଧାୟକ ସୁରେନ୍ଦ୍ର, ନୂଆ ଚେହେରା  ଭାବେ ସମାଜସେବୀ ସୂର୍ଯ୍ୟକାନ୍ତ ଦାସରାୟ  ଓ ପ୍ରଫୁଲ୍ଲ ବେହେରା ସାମିଲ ହୋଇଛନ୍ତି ।  ଏମାନେ ଟିକେଟ ପାଇଁ ଆବେଦନ  କରିଛନ୍ତି । ଏଭଳି ଏକାଧିକ ଆଶାୟୀ ଥିବାରୁ  ପ୍ରାର୍ଥୀ ଚୟନ ବିଳମ୍ବ ହେଉଥିବା ଚର୍ଚ୍ଚା  ହେଉଛି । ଦ୍ୱିତୀୟ ପର୍ଯ୍ୟାୟରେ ଦଳ ଏଠାରୁ  ପ୍ରାର୍ଥୀ ଚୂଡ଼ାନ୍ତ କରିବା ସମ୍ଭାବନା ରହିଛି ।