ନୂଆଦିଲ୍ଲୀ ୧୭/୦୪: ପୃଥିବୀରେ ଅନେକ ଅଜବ ସ୍ଥାନ ମଧ୍ୟରେ ଇସ୍ରାଏଲ ଓ ଜୋର୍ଡାନ  ମଧ୍ୟରେ ସ୍ଥିତ ମୃତ ସାଗର ବା ଡେଡ୍‌ ସି ଅନ୍ୟତମ । ଅନେକ  ବିଶେଷତ୍ୱ ପାଇଁ ଏହା ପର୍ଯ୍ୟଟକଙ୍କ ମଧ୍ୟରେ ଖୁବ୍‌ ଲୋକପ୍ରିୟତା  ହାସଲ କରିଛି । ଡେଡ୍‌ ସି’ର ସବୁଠୁ ବଡ଼ ବିଶେଷତ୍ୱ ହେଉଛି  ଏଥିରେ କେହି ବୁଡ଼ନ୍ତି ନାହିଁ । ଏହି ସମୁଦ୍ର ପାଣିରେ ଲବଣ ମାତ୍ରା  ଏତେ ଅଧିକ ଯେ ଏଥିରେ ଶୋଇଲେ ବି ବୁଡ଼ିବେ ନାହିଁ । ଗୋଟିଏ ପଟେ ଇସ୍ରାଏଲ, ଅନ୍ୟପଟେ ଜୋର୍ଡାନର ମନୋରମ   ପାହାଡ଼ ଦ୍ୱାରା ପରିବେଷ୍ଟିତ ଡେଡ୍‌ ସି’ର ଦୃଶ୍ୟ ଅତ୍ୟନ୍ତ ମନଲୋଭା ।  ମୃତ ସାଗର ପୃଥିବୀର ସବୁଠୁ ନିମ୍ନରେ ଅବସ୍ଥିତ ଜଳାଶୟ ।  ଏହା ସମୁଦ୍ର ପତ୍ତନଠୁ ୪୦୦ ମିଟର ତଳେ ଅବସ୍ଥିତ । ସମୁଦ୍ରର   ନାଁ ମୃତ ସାଗର ହେବାର କାରଣ ଏଥିରେ କୌଣସି ଜୀବ ବା  ଉଦ୍ଭିଦ ଜୀବିତ ରହିପାରନ୍ତି ନାହିଁ । 

ଏଥିରେ ଲବଣ ମାତ୍ରା ପ୍ରାୟ  ୩୫ ପ୍ରତିଶତ । ଏଥିରେ କୌଣସି ମାଛ ବି ବଞ୍ଚିପାରନ୍ତି ନାହିଁ ।  ସାଧାରଣ ସାମୁଦ୍ରିକ ଜଳଠୁ ଏହା ୧୦ ଗୁଣ ଅଧିକ ଲୁଣିଆ । ମୃତ ସାଗରର ଲବଣ ଏହାର ବାଲି ଓ ମାଟିରେ ବି ପରସ୍ତ  ପରସ୍ତ ହୋଇ ଜମା ହୋଇଛି । ସୋଡିୟମ୍‌ କ୍ଲୋରାଇଡ୍‌ର ଉପସ୍ଥିତି  ଯୋଗୁ ଏହା ଚିକ୍‌ମିକ୍‌ କରେ । ପର୍ଯ୍ୟଟକ ଏହି ସମୁଦ୍ରରେ କୌଣସି  ସାମଗ୍ରୀ ବିନା ଭାସନ୍ତି । ମୃତ ସମୁଦ୍ର ମାଟିରେ ତ୍ୱଚା ପାଇଁ ଲାଭକରୀ   ହାଇଆଲ୍ୟୁରୋନିକ ଏସିଡ୍‌ ଓ ଅନେକ ଖଣିଜ ଥାଏ । ଏଠାକୁ  ଆସୁଥିବା ଲୋକେ ଏହି ମାଟିର ଲେପ ଲଗାଇ ଖରାରେ ବସନ୍ତି ।