ଭୁବନେଶ୍ୱର/କଲିକତା, ୨୧।୮: ମାସେ ହେଲା ଆଳୁକୁ ନେଇ ଲାଗି ରହିଥିବା ଅଚଳାବସ୍ଥାରେ ବିରତି ଲାଗିପାରେ । ପଶ୍ଚିମବଙ୍ଗ ପ୍ରଗତିଶୀଳ ଆଳୁ ବ୍ୟବସାୟୀ ସଂଘ ଦେଇଥିବା ଧର୍ମଘଟ ଡାକରା ଯୋଗୁଁ ସେଠାରେ ଆଳୁ ଦର ଉଚ୍ଚା ହୋଇଛି । ଏଥିପାଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀ ବାଧ୍ୟ ହୋଇ ବ୍ୟବସାୟୀଙ୍କ ଦାବି ଆଗରେ ନଇଁଛନ୍ତି । ଓଡ଼ିଶା ସମେତ ଅନ୍ୟ ରାଜ୍ୟକୁ ଆଳୁ ପଠାଇବାକୁ ପଶ୍ଚିମବଙ୍ଗ ସରକାର ଅନୁମତି ଦେଇଛନ୍ତି । ମଙ୍ଗଳବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଓ ମୁଖ୍ୟ ଶାସନ ସଚିବଙ୍କ ସହ ଆଳୁ ବ୍ୟବସାୟୀଙ୍କ ଜରୁରୀ ବୈଠକ ହୋଇଥିଲା । ଗତ ଶନିବାର ରାତିରୁ ରାଜ୍ୟର ବିଭିନ୍ନ ସ୍ଥାନରେ ଆଳୁ ବ୍ୟବସାୟୀମାନେ ଧର୍ମଘଟ ଆରମ୍ଭ କରିଥିଲେ । ଅନ୍ୟ ରାଜ୍ୟକୁ ଆଳୁ ପଠାଇବା ବେଳେ ପୁଲିସ ଆମକୁ ବାଧା ଦେଉଛି । ଆଳୁ ଗାଡ଼ି ସୀମା ପାର୍ କରିବା ବେଳେ ପୁଲିସ ଟ୍ରକ୍ ପିଛା ଟଙ୍କା ଆଦାୟ କରୁଛି । ଏଥିପାଇଁ ବ୍ୟବସାୟୀମାନେ କ୍ଷତି ସହୁଛନ୍ତି । ଏହାକୁ ବିରୋଧ କରି ବ୍ୟବସାୟୀମାନେ ଆନ୍ଦୋଳନକୁ ଓହ୍ଲାଇଥିଲେ । ଧର୍ମଘଟ ପ୍ରଭାବରେ ପଶ୍ଚିମବଙ୍ଗରେ ଆଳୁ ଦର ବଢ଼ି ଯାଇଥିଲା ଓ ଖାଉଟିଙ୍କ ଭିତରେ ଅସନ୍ତୋଷ ସୃଷ୍ଟି ହୋଇଥିଲା ।
ଏଥିପାଇଁ ସରକାର ଆଜି ଏକ ଜରୁରୀ ବୈଠକ ଡାକିଥିଲେ । ନିଜେ ମୁଖ୍ୟମନ୍ତ୍ରୀ ମମତା ସେଥିରେ ଉପସ୍ଥିତ ରହି ବ୍ୟବସାୟୀଙ୍କ ସହ ଆଲୋଚନା କରିବା ସହ ଅନ୍ୟ ରାଜ୍ୟକୁ ଆଳୁ ପଠାଇବାକୁ ଅନୁମତି ଦେଇଛନ୍ତି । ପଶ୍ଚିମବଙ୍ଗର ବଜାରରେ ଆଳୁ ଦର ନିୟନ୍ତ୍ରଣ ରଖିବା ସର୍ତ୍ତରେ ଏହି ଅନୁମତି ଦିଆଯାଇଛି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଅନ୍ୟ ରାଜ୍ୟକୁ ଆଳୁ ପଠାଇବାକୁ ଅନୁମତି ଦେବା ପରେ ଓଡ଼ିଶାର ଖାଉଟିମାନେ ଆଶ୍ୱସ୍ତ ହୋଇଛନ୍ତି । ବୁଧବାର ପଶ୍ଚିମବଙ୍ଗରୁ ଅଧିକ ଗାଡ଼ି ଲୋଡ୍ ହୋଇ ରାଜ୍ୟକୁ ଆଣିବାକୁ ଓଡ଼ିଶାର ବ୍ୟବସାୟୀମାନେ ପ୍ରସ୍ତୁତ ହେଉଛନ୍ତି । ସେଠାରୁ ଆଳୁ ପରିବହନ ସ୍ୱାଭାବିକ ହେଲେ ରାଜ୍ୟରେ ଆଳୁ ଦର କମିବା ସହ ଭଲ ମାନର ଆଳୁ ମିଳିବ ବୋଲି ବ୍ୟବସାୟୀ ସଂଘ ସମ୍ପାଦକ ସୁଧାକର ପଣ୍ଡା କହିଛନ୍ତି । ତେବେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କେତେ ଦୂର କାର୍ଯ୍ୟକାରୀ ହେଉଛି ତାହା ଆସନ୍ତାକାଲି ଗାଡ଼ି ଚେକପୋଷ୍ଟ୍ ଅତିକ୍ରମ କରିବା ବେଳେ ଜଣାପଡ଼ିବ । ସେଠାରୁ ଆଳୁ ଅଧିକ ଆସିଲେ ସମସ୍ୟା ଦୂର ହୋଇଯିବ । ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଆଜି ପୁଣି ଥରେ ଉତ୍ତରପ୍ରଦେଶରୁ ଆଳୁ ଆଣିବା କଥା ଦୋହରାଇଛନ୍ତି । ଆସନ୍ତା ୫ ଦିନ ଭିତରେ ସେଠାରୁ ୪୮ ହଜାର କୁଇଣ୍ଟାଲ ଆଳୁ ଆସିବ । ଏଥିପାଇଁ ଦୁଇଟି ଟ୍ରେନ୍ ଠିକ୍ ହୋଇଛି । ଆବଶ୍ୟକ ପଡ଼ିଲେ ପଞ୍ଜାବରୁ ବି ଆଳୁ ଆସିବ । ରାଜ୍ୟରେ ଏବେ ଆଳୁ ମହଜୁଦ ରହିଛି । ଦର ବି ନିୟନ୍ତ୍ରଣରେ ଅଛି ।
ସମ୍ବଲପୁରରେ ୨୬ ଟଙ୍କାରେ ଆଳୁ ବିକ୍ରି ହେଉଛି । ଭୁବନେଶ୍ୱର ଓ ଆଖପାଖରେ ୩୦ ଟଙ୍କାରେ ବିକ୍ରି ହେଉଛି । ତେବେ ନିର୍ଦ୍ଧାରିତ ଦରଠାରୁ ଅଧିକରେ ବିକ୍ରି କରୁଥିବା ବ୍ୟବସାୟୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ସାନି ଚେତାବନୀ ଦେଇଛନ୍ତି । ଆଳୁ ଦର ନିୟନ୍ତ୍ରଣରେ ଅଛି ବୋଲି ମନ୍ତ୍ରୀ କହୁଥିଲେ ବି ରାଜ୍ୟର ଅଧିକାଂଶ ସ୍ଥାନରେ ଆଳୁ ଦର ଉଚ୍ଚା ରହିଛି । ରାଜଧାନୀର ଖୁଚୁରା ବଜାରରେ ଏବେ ୪୦ ଟଙ୍କାରେ ଆଳୁ ବିକ୍ରି ହେଉଛି । ପିଆଜ ଦର ବି ହଠାତ୍ ବଢ଼ିଯାଇଛି । ଦୁଇ ଦିନରେ ପିଆଜ କେଜି ୧୦ରୁ ୧୫ ଟଙ୍କା ବଢ଼ିଗଲାଣି । ଏବେ ୫୦ ଟଙ୍କାରେ ପିଆଜ ବିକ୍ରି ହେଉଛି । ନାସିକ୍ରୁ ପିଆଜ ଆସିବା କମିଥିବାରୁ ଏହାର ପ୍ରଭାବ ରାଜ୍ୟରେ ଦେଖିବାକୁ ମିଳିଛି । ନାସିକ୍ରେ ନୂଆ ପିଆଜ ବାହାରିବା ପରେ ରାଜ୍ୟକୁ ଅଧିକ ଆମଦାନୀ ହେବ ଓ ଦର କମିବ ବୋଲି ବ୍ୟବସାୟୀ ସଂଘ ପକ୍ଷରୁ କୁହାଯାଇଛି ।
