ନୂଆଦିଲ୍ଲୀ – ରାଜଧାନୀ ଦିଲ୍ଲୀର ଶାହଦରା ମଡର୍ଣ୍ଣ ଶାହଦରା ରୋଡ୍ ସ୍ଥିତ ରାମ ନଗର ଅଞ୍ଚଳରେ ଏକ ଭୟଙ୍କର ଅଗ୍ନିକାଣ୍ଡ ଘଟିଛି। ଶୁକ୍ରବାର ସନ୍ଧ୍ୟାରେ ଏକ ୪ ମହଲା କୋଠାରେ ଭୀଷଣ ନିଆଁ ଲାଗିଛି। ଘଟଣା ସ୍ଥଳରେ ଦମକଳ ଗାଡ଼ି ଓ ସ୍ଥାନୀୟ ପୁଲିସ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଦମକଳ କର୍ମଚାରୀମାନେ ୨ଘଣ୍ଟା ପାଖାପାଖି କଡ଼ା ପରିଶ୍ରମ ପରେ ନିଆଁକୁ ପୂରା ଆୟତ୍ତ କରିଥିଲେ। ଏହି ସମୟରେ ବିଲ୍ଡିଂରେ ଜଣେ ଶିଶୁ ସମେତ ମୋଟ ୬ଜଣ ଲୋକ ଭିତରେ ଫସି ଥିଲେ ,ସେମାନଙ୍କୁ ପୁଲିସ ଓ ଦମକଳ କର୍ମଚାରୀମାନେ ମିଶି ବାହାରକୁ ଆଣିଛନ୍ତି। ସମସ୍ତଙ୍କୁ ପିସିଆର ଟିମ୍ ଓ କ୍ୟାଟ୍ସ ଆମ୍ୱୁଲାନ୍ସର ସାହାଯ୍ୟରେ ଚେତାଶୂନ୍ୟ ଅବସ୍ଥାରେ ଜିଟିବି ହସ୍ପିଟାଲକୁ ନିଆଗଲା, ଯେଉଁଠି ଜଣେ ପିଲା ସମେତ ୪ଜଣ ଲୋକଙ୍କ ମୃତ୍ୟୁ ହୋଇଛି। ଅନ୍ୟ ଲୋକଙ୍କର ଚିକିତ୍ସା ଜାରି ରହିଛି।
ପ୍ରାରମ୍ଭିକ ଯାଞ୍ଚରୁ ଜଣା ପଡ଼ିଛି କି କୋଠାର ଭୂତଳରେ ୱାଇପର , ରବର ଓ କଟିଂ ମେସିନ ପଡ଼ିଥିଲା। ଏଠାରୁ ନିଆଁର ଆରମ୍ଭ ହୋଇଛି ଏବଂ ଦେଖୁ ଦେଖୁ ନିଆଁ ପୂରା କୋଠାକୁ କବଳିତ କରିଥିଲା। ବର୍ତ୍ତମାନ ପୁଲିସ ଅଗ୍ନିକାଣ୍ଡର କାରଣ ନେଇ ଯାଞ୍ଚ ଜୋରଦାର କରିଛି ।
ସୂଚନା ମୁତାବିକ , ଉକ୍ତ ବିଲ୍ଡିଂରେ ଶୁକ୍ରବାର ସନ୍ଧ୍ୟାରେ ନିଆଁ ଲାଗିଥିଲା। ଅଗ୍ନିଶମ ବିଭାଗର ଜଣେ ଅଧିକାରୀଙ୍କ ଅନୁସାରେ , ତାଙ୍କୁ ସନ୍ଧ୍ୟା ୫ଟା ୨୨ ମିନିଟ୍ରେ ରାମନଗର ଅଞ୍ଚଳରେ ଏକ କୋଠାରେ ନିଆଁ ଲାଗିବାର ସୂଚନା ମିଳିଥିଲା , ଏହାପରେ ତୁରନ୍ତ ଅଗ୍ନିଶମର ୫ଟି ଗାଡ଼ି ଘଟଣା ସ୍ଥଳକୁ ଯାଇଥିଲେ। ତୁରନ୍ତ ଉଦ୍ଧାର କାର୍ଯ୍ୟ ଚାଲୁ ରହିଥିଲା।
