ଭୁବନେଶ୍ୱର,୨୫/୦୩: କୋଲକାତାରେ ସୁବୋଧ ସରକାର ନାମକ ଜଣେ ଜମି ମାଲିକଙ୍କୁ ହତ୍ୟା ଅଭିଯୋଗରେ ୩ଜଣ ଅଭିଯୁକ୍ତଙ୍କୁ ଗିରଫ କରିଛି ପଶ୍ଚିମବଙ୍ଗ ପୁଲିସ । ଏହି ଅପରାଧର ମୁଖ୍ୟ ଅଭିଯୁକ୍ତ କୁହାଯାଉଥିବା ସୌମକାନ୍ତି ଜେନାଙ୍କ ସମେତ ଅନ୍ୟ ୨ଜଣ ଧରାପଡ଼ିଛନ୍ତି । ସୌମ୍ୟକାନ୍ତି ପଶ୍ଚିମବଙ୍ଗରେ ଏକ ଘରୋଇ ବ୍ୟାଙ୍କର ରିଲେସନସିପ୍ ମ୍ୟାନେଜର ଭାବେ କାମ କରୁଥିଲେ ବୋଲି ଜଣାପଡ଼ିଛି । ଘଟଣାର ତଦନ୍ତ ଚାଲିଥିବାରୁ ଅନ୍ୟ ୨ଜଣ ଅଭିଯୁକ୍ତଙ୍କ ନାମ ପୁଲିସ ପ୍ରକାଶ କରିନାହିଁ ।
ସୂଚନା ମୁତାବକ, ସୁବୋଧଙ୍କ ଭୁବନେଶ୍ୱରରେ ଏକ କୋଠା ଥିଲା । ୩ମାସ ତଳେ ସୁବୋଧ ଉକ୍ତ କୋଠାକୁ ବିକ୍ରି କରି ଦେଇଥିଲେ । ବିକ୍ରିଲବ୍ଧ ଅର୍ଥକୁ ଧରି କୋଲକାତା ପଳାଇଥିଲେ । କୋଲକାତା ବେଲଘରିଆରେ ଏକ ଘର ଭଡ଼ା ନେଇ ସେଠାରେ ରହୁଥିଲେ । ଗତକାଲି କୋଲକାତା ନିୟୁ ଟାଉନ ଅଞ୍ଚଳରେ ଥିବା ଏକ କେନାଲରେ ଏକ ଟ୍ରଲି ବ୍ୟାଗ୍ ଭାସୁଥିବା ସ୍ଥାନୀୟ ସଫେଇ କର୍ମଚାରୀ ଦେଖିଥିଲେ । ଉକ୍ତ ଟ୍ରଲି ବ୍ୟାଗ୍ରେ ରକ୍ତ ଲାଗିଥିବା ଦେଖି ସଫେଇ କର୍ମଚାରୀମାନେ ପୁଲିସକୁ ଖବର ଦେଇଥିଲେ । ପୁଲିସ ଘଟଣାସ୍ଥଳରେ ପହଞ୍ଚି ଉକ୍ତ ଟ୍ରଲି ବ୍ୟାଗ୍ ଖୋଲିବାରେ ସେଥିରୁ ସୁବୋଧଙ୍କ ମୃତଦେହ ବାହାରିଥିଲା । ସେହିଦିନ ମେଦିନାପୁର ଚେକ୍ ଗେଟ୍ରେ ସ୍ଥାନୀୟ ପୁଲିସର ଚେକିଂ ଚାଲିଥିଲା । ଏହି ସମୟରେ ଏକ ସନ୍ଦିଗ୍ଧ କାର ଉପରେ ପୁଲିସର ନଜର ପଡ଼ିଥିଲା । ଉକ୍ତ କାର୍ର ଡିକିରେ ରକ୍ତ ଲାଗିଥିବା ଦେଖି ପୁଲିସ କାର୍କୁ ଅଟକାଇଥିଲା । ସେଥିରେ ସୌମକାନ୍ତିଙ୍କ ସମେତ ୩ଜଣ ଥିଲେ । ପୁଲିସ ସମସ୍ତଙ୍କୁ ଧରି ପଚରାଉଚରା କରିଥିଲା । ପୁଲିସ ଜେରାରେ ସୌମକାନ୍ତି ନିଜର ଅପରାଧ ସ୍ୱୀକାର କରିଥିଲା ।
ପୁଲିସକୁ ସୌମ୍ୟକାନ୍ତି କହିଥିଲା, ସୁବୋଧ ଭୁବନେଶ୍ୱରରେ ଥିବା ଘର ବିକ୍ରି କରି ବିପୁଳ ଟଙ୍କା ପାଇଥିଲେ । ସେ ଟଙ୍କାକୁ ନେଇ କୋଲକାତା ପଳାଇଆସିଥିଲେ । ସେ ଟଙ୍କାତକ ହାତେଇବା ପାଇଁ ସୌମ୍ୟକାନ୍ତି ସୁବୋଧଙ୍କ ପିଛା କରିଥିଲା । ସହଯୋଗୀଙ୍କ ସହ ସୁବୋଧଙ୍କ ଭଡ଼ାଘରେ ପହଞ୍ଚି ତାଙ୍କୁ ହତ୍ୟା କରିଥିଲା । ଏହାପରେ ମୃତଦେହକୁ ଏକ ଟ୍ରଲିବ୍ୟାଗ୍ରେ ପୂରାଇ କେନାଲରେ ଫିଙ୍ଗି ଦେଇଥିଲା। ସୌମ୍ୟକାନ୍ତି ପଶ୍ଚିମବଙ୍ଗ ୨୪ପ୍ରଗଣା ନିମିତାରେ ଥିବା ଏକ ଘରୋଇ ବ୍ୟାଙ୍କର ରିଲେସନସିପ ମ୍ୟାନେଜର ଥିବା ତଦନ୍ତରୁ ଜଣାପଡ଼ିଛି । ଏ ସମ୍ପର୍କରେ ସୂଚନା ଦେଇ ଭୁବନେଶ୍ୱର ଡିସିପି ପ୍ରତୀକ ସିଂହ କହିଛନ୍ତି, ତଦନ୍ତ ଚାଲିଥିବାରୁ ଏ ସମ୍ପର୍କରେ ସବିଶେଷ ତଥ୍ୟ ପଶ୍ଚିମବଙ୍ଗ ପୁଲିସ ଠାରୁ ମିଳିପାରିନାହିଁ ।
