ଭୁବନେଶ୍ୱର,୧୪/୦୫: ସୋମବାର କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସ୍ଇ)ର ପରୀକ୍ଷା ଫଳ ପ୍ରକାଶ ପାଇଛି । ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍ଏସ୍ଇ) ଯୁକ୍ତ ୨ ପରୀକ୍ଷା ଫଳ କେବେ ବାହାରିବ ତାକୁ ନେଇ ପିଲାଙ୍କ ମଧ୍ୟରେ ଉତ୍କଣ୍ଠା ଦେଖିବାକୁ ମିଳିଛି । କେବଳ ଯେ ଯୁକ୍ତ ୨ ପିଲାଙ୍କର ତାହା ନୁହେଁ ମାଟ୍ରିକ୍ ପିଲାଙ୍କ ମଧ୍ୟରେ ଉତ୍କଣ୍ଠା ଦେଖିବାକୁ ମିଳିଛି ।
ସୂଚନାଯୋଗ୍ୟ, ସିଏଚ୍ଏସ୍ଇ ପକ୍ଷରୁ ଫେବ୍ରୁଆରୀ ୧୬ରୁ ପରୀକ୍ଷା ଆରମ୍ଭ ହୋଇଥିଲା । ମାର୍ଚ୍ଚ ୨୦ ତାରିଖରେ ପରୀକ୍ଷା ଶେଷ ହୋଇଥିଲା। ଖାତା ଦେଖା ମଧ୍ୟ ଏପ୍ରିଲ୍ ୨୨ ତାରିଖରୁ ଶେଷ ହୋଇଛି । ସିଏଚ୍ଏସ୍ଇ ପକ୍ଷରୁ ମଧ୍ୟ ମେ ୧୫ ସୁଦ୍ଧା ରେଜଲ୍ଟ ଘୋଷଣା କରାଯିବ ବୋଲି କୁହାଯାଇଥିଲା । ମୂଲ୍ୟାୟନରେ ବିଳମ୍ବ ହୋଇଥିଲା । ଏବେ ପରିଷଦ ପକ୍ଷରୁ ମୂଲ୍ୟାୟନ ମାର୍କକୁ ୱେବ୍ସାଇଟ୍ରେ ପ୍ରକାଶ ପ୍ରକ୍ରିୟା ପାଇଁ ଏକ ଆଇଟି ଫାର୍ମକୁ ଦାୟିତ୍ୱ ଦିଆଯାଇଛି । ପରୀକ୍ଷା ରେଜଲ୍ଟ କେବେ ପ୍ରକାଶ ପାଇବ ତାକୁ ନେଇ ସିଏଚ୍ଏସ୍ଇ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇନାହିଁ । ଅନୁରୂପ ଭାବେ ମାଧ୍ୟମିକ ଶିକ୍ଷା ବୋର୍ଡ ପକ୍ଷରୁ ଫେବ୍ରୁଆରୀ ୨୦ରୁ ମାର୍ଚ୍ଚ ୪ ତାରିଖ ପର୍ଯ୍ୟନ୍ତ ପରୀକ୍ଷା ହୋଇଥିଲା । ପରୀକ୍ଷା ରେଜଲ୍ଟ ବାହାରିବ ତାକୁ ନେଇ ବୋର୍ଡ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଉନାହିଁ । କିନ୍ତୁ ଗତବର୍ଷ ମାର୍ଚ୍ଚ ୧୮ ତାରିଖରେ ମାଟ୍ରିକ୍ ରେଜଲ୍ଟ ପ୍ରକାଶ ପାଇଥିଲା । ଏହାକୁ ସିବିଏସ୍ଇ ରେଜଲ୍ଟ ପ୍ରକାଶ ପରେ ଅଭିଭାବକ, ଛାତ୍ରଛାତ୍ରୀଙ୍କ ମଧ୍ୟରେ ରେଜଲ୍ଟ ପ୍ରକାଶକୁ ନେଇ ଉତ୍କଣ୍ଠା ପ୍ରକାଶ ପାଇଛି ।
ସୂଚନାଯୋଗ୍ୟ, ଯୁକ୍ତ ୨ରେ ଚଳିତ ବର୍ଷ ମୋଟ ୩ ଲକ୍ଷ ୮୬ ହଜାର ୨୫୦ ଜଣ ପରୀକ୍ଷା ଦେଇଛନ୍ତି । ସେହିପରି ମାଟ୍ରିକ୍ ପାଇଁ ସାଢ଼େ ୫ ଲକ୍ଷରୁ ଅଧିକ ପିଲା ପରୀକ୍ଷା ଦେଇଛନ୍ତି ।