ନୂଆଦିଲ୍ଲୀ: ଝାଡଖଣ୍ଡର ହଜାରିବାଗରୁ ଏକ ସମ୍ବେଦଶୀଳ ଘଟଣା ଏବେ ସାମ୍ନାକୁ ଆସିଛି । ରିପୋର୍ଟ ଅନୁଯାୟୀ, ଜିଲ୍ଲାର ବାରହି ଅଞ୍ଚଳରେ ଅବସ୍ଥିତ ପବନପୁତ୍ର ଷ୍ଟିଲ ଏବଂ ଆଲୋଇ ପ୍ଲାଣ୍ଟରେ ବିସ୍ଫୋରଣ ହେତୁ ୭ ଜଣ ଶ୍ରମିକ ଗୁରୁତର ଭାବେ ପୋଡି ଯାଇଛନ୍ତି । ଏହି ଇସ୍ପାତ କାରଖାନା ଏଠାରେ ମାତ୍ର ୨ ବର୍ଷ ପୂର୍ବେ ନିର୍ମିତ ହୋଇଥିଲା | କୁହାଯାଉଛି ଯେ ଏହି ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ, ଶ୍ରମିକ ମାନେ ଏହା ଦ୍ୱାରା ନିଜକୁ ରକ୍ଷା କରିପାରି ନଥିଲେ । ଚାରିଜଣ ଗୁରୁତର ଆହତ ଶ୍ରମିକଙ୍କୁ ଚିକିତ୍ସା ପାଇଁ ହଜାରିବାଗ ସ୍ଥିତ ଆରୋଗ୍ୟମ ହସ୍ପିଟାଲରେ ଭର୍ତ୍ତି କରାଯାଇଛି ।

ଖବର ଅନୁଯାୟୀ, ମଧ୍ୟାହ୍ନ ପ୍ରାୟ ୧୨ ଟା ସମୟରେ ପ୍ଲାଣ୍ଟରେ ଏହି ବିସ୍ଫୋରଣ ଘଟିଥିଲା। ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ସେଠାରେ କାର୍ଯ୍ୟ କରୁଥିବା ଶ୍ରମିକ ମାନେ ବହୁ ଦୂରକୁ ଛିଟିକି ପଡିଥିଲେ । ଆହତ ଶ୍ରମିକଙ୍କ ମଧ୍ୟରୁ ଚାରି ଜଣଙ୍କୁ ଶରୀରର ୮୦ ରୁ ୯୦ ଭାଗ ପୋଡିଯାଇଛି । ସେମାନଙ୍କୁ ଚିକିତ୍ସା କରୁଥିବା ଡାକ୍ତର ମାନେ କହିଛନ୍ତି ଯେ, ଏହି ଶ୍ରମିକ ମାନଙ୍କ ଅବସ୍ଥା ଅତ୍ୟନ୍ତ ଗୁରୁତର ରହିଛି । ଏଥି ସହିତ ଏହି ଦୁର୍ଘଟଣାରେ ଆହତ ହୋଇଥିବା ଅନ୍ୟ ତିନିଜଣ ଶ୍ରମିକଙ୍କ ବିଷୟରେ କୌଣସି ସୂଚନା ମିଳିପାରିନାହିଁ । 

ପ୍ଲାଣ୍ଟରେ ହୋଇଥିବା ବିସ୍ଫୋରଣ ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ଏବଂ ପ୍ରଶାସନିକ ଅଧିକାରୀ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି । ଝାଡ଼ଖଣ୍ଡର ସ୍ୱାସ୍ଥ୍ୟମନ୍ତ୍ରୀ ବନ୍ନା ଗୁପ୍ତା ମଧ୍ୟ ଘଟଣାସ୍ଥଳରେ ପହଞ୍ଚି ସ୍ଥିତିର ଅନୁଧ୍ୟାନ କରିଛନ୍ତି ।