କୋଲକାତା: ଆସନ୍ତା ସୋମବାର ପାଖରୁ ପଶ୍ଚିମବଙ୍ଗ ବିଧାନସଭାରେ ସ୍ବତନ୍ତ୍ର ଅଧିବେଶନ ହୋଇପାରେ । ଟିଏମସି ଛାତ୍ର ପରିଷଦର ପ୍ରତିଷ୍ଠା ଦିବସରେ ଆୟୋଜିତ ରାଲିରେ ସ୍ବତନ୍ତ୍ର ଅଧିବେଶନ ନେଇ ସଂକେତ ଦେଇଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । କୋଲକାତାରେ ଆରଜି କର ମେଡିକାଲ କଲେଜ ଓ ହସ୍ପିଟାଲରେ ଡାକ୍ତର ଦୁଷ୍କର୍ମ ଓ ହତ୍ୟା ମାମଲାକୁ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ଚାପ ବୃଦ୍ଧି ପାଇଛି । ସେପଟେ ଦୁଷ୍କର୍ମକାରୀଙ୍କୁ କମ୍‌ ସମୟ ମଧ୍ୟରେ ଫାଶୀ ଦେବାକୁ ନେଇ ନୂଆ ବିଲ ଆଗତ କରିବାକୁ ଯାଉଛନ୍ତି ମମତା । ଏହି ବିଲକୁ ପାସ କରାଇବା ଲାଗି ବିଧାନସଭାର ସ୍ବତନ୍ତ୍ର ସେସନ ଆରମ୍ଭ ହେବାକୁ ଯାଉଛି । ମଙ୍ଗଳବାର ଏହି ବିଧେୟକ ବିଧାନସଭାରେ ଆଗତ ହୋଇପାରେ । 

କୋଲକାତା ଡାକ୍ତର ଦୁଷ୍କର୍ମ ଓ ହତ୍ୟା ମାମଲାରେ ମମତା ବାନାର୍ଜୀ ବ୍ୟାକଫୁଟ୍‌ରେ ଅଛନ୍ତି । ମାମଲାରେ ପ୍ରାରମ୍ଭିକ ତଦନ୍ତ ପ୍ରକ୍ରିୟାରେ ରାଜ୍ୟ ପୋଲିସର କାର୍ଯ୍ୟ ସନ୍ଦେହଘେରରେ ଥିବା ବେଳେ ବିଜେପି ଲଗାତାର ମମତା ବାନାର୍ଜୀଙ୍କୁ ଟାର୍ଗେଟ କରିଆସିଛି । ଏପରିକି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଇସ୍ତଫା ଦାବି କରୁଛି ବିଜେପି । ବୁଧବାର ବିଜେପି ପକ୍ଷରୁ ପଶ୍ଚିମବଙ୍ଗ ବନ୍ଦ ଡାକରା ଦିଆଯାଇଥିଲା ଏବଂ ଏହାର ପ୍ରଭାବ ଭଲ ଭାବରେ ପଡ଼ିଛି । 

ଟିଏମସି ଛାତ୍ର ପରିଷଦର ପ୍ରତିଷ୍ଠା ଦିବସରେ ଆୟୋଜିତ ରାଲିରେ ମମତା ବାନାର୍ଜୀ କହିଛନ୍ତି, ବିଧାନସଭାରେ ବିଲ ପାସ କରାଇ ଦୁଷ୍କର୍ମକାରୀଙ୍କୁ ମୃତ୍ୟୁଦଣ୍ଡ ମିଳିବା ନେଇ ସୁନିଶ୍ଚିତ କରିବୁ । ଯଦି ରାଜ୍ୟପାଳ ସିଭି ବୋଷ ବିଲକୁ ମଞ୍ଜୁରୀ ଦେବାକୁ ବିଳମ୍ବ କରନ୍ତି ତେବେ ଏହା ବିରୋଧରେ ଧାରଣା ଦିଆଯିବ । ସେ କହିଛନ୍ତି, ‘ଆମେ ଆଗାମୀ ସପ୍ତାହରେ ବିଧାନସଭାରେ ବିଶେଷ ଅଧିବେଶସନରେ ସଂଶୋଧିକ ବିଲ ପାରିତ କରିବୁ । ଏହାକୁ ମଞ୍ଜୁରୀ ଲାଗି ରାଜ୍ୟପାଳଙ୍କ ନିକଟକୁ ପଠାଇବୁ । ଯଦି ସେ ମଞ୍ଜୁରୀ ନଦିଅନ୍ତି ତେବେ ଆମେ ରାଜଭବନ ସାମ୍ନାରେ ଧାରଣାରେ ବସିବୁ ।’ 

ସେପଟେ କୋଲକାତା ମାମଲାରେ ମମତା ବାନାର୍ଜୀଙ୍କ ଇସ୍ତଫା ଦାବି ହେଉଛି । ଏହାକୁ ନେଇ ମମତା ବାନାର୍ଜୀ କହିଛନ୍ତି, ‘ମୁଁ ବିଜେପିକୁ ପଚାରୁଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସେତେବେଳେ କାହିଁକି ଇସ୍ତଫା ଦେଇନଥିଲେ ଯେତେବେଳେ ଉତ୍ତର ପ୍ରଦେଶ, ମଧ୍ୟପ୍ରଦେଶ, ମଣିପୁର ଏବଂ ଆସାମରେ ମହିଳା ବିରୋଧୀ ଅତ୍ୟାଚାର ରୋକିବାରେ ବିଫଳ ହୋଇଥିଲେ । ’ ଇସ୍ତଫା ପାଇଁ ଏଥିପାଇଁ ଦାବି ହେଉଛି କାରଣ ବିଜେପିକୁ ନିର୍ବାଚନରେ ପରାଜୟର ସାମ୍ନା କରିବାକୁ ପଡ଼ିଥିଲା । ସେମାନଙ୍କୁ ଭଲ ଭବାରେ ଜଣାଅଛି ଆଗାମୀ ସମୟରେ ହେବାକୁ ଥିବା ନିର୍ବାଚନରେ ବିଜୟ ମିଳିବ ନାହିଁ ବୋଲି କହିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ ।