ନୂଆଦିଲ୍ଲୀ,୨୪/୦୫: ଷଷ୍ଠ ପର୍ଯ୍ୟାୟ ଲୋକସଭା ନିର୍ବାଚନ ପାଇଁ ଗୁରୁବାର ସନ୍ଧ୍ୟାରେ ପ୍ରଚାର ଶେଷ ହୋଇଛି । ଆସନ୍ତା ୨୫ ତାରିଖରେ ୬ ରାଜ୍ୟ ଓ ୨ କେନ୍ଦ୍ରଶାସିତ ଅଞ୍ଚଳର ମୋଟ ୫୮ ଆସନରେ ମତଦାନ ହେବ । ଏହି ପର୍ଯ୍ୟାୟରେ ମୋଟ ୮୮୯ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବ ।
ଷଷ୍ଠ ପର୍ଯ୍ୟାୟରେ ନିର୍ବାଚନ ଲଢ଼ୁଥିବା ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ନବୀନ ଜିନ୍ଦଲ (କୁରୁକ୍ଷେତ୍ର- ବିଜେପି), ମନୋହର ଲାଲ ଖଟ୍ଟର (କରନାଲ୍- ବିଜେପି), ରାଜ ବବର (ଗୁଡ଼ଗାଓଁକଂଗ୍ରେସ), ବାଂସୁରୀ ସ୍ୱରାଜ (ନୂଆଦିଲ୍ଲୀ- ବିଜେପି), ମନୋଜ ତିୱାରୀ (ଉତ୍ତର ପୂର୍ବ ଦିଲ୍ଲୀ- ବିଜେପି), ସୋମନାଥ ଭାରତୀ (ନୂଆଦିଲ୍ଲୀ- ଆପ୍), ମେନକା ଗାନ୍ଧୀ (ସୁଲ୍ତାନପୁର- ବିଜେପି), ମେହବୁବା ମୁଫ୍ତି (ଅନନ୍ତନାଗ-ରାଜୌରି, ପିଡିପି), ଅପରାଜିତା ଷଡ଼ଙ୍ଗୀ (ଭୁବନେଶ୍ୱର- ବିଜେପି), ସମ୍ବିତ ପାତ୍ର (ପୁରୀ-ବିଜେପି) ଓ ଧର୍ମେନ୍ଦ୍ର ପ୍ରଧାନ (ସମ୍ବଲପୁର- ବିଜେପି) ରହିଛନ୍ତି ।
ୟୁପିର ଆଜମଗଡ଼ରେ ବିଜେପିର ଦିନେଶ ଲାଲ ଯାଦବ ଓରଫ ନିରହୁଆଙ୍କ ଭାଗ୍ୟ ପରୀକ୍ଷା ହେବ। ହରିଆଣାରେ ସର୍ବାଧିକ ୨୨୩ ପ୍ରାର୍ଥୀ ନିର୍ବାଚନ ଲଢ଼ୁଥିବା ବେଳେ ଜମ୍ମୁ-କାଶ୍ମୀରରେ ସର୍ବନିମ୍ନ ୨୦ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବ । ହରିଆଣାର ସମସ୍ତ ୧୦ ଏବଂ ଦିଲ୍ଲୀର ସମସ୍ତ ୭ ଲୋକସଭା ଆସନରେ ଭୋଟ ହେବ । ୟୁପିର ସୁଲ୍ତାନପୁର, ଶ୍ରାବସ୍ତି, ପ୍ରତାପଗଡ଼, ଫୁଲପୁର, ପ୍ରୟାଗରାଜ, ଜୌନପୁର, ଆଜମଗଡ଼ ସମେତ ୧୪ ଆସନ, ବିହାରରେ ପଶ୍ଚିମ ଚମ୍ପାରନ, ପୂର୍ବ ଚମ୍ପାରନ, ବୈଶାଳି, ମହାରାଜଗଞ୍ଜ ଓ ଗୋପାଳଗଞ୍ଜ ଭଳି ୮ଟି ଆସନରେ ଭୋଟ ପଡ଼ିବ । ଜମ୍ମୁ-କାଶ୍ମୀରର ଅନନ୍ତନାଗ-ରାଜୌରି ଲୋକସଭା ଆସନରେ ମତଦାନ ହେବ । ସେହିଭଳି ଝାଡ଼ଖଣ୍ଡର ରାଞ୍ଚି, ଗିରିଡିହ, ଧାନବାଦ ଓ ଜାମସେଦପୁର ଲୋକସଭା ଆସନରେ ମତଦାନ ହେବାକୁ ଯାଉଛି ।
ଓଡ଼ିଶାରେ କେନ୍ଦୁଝର, ସମ୍ବଲପୁର, କଟକ, ଢେଙ୍କାନାଳ,ପୁରୀ, ଭୁବନେଶ୍ୱର ଲୋକସଭା ଆସନରେ ମତଦାନ ହେବାକୁ ଯାଉଛି। ରାଜ୍ୟରେ ମୋଟ ୬୪ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବ । ପଶ୍ଚିମବଙ୍ଗର ଘାଟଲ, ତାମଲୁକ, କାନ୍ଥି, ପୁରୁଲିଆ, ଝାଡ଼ଗ୍ରାମ, ମେଦିନିପୁର, ବାଙ୍କୁରା, ବିଷ୍ଣୁପୁର ଲୋକସଭା ଆସନରେ ମତଦାନ ହେବ । ଏହି ଆସନଗୁଡ଼ିକରେ ମୋଟ ୭୯ ପ୍ରାର୍ଥୀ ଲଢ଼ୁଛନ୍ତି ।