ଚନ୍ଦ୍ରଶେଖରପୁର,୦୧/୦୪: ଚନ୍ଦ୍ରଶେଖରପୁର ଡିଷ୍ଟ୍ରିକ୍ଟ ସେଣ୍ଟରରେ ଥିବା ଏକ ବାର୍ରେ ଗତକାଲି ବିଳମ୍ବିତ ରାତିରେ ଗଣ୍ଡଗୋଳ ହୋଇଛି । ବାର୍କୁ ଆସିଥିବା ଜଣେ ଯୁବତୀଙ୍କୁ ଅସଦାଚରଣ କରିବା ସହ ତାଙ୍କ ପ୍ରେମିକଙ୍କୁ ନିର୍ଧୁମ ଛେଚି ସୁନା ଚେନ୍ ଲୁଟି ନେଇଛନ୍ତି । ଏନେଇ କଳିଙ୍ଗ ନଗରର ସଂଗ୍ରାମ କେଶରୀ ଦାଶ ୧୦ ଯୁବକଙ୍କ ନାମରେ ଏତଲା ଦେଇଛନ୍ତି । ପୁଲିସ ଏତଲା ରଖି ତଦନ୍ତ କରୁଛି ।
ଅଭିଯୋଗ ଅନୁଯାୟୀ ଗତକାଲି ସଂଗ୍ରାମ ତାଙ୍କ ପ୍ରେମିକା ରୂପାଲି (ଛଦ୍ମନାମ) କୁ ଧରି ଉକ୍ତ ବାରକୁ ଆସିଥିଲେ । ଉଭୟେ ବସି କଥା ହେଉଥିବା ସମୟରେ ରୂପାଲୀଙ୍କୁ ଜଣେ ଯୁବକ ଆସି ଅସଦାଚରଣ କରିଥିଲେ । ସଂଗ୍ରାମ ଏହା ଦେଖିବା ପରେ ରୂପାଲିଙ୍କୁ ଯୁବକଙ୍କ ବିଷୟରେ ପଚାରିଥିଲେ । ହେଲେ ସେ କିଛି ଉତ୍ତର ଦେଇପାରିନଥିଲେ । ସଂଗ୍ରାମ ରାଗି ଯାଇ ରୂପାଲିଙ୍କୁ ଗୋଟେ ଚାପୁଡା ମାରିଥିଲେ । ଏହା ଦେଖି ସେଠାରେ ଉପସ୍ଥିତ ଥିବା ଯୁବକଙ୍କ ସହ ତାଙ୍କର ଅନ୍ୟ ସହକର୍ମୀମାନେ ତାତିଥିଲେ । ସଂଗ୍ରାମଙ୍କୁ ନିର୍ଧୁମ୍ ଛେଚିଥିଲେ । ତାଙ୍କ ବେକ ଚିପି ଧରି ବାହାରକୁ ଗଲେ ଜୀବନରେ ମାରି ଦେବାକୁ ମଧ୍ୟ ଧମକ ଦେଇଥିଲେ । ଏହି ଠେଲାପେଲା ସମୟରେ ସଂଗ୍ରାମଙ୍କ ସୁନା ଚେନକୁ କିଏ ଛିଣ୍ଡାଇ ନେଇ ଯାଇଥିଲା । ପରେ ସଂଗ୍ରାମ ପିସିଆରକୁ ଫୋନ୍ କରିବା ସହ ଅଭିଯୋଗ କରିଥିଲେ ।